ഈജിപ്തിലെ ഹവാരയില്‍ നിന്നും 1911ലാണ് ഗവേഷകര്‍ക്ക് അഞ്ചു വയസുകാരിയുടെ മമ്മി കിട്ടുന്നത്. 106 വര്‍ഷങ്ങള്‍ക്കു ശേഷം മമ്മി രൂപത്തില്‍ സൂക്ഷിച്ചു വച്ചിരിക്കുന്ന മൃതദേഹത്തെക്കുറിച്ചു കൂടുതല്‍ വിവരങ്ങള്‍ കണ്ടെത്തിയിരിക്കുകയാണ് ഗവേഷകര്‍. 

എക്‌സ് റേ സ്‌കാനിങ് സാങ്കേതിവിദ്യ ഉപയോഗിച്ച് നടത്തിയ ഗവേഷണങ്ങളിലൂടെയാണ് പെണ്‍കുട്ടിയെക്കുറിച്ച് കൂടുതല്‍ വിവരങ്ങള്‍ ഗവേഷകര്‍ കണ്ടെത്തിയത്. 

അഞ്ചുവയസുകാരിയുടെ മമ്മിയുമായി ബന്ധപ്പെട്ട് നിരവധി ദുരൂഹതകള്‍ നിലനിന്നിരുന്നു. 1900 വര്‍ഷങ്ങള്‍ക്കു മുന്‍പ് എങ്ങനെയാണ് ഈ മമ്മി സജ്ജമാക്കിയത്? ഇതിനായി എന്തൊക്കെ ഉപയോഗിച്ചു? ആ കുട്ടിയുടെ മരണകാരണം എന്താണ്? തുടങ്ങി നിരവധി ചോദ്യങ്ങള്‍ ഉയര്‍ന്നു.

ഈ ചോദ്യങ്ങള്‍ക്കെല്ലാം ഉത്തരം കണ്ടെത്തുകയെന്നതായിരുന്നു ഗവേഷകരുടെ ലക്ഷ്യം. ഗാരെറ്റ് എന്ന പേരില്‍ അറിയപ്പെടുന്ന ഈ മമ്മിയേക്കുറിച്ചു നോര്‍ത്ത് വെസ്‌റ്റേണ്‍ സര്‍വകലാശലയിലെ ഗവേഷകരാണു നിര്‍ണ്ണായകമായ പഠനങ്ങള്‍ നടത്തുന്നത്. 

എക്‌സറേ സാങ്കേതികവിദ്യ ഉപയോഗിച്ചാണു പഠനങ്ങള്‍ നടത്തുന്നത്. മനുഷ്യരുടെ മമ്മികളില്‍ ആദ്യമായാണ് ഈ സാങ്കേതികവിദ്യ ഉപയോഗിക്കുന്നത്. ചിത്രങ്ങള്‍ ആലേഖനം ചെയ്ത നിലയില്‍ ലഭിച്ച 100 പോര്‍െ്രെടറ്റ് മമ്മികളില്‍ ഒന്നാണ് ഗാരെറ്റ് മമ്മി. 

അടക്കം ചെയ്ത മമ്മികളുടെ മുഖഭാഗത്ത് ജീവന്‍ തുടിക്കുന്ന ചിത്രം വരച്ചു ചേര്‍ത്തിട്ടുള്ളവയാണ് ഇത്തരം മമ്മികള്‍. മൂന്ന് അടിയോളം മാത്രം നീളമുള്ള പെണ്‍കുട്ടിയുടെ ശരീരം ചണത്തുണി കൊണ്ട് പൊതിഞ്ഞ നിലയിലാണുള്ളത്. 

തേനീച്ചകളുടെ മെഴുകും നിറങ്ങളും ഉപയോഗിച്ചാണ് മമ്മിയിലെ ചിത്രങ്ങള്‍ വരച്ചിരിക്കുന്നത്. ചിത്രത്തില്‍ നിറമുള്ള വസ്ത്രങ്ങളും സ്വര്‍ണാഭരണങ്ങളും അണിഞ്ഞ നിലയിലാണ് പെണ്‍കുട്ടി. മുടി പിന്നിയ നിലയില്‍ പുറകിലേക്ക് ഇട്ടിരിക്കുകയാണ്. 

മമ്മിയെക്കുറിച്ച് നിരവധി വിവരങ്ങള്‍ ശേഖരിച്ചിട്ടുണ്ടെന്നും വിശദമായ പഠനങ്ങള്‍ നടത്തിയാല്‍ പെണ്‍കുട്ടി ആരായിരുന്നു എന്നത് അടക്കമുള്ള വിവരങ്ങള്‍ ലഭിക്കുമെന്നുമാണ് ഗവേഷകര്‍ കരുതുന്നത്.

അതേസമയം പെണ്‍കുട്ടി അന്നത്തെ സമൂഹത്തില്‍ വലിയസ്ഥാനം അലങ്കരിച്ചിരുന്ന കുടുംബത്തിലെ അംഗമായിരുന്നുവെന്നും ഗവേഷകര്‍ പറയുന്നു. കഴിഞ്ഞ ഓഗസ്റ്റില്‍ ഗാരെറ്റ് മമ്മിയുടെ സിടി സ്‌കാനിങ് നടത്തിരുന്നു. ഇതില്‍ നിന്നാണു മമ്മിക്കുള്ളില്‍ ഉള്ളത് അഞ്ചുവയസുള്ള പെണ്‍കുട്ടിയുടെ ശരീരമാണെന്ന് ഇവര്‍ കണ്ടെത്തിയത്.