ലോസാഞ്ചല്‍സില്‍ കാട്ടുതീ നിയന്ത്രണവിധേയമാക്കാനുള്ള ശ്രമം തുടരുന്നു; കാട്ടുതീ അണയ്ക്കാന്‍ വെള്ളത്തിന് പകരം ഉപയോഗിക്കുന്നത് ?
കാലിഫോര്‍ണിയയില്‍ കാട്ടുതീ നിയന്ത്രണവിധേയമാക്കാനുള്ള ശ്രമം തുടരുന്നു. ഇതിനിടെ വിമാനങ്ങളിലും ഹെലികോപ്ടറുകളിലുമായി ഒരു പിങ്ക് നിറമുള്ള പൗഡര്‍ തീപിടിത്തം ഉണ്ടാകുന്ന സ്ഥലത്തേക്ക് വിതറുന്ന വീഡിയോകള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്.
വെള്ളം, അമോണിയം നൈട്രേറ്റ്, അമോണിയം പോളിഫോസ്‌ഫേറ്റ്, ഡൈ അമോണിയം സള്‍ഫേറ്റ്, ഗുവാര്‍ ഗം, അറ്റാപള്‍ഗസ് ക്ലേ എന്നിവ ചേരുന്നതാണ് ഫോസ്-ചെക്ക്' മിശ്രിതം. ഇത് താഴെയുള്ള വസ്തുക്കളില്‍ വിതറും. അതുവഴി ഓക്‌സിജനുമായുള്ള രാസപ്രവര്‍ത്തനം തടയുകയും തീപിടിക്കുന്നത് ഒഴിവാക്കുകയും ചെയ്യുമെന്ന് വിദഗ്ധര്‍ പറയുന്നു. ലക്ഷ്യസ്ഥാനത്ത് വീണെന്ന് അറിയുന്നതിന് ഫോസ് ചെക്കിന് പിങ്ക് നിറമാണ് നല്‍കിയിരിക്കുന്നത്. ലോസാഞ്ചലസില്‍ പ്രധാന സ്ഥലങ്ങളില്‍ മിശ്രിതം വിതറിയെന്നാണ് റിപ്പോര്‍ട്ട്. പിങ്ക് നിറത്തിലായ പ്രദേശങ്ങളുടെയും ചിത്രങ്ങള്‍ സമൂഹമാദ്ധ്യമങ്ങളില്‍ പ്രചരിക്കുന്നുണ്ട്.
1960 മുതല്‍ അമേരിക്കന്‍ കമ്പനിയായ പെരിമേറ്റര്‍ സൊലൂഷന്‍ ഉത്പാദിപ്പിക്കുന്ന ഫോസ് ചെക്ക് പ്രധാന അഗ്‌നി പ്രതിരോധ വസ്തുവെന്ന രീതിയില്‍ ലോകത്താകമാനം ഏറെ പ്രശസ്തമാണ്. നേരിട്ട് തീയിലേക്ക് സ്പ്രേ ചെയ്യുന്നതിന് പകരം തീപിടിക്കാന്‍ സാദ്ധ്യതയുള്ള സ്ഥലങ്ങളില്‍ മുന്‍കൂട്ടി സ്പ്രേ ചെയ്യുന്നു. വെള്ളത്തെപ്പോലെ പെട്ടെന്ന് വറ്റിപ്പോകില്ലെന്നതുകൊണ്ട് ഏത് സമയത്തും ഇത് ഉപയോഗിക്കാനും കഴിയും.
എന്നാല്‍ ഫോസ് ചെക്കിന്റെ വ്യാപകമായ ഉപയോഗം പാരിസ്ഥിക ആരോഗ്യ പ്രശ്‌നങ്ങള്‍ക്ക് ഇടയാക്കിയേക്കാമെന്ന് വിദഗ്ധര്‍ പറയുന്നു. ഇതിലടങ്ങിയ രാസവസ്തുക്കള്‍ ജലസ്രോതസുകളെയടക്കം മലിനമാക്കാന്‍ സാദ്ധ്യതയുണ്ട്. എങ്കിലും നിലവിലെ സാഹചര്യത്തില്‍ ലോസാഞ്ചലസില്‍ ലഭിക്കുന്നതില്‍ വച്ച് ഏറ്റവും ഫലപ്രദമായ വസ്തുവാണ് ഫോസ്‌ചെക്ക് എന്നാണ് സര്‍ക്കാര്‍ വൃത്തങ്ങള്‍ ചൂണ്ടിക്കാട്ടുന്നത്.
https://www.facebook.com/Malayalivartha
