കഴിഞ്ഞ ദിവസം ഒരു ക്രിസ്മസ് ട്രീയുടെ ചിത്രം ഇന്‍സ്റ്റാഗ്രാമിലിട്ടതിന്റെ പേരില്‍ പുലിവാല്‍ പിടിച്ചിരിക്കുകയാണ് പ്രശസ്തനായ മുന്‍ ബോക്സിംഗ് താരം അമീര്‍ഖാന്‍. വീട്ടിലുണ്ടാക്കിയ ട്രീ ആയിരുന്നു ഖാന്‍ ഷെയര്‍ ചെയ്തിരുന്നത്. തുടര്‍ന്ന് ഇസ്ലാമിനെ വഞ്ചിച്ചുവെന്ന് ആരോപിച്ച് മതമൗലികവാദികള്‍ ഇദ്ദേഹത്തിനെതിരെ രംഗത്തെത്തുകയായിരുന്നു. ഇതിന് പുറമെ അമീര്‍ഖാന് നേരെ തെറിവിളിയും വധഭീഷണിയും ഉയര്‍ന്നിട്ടുമുണ്ട്. വീട്ടിലുണ്ടാക്കിയ ഈ ക്രിസ്മസ് ട്രീ മൂന്ന് വയസുള്ള തന്റെ മകള്‍ ഉണര്‍ന്ന് വന്ന് കാണുമ്പോള്‍ അവള്‍ക്കേറെ ഇഷ്ടമാകുമെന്ന വിവരണത്തോടെയായിരുന്നു ഖാന്‍ ക്രിസ്മസ് ട്രീയുടെ ചിത്രം ഇന്‍സ്റ്റാഗ്രാമിലിട്ടിരുന്നത്.

തുടര്‍ന്ന് ഖാന്റെ ഫോളോവേഴ്സില്‍ ചിലര്‍ തന്നെ, ഇതിനെതിരെ പ്രകോപനപരമായ പ്രതികരണങ്ങളുമായി മുമ്പോട്ട് വന്നിരുന്നു. തുടര്‍ന്ന് അവര്‍ ഇതിനെതിരെ ഖാനെ അപമാനിക്കുന്നതും ഭീഷണിപ്പെടുത്തുന്നതുമായ സന്ദേശങ്ങളുമുയര്‍ത്തി. ഖാനും കുടുംബവും വൈകാതെ മരിക്കുമെന്നും അള്ളാഹു ശിക്ഷിക്കുമെന്നുമായിരുന്നു ചിലര്‍ മുന്നറിയിപ്പേകുന്നത്. ഖാന്‍ നരകത്തില്‍ പോവുമെന്നായിരുന്നു മറ്റൊരു ഫോളോവറുടെ പ്രതികരണം. എന്നാല്‍ മുസ്ലീങ്ങളാണെങ്കിലും ചില ഫോളോവര്‍മാര്‍ ഖാന്റെ പ്രവൃത്തിയെ ന്യായീകരിച്ചും മുമ്പോട്ട് വന്നിരുന്നു.

ക്രിസ്മസ് ട്രീ വച്ചുവെന്നതിനാല്‍ ഖാന്‍ ഇസ്ലാംമതത്തെ അവഹേളിച്ചുവെന്ന് പറയാനാവില്ലെന്നാണ് അവര്‍ അദ്ദേഹത്തെ ന്യായീകരിച്ചിരിക്കുന്നത്. ഖാന്‍ ജീവിക്കുന്നത് ഇംഗ്ലണ്ടില്‍ പടിഞ്ഞാറന്‍ സംസ്‌കാരത്തിലാണെന്നും അവിടെ ക്രിസ്മസ് ആഘോഷിക്കുന്നതിനാല്‍ ഖാന്‍ ട്രീ വച്ചതില്‍ തെറ്റില്ലെന്നുമാണ് അദ്ദേഹത്തെ ന്യായീകരിക്കുന്നവര്‍ വാദിക്കുന്നത്. കാലിഫോര്‍ണിയയിലെ ട്രെയിനിംഗ് ക്യാമ്പിനടുത്തുള്ള മുസ്ലീം പള്ളിയിലാണ് എല്ലാ വെള്ളിയാഴ്ചയും താന്‍ ചെലവഴിക്കാറുള്ളതെന്ന് കഴിഞ്ഞ വര്‍ഷം ഒരു ഇന്റര്‍വ്യൂവില്‍ ഖാന്‍ വെളിപ്പെടുത്തിയിരുന്നു.

മോസ്‌ക് താന്‍ പോവാന്‍ ഏറെ ഇഷ്ടപ്പെടുന്ന ഇടമാണെന്നും താന്‍ ഒരു മുസ്ലീമാണെന്ന് പറയാന്‍ തനിക്ക് ഭയമില്ലെന്നും അന്ന് അദ്ദേഹം പറഞ്ഞിരുന്നു. ചിലര്‍ക്ക് ഇന്ന് മുസ്ലീമാണെന്ന് പറയാന്‍ ഭയമാണെന്നും അദ്ദേഹം എടുത്ത് കാട്ടിയിരുന്നു. തീവ്രവാദത്തെ എതിര്‍ക്കുന്ന നിരവധി മുസ്ലീങ്ങളുണ്ടെന്നും ആളുകള്‍ പരസ്പരം കൊല്ലുന്നതിനോട് അവര്‍ക്ക് യോജിപ്പില്ലെന്നും ബോക്സര്‍ വെളിപ്പെടുത്തിയിരുന്നു.