പച്ചക്കറി തോട്ടത്തിലേക്ക് പോയ സ്ത്രീയെ കണ്ടെത്താന്‍ നടത്തിയ തെരച്ചില്‍ അവസാനിച്ചത് കൂറ്റന്‍ പെരുമ്പാമ്പില്‍. അങ്ങ് ഇന്തൊനേഷ്യയിലാണ് സംഭവം. പച്ചക്കറി പരിപാലനത്തിനായി തോട്ടത്തിലേക്ക് പോയ ഇവരെ കൂറ്റന്‍ പെരുമ്പാമ്പ് വിഴുങ്ങുകയായിരുന്നു. മുന ദ്വീപിലെ പെര്‍സിയപാന്‍ ലവേലയില എന്ന പ്രദേശത്തു താമസിക്കുന്ന വാ ടിബ എന്ന 54കാരിയ്ക്കാണ് ദാരുണാന്ത്യം സംഭവിച്ചത്. 23 അടി നീളമുള്ള പെരുമ്പാമ്പിന്റെ വയറ് കീറിയാണ് വാ ടിബയുടെ ശരീരം പുറത്തെടുത്തത്.

പച്ചക്കറി തോട്ടത്തില്‍ നില്‍ക്കുകയായിരുന്ന വാ ടിബയെ പെരുമ്പാമ്പ് വിഴുങ്ങുകയായിരുന്നു. വ്യാഴാഴ്ച രാത്രിയായിട്ടും തിരികെ എത്താത്തതോടെ കുടുംബക്കാര്‍ ഉള്‍പ്പെടെ ഉള്ളവര്‍ ഇവര്‍ക്കായി പ്രദേശത്തെല്ലാം തെരച്ചില്‍ നടത്തി. തുടര്‍ന്ന് പച്ചക്കറി തോട്ടത്തിനു സമീപത്തു നിന്നും വയറ് വീര്‍ത്ത നിലയില്‍ പാമ്പിനെ കണ്ടെത്തി. പാമ്പ് ഈ സ്ത്രീയെ വിഴുങ്ങിയെന്ന സംശയത്തെ തുടര്‍ന്ന് പാമ്പിനെ കൊല്ലുകയായിരുന്നു. വെള്ളിയാഴ്ച പാമ്പിനെ കീറി മുറിച്ചതോടെയാണ് ശരീരം ലഭിച്ചത്.

നിറയെ പാറക്കൂട്ടങ്ങളും ഗുഹകളും ഉള്ള ഈ പ്രദേശം പാമ്പുകളുടെ താവളമാണ്. ആറ് മീറ്ററോളം നീളമുള്ള പെരുമ്പാമ്പുകള്‍ ഇന്തൊനേഷ്യയിലും ഫിലിപ്പീന്‍സിലും സര്‍വ്വസാധാരണമാണ്. പൊതുവെ ചെറു ജീവികളെ ഭക്ഷണമാക്കുന്ന ഇവ വളരെ വിരളമായാണ് മനുഷ്യരെ ആക്രമിക്കുന്നത്. കഴിഞ്ഞ വര്‍ഷം മേഖലയില്‍ ഒരാളെ പാമ്പ് ഭക്ഷണമാക്കിയിരുന്നു.