ഗാസ മുനമ്പിൽ നടന്ന ഏറ്റുമുട്ടലിൽ ഇന്ത്യൻ വംശജനായ ഇസ്രയേൽ സൈനികൻ കൊല്ലപ്പെട്ടതായി റിപ്പോർട്ട്. മാസ്റ്റർ സർജൻറ് ഗിൽ ഡാനിയൽസ് (34) ആണ് കൊല്ലപ്പെട്ടതെന്ന് കമ്മ്യൂണിറ്റി അംഗങ്ങൾ അറിയിച്ചു. ഹമാസ് ഭീകരർ ആണ്‌ കൊല്ലപ്പെടുത്തിയത്. അദ്ദേഹത്തിന്റെ ശവസംസ്‌കാരം ബുധനാഴ്ച ഇസ്രയേലിൽ നടന്നു. ഇതോടെ ഗാസ മുനമ്പിൽ മരിക്കുന്ന ഇസ്രയേലി ജവാന്മാരുടെ എണ്ണം 86 ആയി. ഗാസ മുനമ്പിൽ നടന്ന ഏറ്റുമുട്ടലിൽ കൊല്ലപ്പെട്ട രണ്ട് സൈനികരിൽ ഗിലും ഉൾപ്പെടുന്നുവെന്ന് ഇസ്രായേൽ പ്രതിരോധ സേന സ്ഥിരീകരിക്കുകയായിരുന്നു. ഹീബ്രൂ സർവകലാശലയിൽ നിന്ന് സ്കൂൾ ഓഫ് ഫാർമസിയില്‍ ഗിൽ ബിരുദാനന്തരബിരുദം നേടിയിട്ടുണ്ട്. ഒരുമാസം മുൻപായിരുന്നു ഗില്ലിന്റെ വിവാഹനിശ്ചയം.

സൈനികൻ്റെ മരണത്തില്‍ ഇന്ത്യൻ ജൂത പൈതൃക കേന്ദ്രം അനുശോചനം അറിയിച്ചു. ഗാസമുനമ്പിൽ ചൊവ്വാഴ്ചയുണ്ടായ വെടിവയ്പ്പിലാണ് ഗില്ലും മറ്റു രണ്ട് ഇസ്രയേൽ സൈനികരും കൊല്ലപ്പെട്ടത്. ‘ഈ യുദ്ധത്തിൽ ഇസ്രയേലിനു നിരവധി സൈനികരെ നഷ്ടമായി. ഇസ്രയേലിലെ മുഴുവൻ ജനങ്ങള്‍ക്കും വേണ്ടി ജീവൻ നഷ്ടമായ നിരവധി പേരുണ്ട്. യോയലിന്റെയും മസാലിന്റെയും മകനും ഇസ്രയേൽ പ്രതിരോധ സേനയുടെ ഭാഗവുമായ ഗിൽ ഡാനിയേലിന്റെ മരണത്തിൽ അനുശോചനം രേഖപ്പെടുത്തുന്നു.’–ഇന്ത്യൻ ജൂയിഷ് ഹെറിട്ടേജ് സെന്റർ വാർത്താകുറിപ്പിൽ അറിയിച്ചു.

അതേസമയം,ഹമാസിന്റെ പകുതിയോളം ബറ്റാലിയന്‍ കമാന്‍ഡര്‍മാരെ സൈന്യം വധിച്ചുവെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു അവകാശപ്പെട്ടു. ഹമാസ് ബന്ദികളാക്കിയ ഇസ്രയേലികളുടെ കുടുംബാംഗങ്ങളുമായുള്ള കൂടിക്കാഴ്ചയ്ക്ക് ശേഷം വാര്‍ത്താസമ്മേളനത്തില്‍ സംസാരിക്കുകയായിരുന്നു നെതന്യാഹു. എന്നാല്‍ കൊല്ലപ്പെട്ട ഹമാസ് കമാന്‍ഡര്‍മാരുടെ പേരുകള്‍ അദ്ദേഹം വെളിപ്പെടുത്തിയില്ല.