ലൈവിനിടെ വനിതാ യൂട്യൂബറെ ചുംബിക്കാന് ശ്രമിച്ചു പിടിയിലായി
വനിതാ യൂട്യൂബറെ ചുംബിക്കാന് ശ്രമിക്കുകയും ബലമായി ബൈക്ക് റൈഡിന് കൊണ്ടുപോകാന് ശ്രമിക്കുകയും ചെയ്ത യുവാക്കള് പോലീസ് പിടിയില്. മുംബൈയിലാണ് സംഭവം. മൊബീന് ഷെയ്ഖ്, നഖീബ് അന്സാരി എന്നിവരെയാണ് പോലീസ് പിടികൂടിയത്.
ദക്ഷിണ കൊറിയന് യൂട്യൂബറായ ഹിയോജിയോങ് പാര്ക്കിനാണ് ദുരനുഭവം ഉണ്ടായത്. രണ്ട് ദിവസം മുന്പ് ഖാര് മേഖലയില് ആയിരുന്നു സംഭവം. സെല്ഫി മോഡില് ലൈവ് സ്ട്രീമിങ് നടത്തുന്നതിനിടെ യുവാക്കള് ശല്യം ചെയ്യുകയായിരുന്നു.ബലമായി യുവതിയുടെ കൈയ്യില് പിടിക്കുകയും മുഖം അടുപ്പിച്ച് ചുംബിക്കാന് ശ്രമിക്കുകയുമായിരുന്നു. യുവതി ഒഴിഞ്ഞുമാറിയെങ്കിലും യുവാക്കള് വിട്ടില്ല.
ബൈക്കില് പിന്തുടര്ന്നും ഇവര് ശല്യം ചെയ്തു. എന്നാല് നിയന്ത്രണം വിടാതെ ശാന്തമായി യുവാക്കളെ മടക്കി അയയ്ക്കുകയാണ് ഹിയോജിയോങ് പാര്ക്ക് ചെയ്തത്. ദൃശ്യങ്ങള് സമൂഹമാദ്ധ്യമങ്ങളില് വൈറല് ആയതോടെയാണ് പോലീസ് നടപടി സ്വീകരിച്ചത്.
ബാന്ദ്രയിലെ പട്ടേല് നഗറില് നിന്നുളളവരാണ് പിടിയിലായ യുവാക്കള്. ഇവരെ പോലീസ് കസ്റ്റഡിയില് വിട്ടു. നേരത്തെ മറ്റൊരു രാജ്യത്തും തനിക്ക് സമാനമായ ദുരനുഭവം ഉണ്ടായിട്ടുണ്ടെന്ന് പാര്ക്ക് പറഞ്ഞു. അന്ന് പരാതിയൊന്നും നല്കിയില്ല. പക്ഷെ ഇന്ത്യയില് കാര്യങ്ങള് വളരെ വേഗത്തിലാണ്. എത്ര പെട്ടെന്നാണ് ഇവിടെ നടപടിയുണ്ടായത്. മൂന്നാഴ്ചയിലധികമായി താന് മുംബൈയിലുണ്ട്. കുറച്ചുകാലം കൂടി ഇവിടെ തങ്ങണമെന്നാണ് ആഗ്രഹമെന്നും ഹിയോജിയോങ് പാര്ക്ക് പറഞ്ഞു.
ഇത്തരം മോശം അനുഭവം മനോഹരമായ ഇന്ത്യയെ ലോകത്തിന് പരിചയപ്പെടുത്തി കൊടുക്കാനുളള തന്റെ അഭിനിവേശത്തെ കെടുത്തില്ല. തന്റെ യാത്രാപ്ലാനുകള് ഇതിന്റെ പേരില് തകിടം മറിക്കാനും ഉദ്ദേശിക്കുന്നില്ലെന്ന് അവര് കൂട്ടിച്ചേര്ത്തു. ട്വിറ്ററിലെ ദൃശ്യങ്ങള് ശ്രദ്ധയില്പെട്ടതോടെയാണ് ഖാര് പോലീസ് നടപടി സ്വീകരിച്ചത്.
https://www.facebook.com/Malayalivartha
