പ്രളയംമൂലം സംസ്ഥാനത്തുണ്ടായ നാശനഷ്ടങ്ങള്‍ പ്രാഥമികരമായി വിലയിരുത്തിയതിലും അധികമാണെന്ന് മുഖ്യമന്ത്രി പിണറായി വിജയന്‍. കേരളത്തിന്റെ പുനര്‍നിര്‍മാണം എളുപ്പമുള്ള കാര്യമല്ല. എന്നാല്‍ നാം ഒന്നിച്ചുനിന്ന് അതിനെ നേരിടും. ഒന്നാംഘട്ട രക്ഷാപ്രവര്‍ത്തനം പൂര്‍ത്തിയായെന്നും ഇനിയുള്ളത് പുനരധിവാസവും പുനര്‍നിര്‍മാണവുമാണെന്ന് അദ്ദേഹം വാര്‍ത്താ സമ്മേളനത്തില്‍ പറഞ്ഞു.

പ്രവാസികള്‍ ഒരുമാസത്തെ ശമ്പളം ദുരിതാശ്വാസ പ്രവര്‍ത്തനങ്ങള്‍ക്കായി സംഭാവന ചെയ്യണമെന്നും. സമ്പന്നരുടെ ഭാഗത്തുനിന്ന് സഹകരണം ഉണ്ടാവണമെന്നും മുഖ്യമന്ത്രി അഭ്യര്‍ഥിച്ചു.

വീടുകളിലേക്ക് തിരിച്ചപോകുന്നവര്‍ ഇറങ്ങിവന്ന വീടിന്റെ അവസ്ഥയിലേക്കല്ല തിരിച്ചെത്തുന്നത്. ഒന്നുമില്ലാത്ത അവസ്ഥയാണ് ഇപ്പോള്‍. അവര്‍ക്ക് പ്രാഥമികമായി വേണ്ട സഹായങ്ങള്‍ പ്രാദേശികമായി സമാഹരിച്ച് നല്‍കുന്നകാര്യം കളക്ടര്‍മാരോട് നിര്‍ദ്ദേശിച്ചിട്ടുണ്ട്. വീടുകളിലേക്ക് മടങ്ങുന്നവര്‍ക്ക് ആദ്യഘട്ടത്തില്‍ 10,000 രൂപവീതം നല്‍കാനാണ് തീരുമാനം. അവധി ദിനങ്ങള്‍ കഴിഞ്ഞ് ബാങ്ക് തുറക്കുന്ന ദിവസംതന്നെ എല്ലാവര്‍ക്കും സാമ്പത്തിക സഹായം നല്‍കുന്നകാര്യം പരിഗണിക്കാന്‍ നിര്‍ദ്ദേശിച്ചിട്ടുണ്ട്.

ഗൃഹോപകരണങ്ങളും നിരവധി വാഹനങ്ങളും നശിച്ചു. ഇവയ്ക്ക് ഇന്‍ഷുറന്‍സ് പരിരക്ഷ അടക്കമുള്ളവ ലഭിക്കുന്നതിന് സാങ്കേതിക തടസങ്ങളുണ്ടാവരുത്. ഇന്‍ഷുറന്‍സ് കമ്പനികളുമായി ചീഫ് സെക്രട്ടറി ഇതുസംബന്ധിച്ച് വീണ്ടും ചര്‍ച്ച നടത്തും. എല്ലാ വീടുകളിലും ശുദ്ധമായ കുടിവെള്ളം ലഭ്യമാക്കും. ഇതിന് പ്രയാസം നേരിടുന്ന സ്ഥലങ്ങളില്‍ കിയോസ്‌കുകളും ജലശുദ്ധീകരണ പ്ലാന്റുകളും അടക്കമുള്ളവ സ്ഥാപിക്കുന്നകാര്യം പരിഗണനയിലുണ്ട്.

പോലീസ് ജനങ്ങളുടെ രക്ഷകരായി മാറിയ കാഴ്ചയാണ് പ്രളയത്തിനിടെ കാണാനായത്. ഏത് ദുരന്തത്തെയും അതിജീവിക്കാന്‍ നമ്മുടെ ഭരണയന്ത്രത്തിന് കഴിയുമെന്ന് തെളിയിക്കാന്‍ കളക്ടര്‍മാര്‍ അടക്കമുള്ള ഉദ്യോഗസ്ഥര്‍ക്ക് കഴിഞ്ഞുവെന്നും മുഖ്യമന്ത്രി പറഞ്ഞു. ഓഖി ദുരിതാശ്വാസ ഫണ്ടില്‍നിന്നും ഒരു ചില്ലിക്കാശുപോലും സര്‍ക്കാര്‍ വകമാറ്റി ചിലവഴിച്ചിട്ടില്ല. വിമര്‍ശം ഉന്നയിച്ചില്ലെങ്കില്‍ പ്രതിപക്ഷ നേതാവാകില്ലെന്നാണ് രമേശ് ചെന്നിത്തല കരുതുന്നതെന്നും മുഖ്യമന്ത്രി പറഞ്ഞു.