ലോകത്തിന്റെ മുഴുവന്‍ കൗതുകവും ഏറ്റുവാങ്ങി 1951 ല്‍ ജനിച്ച റോണി ഗായ്‌ലോണ്‍, ടോണി ഗായ്‌ലോണ്‍ എന്നീ സയാമീസ് ഇരട്ടകള്‍ ഇന്നും ലോകത്തിനു കൗതുകം . ജനിച്ചപ്പോള്‍, ജനനം കൊണ്ടാണ് കൗതുകമായത് എങ്കില്‍ ഇപ്പോള്‍ ജീവിതം കൊണ്ടാണ് എന്ന് മാത്രം. രണ്ടു ശരീരം, എന്നാല്‍ അരയ്ക്ക് കീഴ്‌പ്പോട്ടു ഒന്നായി ജനിച്ച റാണിയും ടോണിയും അധികനാള്‍ ജീവിക്കില്ല എന്ന് വൈദ്യശാസ്ത്രം വിധിയെഴുതിയതാണ്. എന്നാല്‍ വിധി മറിച്ചായിരുന്നു. ഇപ്പോഴിതാ, എല്ലാവരെയും അത്ഭുതപ്പെടുത്തി ഈ സഹോദരങ്ങള്‍ അറുപത്തിനാലാം പിറന്നാള്‍ മധുരവും രുചിച്ചിരിക്കുകയാണ്.

. ഇന്ന് ലോകത്തെ ഏറ്റവും പ്രായം ചെന്ന സയാമീസ് ഇരട്ടകളാണ് റാണിയും ടോണിയും. നാല് കൈകളും നാല് കാലുകളും ഉണ്ടെങ്കിലും പെല്‍വിക് ഭാഗം ഒന്നേയുള്ളൂ. ഓപ്പറേഷന്‍ ചെയ്ത് വേര്‍പ്പെടുത്താന്‍ ശ്രമിച്ചാല്‍ കൂട്ടത്തില്‍ ഒരാള്‍ മരിച്ചു പോകുമോ എന്നുഭയന്നു ഇരുവരും അതിനു തയ്യാറായില്ല. അല്പം ബുദ്ധിമുട്ടി ആണെങ്കിലും ഇരുവരും നടക്കുകയും, സ്വിമ്മിംഗ് പൂളില്‍ വരെ ഇറങ്ങുകയും ഒക്കെ ചെയ്യും.

ജീവിതത്തിന്റെ എല്ലാ സ്വകാര്യതകളും പങ്കുവച്ചതാണ് ഈ സഹോദരന്മാരുടെ ജീവിതം. കണ്ടു നില്‍ക്കുന്നവര്‍ക്ക് ഏറെ ബുദ്ധിമുട്ടുകള്‍ തോന്നുമെങ്കിലും റാണിയും ടോണിയും അവരുടെ ജീവിതത്തില്‍ സന്തോഷവാന്മാരാണ് എന്ന് ഇരുവരുടെയും സഹോദന്‍ ജിം പറയുന്നു. കുളിക്കാനും, ഷേവ് ചെയ്യാനും, ഷൂ ലേസ് കെട്ടാനും, ഭക്ഷണം കഴിക്കാനും എല്ലാം തന്നെ ഇരുവരും പരസ്പരം സഹായിക്കുകയാണ് പതിവ്. വേണ്ടി വന്നാല്‍ ഇവര്‍ ക്രിക്കറ്റ് കളിയ്ക്കാന്‍ വരെ ഇറങ്ങും എന്നത് കേട്ടാല്‍ ആരും അത്ഭുതപ്പെടേണ്ട.
ആറര പതിറ്റാണ്ടിന്റെ ബന്ധമുള്ള ഇരുവര്‍ക്കും ഒരു നിമിഷം പോലും പരസ്പരം പിരിഞ്ഞിരിക്കാന്‍ വയ്യാത്ത അവസ്ഥയാണ്.