ക്രമസമാധാന പ്രശ്‌നങ്ങളൊന്നുമില്ലാത്ത, ലോകത്തെ ഏറ്റവും സുരക്ഷിതമായ രാജ്യം സിങ്കപ്പൂരാണെന്ന് പുതി. റിപ്പോര്‍ട്ടുകള്‍ പറയുന്നത്. ഗാലപ്പ് ഗ്ലോബല്‍ ലോ ആന്‍ഡ് ഓര്‍ഡര്‍ റിപ്പോര്‍ട്ടിലാണ് സിംഗപ്പൂരിന് ഒന്നാം സ്ഥാനം ലഭിച്ചിരിക്കുന്നത്. ലോകത്തെ 135 രാജ്യങ്ങളിലെ പൗരന്മാരെ നേരില്‍ക്കണ്ട്് അഭിമുഖം നടത്തി ആ രാജ്യത്തെ സ്ഥിതിഗതികള്‍ വിലയിരുത്തിയാണ് റിപ്പോര്‍ട്ട് തയ്യാറാക്കിയിരിക്കുന്നത്. ഈ പട്ടികയനുസരിച്ച് 29-ാം സ്ഥാനത്താണ് ഇന്ത്യ.

നൂറില്‍ 97 മാര്‍ക്കോടെയാണ് സിംഗപ്പൂര്‍ ഒന്നാമതെത്തിയത്. നോര്‍വേയും ഐസ്‌ലന്‍ഡും ഫിന്‍ലന്‍ഡും 93 മാര്‍ക്കോടെ തുടര്‍ന്നുള്ള സ്ഥാനങ്ങളിലെത്തി. ഉസ്‌ബെക്കിസ്താനും ഹോങ്‌കോങ്ങും 91 മാര്‍ക്ക് വീതം നേടി. സ്വിറ്റ്‌സര്‍ലന്റ്, കാനഡ എന്നീ രാജ്യങ്ങള്‍ 90 മാര്‍ക്കും നേടി. ഇന്‍ഡോനേഷ്യ (89), ഡെന്‍മാര്‍ക്ക് (88) എന്നിവയാണ് ആദ്യ പത്തുസ്ഥാനങ്ങളില്‍ വരുന്ന രാജ്യങ്ങള്‍.

ക്രമസമാധാനത്തില്‍ ഇന്ത്യയെക്കാള്‍ വളരെ മുന്നിലാണ് ചൈന. 14-ആണ് ചൈനയുടെ സ്ഥാനം. 85 മാര്‍ക്കുള്ള ഇന്ത്യ 29-ാം സ്ഥാനത്തും. ബ്രിട്ടന്‍ 21-ാം സ്ഥാനത്തുനില്‍ക്കുമ്പോള്‍ അമേരിക്ക 35-ാം സ്ഥാനത്താണ്. വെനസ്വേലയാണ് ലോകത്ത് ക്രമസമാധാനം ഏറ്റവും കുറഞ്ഞ രാജ്യം. 44 മാര്‍ക്കുമാത്രമുള്ള വെനസ്വേല 135-ാം സ്ഥാനത്തുനില്‍ക്കുണ്ട്. തൊട്ടടുത്ത് അഫ്ഗാനിസ്ഥാനുല്‍. 45 മാര്‍ക്കാണ് അഫ്ഗാനിസ്ഥാന് നേടാനായത്.

പലതരത്തിലുള്ള ചോദ്യങ്ങളിലൂടെയാണ് ഓരോ രാജ്യങ്ങളിലെയും ക്രമസമാധാനം കണക്കാക്കിയിട്ടുള്ളത്. രാത്രി തനിച്ച് സഞ്ചരിക്കുമ്പോള്‍ സുരക്ഷിതത്വം തോന്നാറുണ്ടോ, പോലീസില്‍ വിശ്വാസമുണ്ടോ, പണമോ വസ്തുവകകളോ അടുത്തിടെ മോഷണം പോയിട്ടുണ്ടോ കഴിഞ്ഞ ഒരുവര്‍ഷത്തിനിടെ നിങ്ങള്‍ ആക്രമിക്കപ്പെടുകയോ തട്ടിപ്പിനിരയാവുകയോ ചെയ്തിട്ടുണ്ടോ തുടങ്ങിയവയാണ് ചോദ്യങ്ങള്‍. ഓരോ ചോദ്യത്തിനും ലഭിച്ച മാര്‍ക്കിന്റെ അടിസ്ഥാനത്തിലാണ് പട്ടിക തയ്യാറാക്കിയിരിക്കുന്നത്.