ആരാധകരെ ഒന്നടങ്കം ദുഃഖത്തിലാഴ്ത്തി നിർബന്ധിത സൈനികസേവനം ആരംഭിച്ച് പ്രമുഖ കൊറിയൻ സംഗീത ബാൻഡ് ബിടിഎസിലെ മുതിർന്ന അംഗം ജിൻ. തല മൊട്ടയടിച്ച് പട്ടാള ലുക്ക് സ്വീകരിച്ചതോടെ ആരാധകർ കൂട്ടക്കരച്ചിലാണ്.

ഞങ്ങളിതെങ്ങനെ സഹിക്കുമെന്ന ചോദ്യത്തിന് ഉത്തരമില്ലെങ്കിലും ജിൻ സൈനികസേവനം ആരംഭിക്കാൻ ക്യാംപിലെത്തുമ്പോൾ ആരാധകസൈന്യം ഇരച്ചെത്താതിരിക്കാൻ അഭ്യർഥനയുമായി ബിടിഎസ് എജൻസിയായ ബിഗ്ഹിറ്റ് മ്യൂസിക് എത്തുകയും ചെയ്തു.

യോൻചനിലെ ബൂട്ട് ക്യാംപിൽ ഇന്ന് ജിൻ സൈനിക റിക്രൂട്മെന്റിന് എത്തി. കൂടെ ബിടിഎസിലെ മറ്റ് അംഗങ്ങളും കുടുംബവും എത്തി. ആരാധകർ പരിസരത്തേക്കു വരരുതെന്നാണ് അഭ്യർഥന നൽകിയത്. മറ്റു സൈനികരും അവരുടെ ബന്ധുക്കളുമൊക്കെയായി തിരക്കുള്ള സ്ഥലത്ത് ആളുകൾ കൂടുന്നത് പ്രശ്നമുണ്ടാക്കുമെന്നും അവിടേക്കു വരുമ്പോൾ ജിൻ ആരാധകരെയോ മാധ്യമപ്രവർത്തകരെയോ മൈൻഡ് ചെയ്യില്ല എന്നും ഏജൻസി മുൻകൂട്ടി അറിയിച്ചിരുന്നു.

അതോടൊപ്പം തന്നെ ഒരു കടാക്ഷമോ അഭിവാദ്യമോ പ്രതീക്ഷിച്ച് ആരും വരേണ്ടതില്ലെന്ന് ചുരുക്കം. ബിടിഎസിലെ മറ്റ് അംഗങ്ങളും വരും മാസങ്ങളിൽ സൈനികസേവനം ആരംഭിക്കും. 2 വർഷത്തെ സേവനം പൂർത്തിയാക്കി 2025 ൽ ബാൻഡ് പുനഃസംഘടിപ്പിക്കാനാണു തീരുമാനം കൈക്കൊണ്ടിരിക്കുന്നത്.