ചൈനീസ് ബഹിരാകാശ നിലയം ടിയാന്‍ഗോങ് ഒന്ന് ശാന്തസമുദ്രത്തില്‍ പതിച്ചു. ഇന്ന് പുലര്‍ച്ചെ മൂന്ന് മണിക്ക് ശാന്തസമുദ്രത്തിന് മുകളിലൂടെയാണ് ബഹിരാകാശനിലയം ഭൂമിയിലേക്ക് പ്രവേശിച്ചത്. പിന്നീട് കത്തിതീര്‍ന്നെന്നാണ് ബഹിരാകാശനിരീക്ഷകര്‍ പറയുന്നത്. ഇതോടെ ആശങ്കകള്‍ക്ക് വിരാമമമായി. ഞായറാഴ്ച രാത്രി 11.20നു ശേഷം നിലയം ഭൂമിയിലേക്കു പതിക്കാമെന്ന് ചൈന മുന്നറിയിപ്പ് നല്‍കിയിരുന്നു. ഓസ്‌ട്രേലിയയ്ക്കും അമേരിക്കയ്ക്കും ഇടയിലായിരിക്കും നിലയം വീഴുകയെന്നായിരുന്നു പ്രവചനം.

ഇന്നലെ ഉച്ചയ്ക്ക് ഭൂമിയില്‍ 170കിമീ ഉയരത്തില്‍ സഞ്ചരിച്ചു കൊണ്ടിരുന്ന ഉപഗ്രഹത്തിന്റെ ഭൂരിഭാഗം ഭാഗങ്ങളും അന്തരീക്ഷത്തിലെത്തും മുന്‍പേ കത്തിതീരുമെങ്കിലും അവശിഷ്ടങ്ങള്‍ താഴെ വീഴാന്‍ സാധ്യതയുണ്ടോ എന്ന നിരീക്ഷണത്തിലാണ് ശാസ്ത്രലോകവും മേഖലയിലെ രാജ്യങ്ങളും. ഇന്നലെ ഏപ്പോള്‍, എവിടെയിത് പതിക്കുമെന്നതിനെ ചൊല്ലി ശാസ്ത്രലോകം ആശങ്കയിലായിരുന്നു. ബ്രസീലിയന്‍ നഗരമായ സാവോ പോളോയില്‍ ഉപഗ്രഹം പതിക്കുമെന്ന് ഇന്നലെ അര്‍ധരാത്രിയോടെ ചൈനീസ് സ്‌പേസ് ഏജന്‍സി പ്രവചിച്ചത് ജനങ്ങളെ ഭീതിയിലാഴ്ത്തിയിരുന്നു. കടലില്‍ തന്നെയാവും പതിക്കുകയെന്ന് യൂറോപ്യന്‍ യൂണിയന്‍ പ്രവചിച്ചിരുന്നു. ഒടുവില്‍ അത് ശരിവച്ചു കൊണ്ട് ടിയാന്‍ഗോങ് ശാന്തസമുദ്രത്തില്‍ പതിക്കുകയും ചെയ്തു.

2011ലാണ് ടിയാന്‍ഗോങ്ങ് എന്ന ബഹിരാകാശനിലയം ചൈന വിക്ഷേപിച്ചത്. ബഹിരാകാശയാത്രികാര്‍ക്ക് താമസിക്കാനും നിരീക്ഷണപരീക്ഷണങ്ങള്‍ നടത്താനുമുള്ള ഇടമായാണ് ടിയാന്‍ഗോങ്ങിലൂടെ ചൈന ലക്ഷ്യമിട്ടത്. 2013ല്‍ ഈ നിലയത്തിന്റെ നിയന്ത്രണം ചൈനയ്ക്ക് നഷ്ടമപ്പെട്ടു. അന്ന് മുതല്‍ ബഹിരാകാശത്ത് അലഞ്ഞു നടക്കുകയായിരുന്നു. ടിയാന്‍ഗോങ് ഒന്നിന്റെ പരാജയത്തെ തുടര്‍ന്ന് ടിയാന്‍ഗോംഗ് 2 എന്ന പേരില്‍ മറ്റൊരു ബഹിരാകാശനിലയം ചൈന വിക്ഷേപിച്ചിരുന്നു. അതിപ്പോഴും പ്രവര്‍ത്തനസജ്ജമാണ്.