ഇന്ത്യ - കാനഡ ബന്ധം വഷളായതിന് ശേഷമുള്ള ആദ്യ സന്ദര്‍ശനമായതിനാല്‍ തന്നെ പ്രധാനമന്ത്രിയുടെ യാത്രയ്ക്ക് അതീവ പ്രാധാന്യമാണ് ഇരു രാജ്യങ്ങളും കല്‍പ്പിച്ചിട്ടുള്ളത്. ജി 7 ഉച്ചകോടി നടക്കുന്ന കാനഡക്ക് പുറമെ സൈപ്രസ്, ക്രൊയേഷ്യ രാജ്യങ്ങളും മോദി സന്ദര്‍ശിക്കുകയും ചെയ്യും. രണ്ട് ദശാബ്ദത്തിന് ശേഷമാണ് സൈപ്രസിലേക്ക് ഒരു ഇന്ത്യന്‍ പ്രധാനമന്ത്രി സന്ദര്‍ശനം നടത്തുന്നത്. ക്രൊയേഷ്യയിലേക്കുള്ള ഇന്ത്യന്‍ പ്രധാനമന്ത്രിയുടെ പ്രഥമ സന്ദര്‍ശനമാകുമിത് എന്ന പ്രത്യേകതയുമുണ്ട്.

സൈപ്രസ് റിപ്പബ്ലിക് പ്രസിഡന്റ് നിക്കോസ് ക്രിസ്റ്റോഡൗലിഡ്സിന്റെ ക്ഷണപ്രകാരമാണ് പ്രധാനമന്ത്രി നരേന്ദ്ര മോദി ജൂണ്‍ 15-16 തീയതികളില്‍ ഔദ്യോഗിക സന്ദര്‍ശനം നടത്തുന്നത്. രണ്ട് ദശാബ്ദത്തിന് ശേഷമാണ് സൈപ്രസിലേക്ക് ഒരു ഇന്ത്യന്‍ പ്രധാനമന്ത്രി സന്ദര്‍ശനം നടത്തുന്നത്.

നിക്കോസിയയില്‍, പ്രസിഡന്റ് ക്രിസ്റ്റോഡൗലിഡ്സുമായി പ്രധാനമന്ത്രി ചര്‍ച്ച നടത്തും. ലിമാസോളില്‍ വ്യവസായ പ്രമുഖരരെ അഭിസംബോധന ചെയ്യും. ഉഭയകക്ഷി ബന്ധം കൂടുതല്‍ ആഴത്തിലാക്കാനും മെഡിറ്ററേനിയന്‍ മേഖലയുമായും യൂറോപ്യന്‍ യൂണിയനുമായും ഇന്ത്യയുടെ ബന്ധം കൂടുതല്‍ ശക്തിപ്പെടുത്താനുമുള്ള ഇരു രാജ്യങ്ങളുടെയും പൊതുവായ പ്രതിജ്ഞാബദ്ധതയെ ഈ സന്ദര്‍ശനം ആവര്‍ത്തിച്ചുറപ്പാക്കുകയും ചെയ്യും.

സന്ദര്‍ശനത്തിന്റെ രണ്ടാം ഘട്ടത്തില്‍ കാനഡ പ്രധാനമന്ത്രി മാര്‍ക്ക് കാര്‍ണിയുടെ ക്ഷണപ്രകാരം ജൂണ്‍ 16-17 തീയതികളില്‍ നടക്കുന്ന ജി-7 ഉച്ചകോടിയില്‍ പങ്കെടുക്കാനായി കാനഡയിലെ കനനാസ്‌കിസില്‍ മോദി എത്തും. ജി-7 ഉച്ചകോടിയില്‍ തുടര്‍ച്ചയായ ആറാമത്തെ പ്രാവശ്യമാണ് പ്രധാനമന്ത്രി പങ്കെടുക്കുന്നത്. ഉച്ചകോടിയില്‍, ഊര്‍ജ്ജ സുരക്ഷ, സാങ്കേതികവിദ്യ, നൂതനാശയം- പ്രത്യേകിച്ച് എഐ-ഊര്‍ജ്ജ ബന്ധം, ക്വാണ്ടം സംബന്ധിച്ച വിഷയങ്ങള്‍ എന്നിവയുള്‍പ്പെടെ പ്രധാന ആഗോള വിഷയങ്ങളില്‍ ജി-7 രാജ്യങ്ങളിലെ നേതാക്കളുമായും ക്ഷണിക്കപ്പെട്ട രാജ്യങ്ങളുടെ പ്രതിനിധികളുമായും അന്താരാഷ്ട്ര സംഘടനകളുടെ തലവന്മാരുമായും പ്രധാനമന്ത്രി വീക്ഷണങ്ങള്‍ പങ്കുവയ്ക്കും. ഉച്ചകോടിയോടനുബന്ധിച്ച് പ്രധാനമന്ത്രി നിരവധി ഉഭയകക്ഷി യോഗങ്ങളും നടത്തും.

പര്യടനത്തിന്റെ അവസാന ഘട്ടത്തില്‍ ക്രൊയേഷ്യയുടെ പ്രധാനമന്ത്രി ആന്‍ഡ്രെ പ്ലെന്‍കോവിച്ചിന്റെ ക്ഷണപ്രകാരം പ്രധാനമന്ത്രി 18 ന് ക്രൊയേഷ്യയിലേക്ക് ഔദ്യോഗിക സന്ദര്‍ശനം നടത്തുന്നതാണ്.