അമേരിക്കന്‍ ബഹിരാകാശ ഏജന്‍സി നാസയുടെ ജൂണോ പേടകം വ്യാഴത്തിന്റെ ഏറ്റവും വ്യക്തയേറിയതും മനോഹരവുമായ ചിത്രങ്ങള്‍ ലോകത്തിനു കൈമാറിയിരിക്കുന്നു.
വ്യാഴത്തിന്റെ പല ചിത്രങ്ങളോടൊപ്പം ചുഴിയുടെ രൂപത്തിലുള്ള മേഘങ്ങള്‍ വ്യാഴത്തിന്റെ തെക്കും വടക്കും ഭാഗത്തുള്ള ചിത്രങ്ങളും ജൂണോ അയച്ചിട്ടുണ്ട്. 2,600 മൈല്‍ മുകളില്‍ നിന്നാണ് വ്യാഴത്തിന്റെ ഈ ചിത്രം അയച്ചിരിക്കുന്നത്.
മറ്റു ഗ്രഹങ്ങളിലേതു പോലെ വാതകങ്ങളും പൊടിക്കാറ്റിന്റെയും സാനിധ്യം വ്യാഴത്തിലുണ്ട്. നമ്മള്‍ സങ്കല്‍പ്പിച്ചു വെച്ചതു പോലെ ഒന്നും തന്നെ അല്ല വ്യാഴം കാഴ്ചയില്‍ എന്ന് ജൂണോയുടെ ചിത്രങ്ങളില്‍ നിന്ന് വ്യക്തമായെന്ന് നാസ വ്യത്തങ്ങള്‍ അറിയിച്ചു.
ഏതെങ്കിലും തരത്തിലുള്ള സോണുകളോ, അക്ഷാംശ രേഖാംശ രേഖകള്‍ക്ക് സമാനമായ രേഖകളോ, വാതക ബെല്‍റ്റുകളേ ഒന്നും തന്നെ വ്യാഴത്തിന്റെ ചിത്രങ്ങളില്‍ ഇല്ലെന്നും നാസ വ്യക്തമാക്കി.
2011 ഓഗസ്റ്റ് 5 ന് ഫ്‌ളോറിഡയിലെ കെന്നഡി ബഹിരാകാശ നിലയത്തില്‍ നിന്നുമാണ് ജൂണോ യാത്ര തുടങ്ങിയത്. വ്യാഴത്തിന്റെ ശക്തമായ ഗുരുത്വാകര്‍ഷണം അതിജീവിച്ചാണ് പേടകം ഭ്രമണപഥത്തിലേക്കു മാറിയത്.
1600 കിലോഗ്രാം ഭാരമുള്ള ജൂണോ ശബ്ദത്തിന്റെ 215 ഇരട്ടി വേഗത്തിലാണു സഞ്ചരിച്ചിരുന്നത്. വ്യാഴത്തിനരികെ എത്തുമ്പോള്‍ വേഗം മണിക്കൂറില്‍ രണ്ടു ലക്ഷത്തി അറുപത്തിആറായിരം കിലോമീറ്റര്‍ എത്തിച്ചിരുന്നു.
35 മിനിറ്റോളം പ്രധാന എന്‍ജിന്‍ പ്രവര്‍ത്തിപ്പിച്ച ശേഷമാണ് വേഗത കുറച്ചത്. നിശ്ചിത സമയത്ത് എന്‍ജിന്‍ പ്രവര്‍ത്തിച്ചില്ലെങ്കില്‍ ജൂണോ വ്യാഴത്തെയും കടന്ന് അനന്തതയിലേക്കു പോകുമായിരുന്നു. 20 മാസംവരെ പേടകം വ്യാഴത്തെ ഭ്രമണം ചെയ്യും. അതിനു ശേഷം വ്യാഴത്തിന്റെ ഉപരിതലത്തിലേക്കു പതിക്കും.
ഭ്രമണപഥത്തിലെത്താന്‍ അഞ്ചുവര്‍ഷത്തിനിടെ 17 കോടി മൈലുകള്‍ താണ്ടി. 113 കോടിയിലേറെ ഡോളര്‍ ചെലവിട്ടാണ് പദ്ധതി പൂര്‍ത്തീകരിച്ചത്. 1.37 ലക്ഷം കിലോമീറ്റര്‍ വ്യാസമുള്ള വ്യാഴത്തിന്റെ 4160 കിലോ മീറ്റര്‍ അടുത്തുവരെ ഭ്രമണപഥത്തിലാണ് ജൂണോ ഇപ്പോള്‍ ഉള്ളത്.