ബ്രിട്ടനില്‍ വോട്ടവകാശത്തിനുള്ള പ്രായം 16 ആയി കുറയ്ക്കുന്നതിനോട് യോജിപ്പില്ലെന്നു പ്രധാനമന്ത്രി തെരേസ മേയ്. അധികാരത്തിലെത്തിയാല്‍ വോട്ടിങ് പ്രായം 16 വയസാക്കി കുറയ്ക്കുമെന്ന് ലേബര്‍ പാര്‍ട്ടി നേതാവ് ജെറമി കോര്‍ബിന്‍ കഴിഞ്ഞദിവസം പ്രഖ്യാപിച്ചിരുന്നു. ഈ വാഗ്ദാനത്തോടു പ്രതികരിക്കവേയാണ് തനിക്കും പാര്‍ട്ടിക്കും ഇതിനോടു യോജിപ്പില്ലെന്നു തെരേസ മേയ് പ്രഖ്യാപിച്ചത്. ഇപ്പോള്‍ വോട്ടു ചെയ്യുന്നതിനുള്ള കുറഞ്ഞ പ്രായം 18 വയസാണ്. 2014ല്‍ നടന്ന സ്‌കോട്ടിഷ് ഹിതപരിശോധനയില്‍ പതിനാറും പതിനേഴും വയസുള്ളവര്‍ക്ക് വോട്ടവകാശം നല്‍കിയിരുന്നു.

ലേബര്‍ പാര്‍ട്ടിക്കു പുറമേ ലിബറല്‍ ഡെമോക്രാറ്റിക് പാര്‍ട്ടി, സ്‌കോട്ടിഷ് നാഷനല്‍ പാര്‍ട്ടി, ഗ്രീന്‍ പാര്‍ട്ടി എന്നീ കക്ഷികള്‍ വോട്ടിങ് പ്രായം കുറയ്ക്കണമെന്ന അഭിപ്രായക്കാരാണ്. എന്നാല്‍ ഭരണകക്ഷിയായ ടോറികള്‍ക്കും തീവ്രവലതുപക്ഷ പാര്‍ട്ടിയായ യുക്കിപ്പിനും ഇതിനോട് യോജിപ്പില്ല.

ഇതിനിടെ തിരഞ്ഞെടുപ്പ് പ്രഖ്യാപിച്ചതിനുശേഷം നടന്ന അഭിപ്രായ സര്‍വേകളില്‍ ഒന്നില്‍ ആദ്യമായി ലേബര്‍ പാര്‍ട്ടി റേറ്റിങ്ങില്‍ ഉയര്‍ച്ച രേഖപ്പെടുത്തി. കഴിഞ്ഞയാഴ്ച പാര്‍ട്ടി നേതാവ് ജെറമി കോര്‍ബിന്‍ നടത്തിയ വാഗ്ദാനങ്ങളുടെ നീണ്ടനിരയും പാര്‍ട്ടിയുടെ പ്രകടനപത്രിക ചോര്‍ന്ന് പുറത്തുവന്ന വിവരങ്ങളും വോട്ടര്‍മാരെ സ്വാധീനിച്ചതായി പുതിയ സര്‍വേഫലം വ്യക്തമാക്കുന്നു. റെയില്‍വേ, റോയല്‍മെയില്‍, ഊര്‍ജമേഖല എന്നിവ ദേശസാല്‍കരിക്കുമെന്ന പ്രഖ്യാപനവും യൂണിവേഴ്‌സിറ്റി വിദ്യാഭ്യാസം സൗജന്യമാക്കുമെന്ന വാഗ്ദാനവും വോട്ടര്‍മാരെ ആകര്‍ഷിച്ചു.

ശനിയാഴ്ച പുറത്തുവന്ന സര്‍വേയനുസരിച്ച് 32 ശതമാനം പേരാണ് ലേബര്‍ പാര്‍ട്ടിക്ക് അനുകൂലമായി പ്രതികരിച്ചത്. ഇത് 2015ലെ പൊതുതിരഞ്ഞെടുപ്പില്‍ അവര്‍ക്ക് ലഭിച്ച വോട്ട് ഷെയറിനേക്കാള്‍ കൂടുതലാണ്. 14 മുതല്‍ 15 പോയിന്റുവരെ ലീഡാണ് ഈ സര്‍വേയില്‍ ടോറികള്‍ക്ക് ലേബറിനുമേല്‍ ഉള്ളത്. കഴിഞ്ഞയാഴ്ച ഇത് 17 പോയിന്റായിരുന്നു. ബ്രെക്‌സിറ്റിന്റെ പേരിലുള്ള ടോറികളുടെ മുന്നേറ്റത്തില്‍ പകച്ചുനിന്ന ലേബര്‍പാര്‍ട്ടിക്ക് ആശ്വാസവും പ്രതീക്ഷയും നല്‍കുന്നതാണ് ഏറ്റവും ഒടുവില്‍ പുറത്തുവന്നിരിക്കുന്ന ഈ സര്‍വേഫലം.

ശനിയാഴ്ചതന്നെ പുറത്തുവന്ന മറ്റൊരു സര്‍വേഫലം ടോറികള്‍ക്ക് ഇപ്പോഴും 18 പോയിന്റ് ലീഡ് പ്രവചിക്കുന്നുണ്ട്. ഇതില്‍ 31 ശതമാനം ലേബറിനും 49 ശതമാനം ടോറികള്‍ക്കും വിജയസാധ്യത പറയുന്നു. ലിബറല്‍ ഡെമോക്രാറ്റുകള്‍ക്കും യുക്കിപ്പിനും എല്ലാ സര്‍വേയിലും പിന്തുണ കുറഞ്ഞുവരികയാണ്.