കഴിഞ്ഞ ദിവസങ്ങളില് കേരളം കണ്ടത് മൊത്തത്തില് ഒരു അസാധാരണമായ വാര്ത്തയായിരുന്നു അതായത് ഇതുവരെ കേരളത്തില് സംഭവിച്ചിട്ടില്ലാത്ത കാര്യങ്ങള്; ഇന്ത്യയില് ആദ്യമായി ഒരു ബിഷപ്പിന്റെ അറസ്റ്റിലേക്ക് കാര്യങ്ങളെത്തിച്ച സമരത്തിന് ഇന്നലെ ക്ലൈമാകസ് ആയപ്പോള് ഉണ്ടായതെല്ലാം അസാധാരണ സംഭവങ്ങള്
ഇന്ത്യയിലെ ക്രൈസ്തവസഭകളുടെ ചരിത്രത്തില് ആദ്യമാണ് ഒരു ബിഷപ്പ് പീഡനക്കേസില് അറസ്റ്റിലാകുന്നത്. അതും കന്യാസ്ത്രീയെ പീഡിപ്പിച്ചതിന്. സാധാരണഗതിയില് സഭയിലുണ്ടാകുന്ന തര്ക്കങ്ങളും കേസുകളും അതില്ത്തന്നെ ഒത്തുതീരാറുണ്ട്. ഇവിടെ അതും നടന്നില്ല. നീതി കിട്ടില്ലെന്ന് ഉറപ്പായപ്പോഴാണ് കന്യാസ്ത്രീകള് കേരള ക്രിസ്ത്യന് റിഫോര്മേഷന് മൂവ്മെന്റ്, ജോയിന്റ് ക്രിസ്ത്യന് കൗണ്സില് എന്നീ സംഘടനകളുടെ പിന്തുണയോടെ കൊച്ചിയില് പരസ്യമായ സമരമുഖം തുറന്നത്. പരാതിക്കാരിക്കൊപ്പമുള്ള അഞ്ച് കന്യാസ്ത്രീകള് അവിടെ നിരാഹാരം തുടങ്ങി. രാജ്യത്ത് ഇതാദ്യം. രാജ്യം മുഴുവനും ഇതിന്റെ അലയൊലികളുയര്ന്നു. വൈദികരും കന്യാസ്ത്രീകളും വരെ പിന്തുണയുമായെത്തി.
സമരത്തോട് മുഖ്യധാരാ രാഷ്ട്രീയപാര്ട്ടികള് പുലര്ത്തിയ സമീപനം അവരുടെ ഇരട്ടമുഖം വെളിപ്പെടുത്തി. ചെറിയ പ്രശ്നങ്ങള്ക്കുവേണ്ടിപോലും സമരം നടത്തുന്ന പാര്ട്ടികളുടെ നേതൃത്വം ആരെയോ ഭയന്നു. കര്ത്താവിന്റെ മണവാട്ടികളെ കണ്ടില്ലെന്നു നടിച്ചു.
ഒറ്റപ്പെട്ട ചില നേതാക്കള് മാത്രം പാര്ട്ടിയുടെ ചിന്താഗതികളെ മറികടന്നും കന്യാസ്ത്രീകളെ പിന്തുണച്ചു. സമരം കേരളത്തിന്റെ പൊതുസമൂഹം ഏറ്റെടുക്കുന്നതാണ് പിന്നെ കണ്ടത്. രാഷ്ട്രീയക്കാരുടെയും പേരും ആള്ബലവുമുള്ള സംഘടനകളുടെയും പിന്തുണയില്ലെങ്കിലും സമരം നടത്താമെന്ന് തെളിഞ്ഞു. കേരളത്തിലെ മാധ്യമങ്ങള് ഈ ജനകീയസമരത്തിന് നല്കിയ പിന്തുണയും ചരിത്രം. ജസ്റ്റിസ് കെമാല്പാഷയെപ്പോലുള്ളവര് സമരപ്പന്തലില് നേരിട്ടെത്തി ഊര്ജം പകര്ന്നു. സമാനമായ പരാതികള് ഉയരുമ്പോള് ഉചിതമായ നടപടിയെടുത്തില്ലെങ്കില് വലിയ അപമാനമാകുമെന്ന് വലിയ വിഭാഗം വിശ്വാസികള് കരുതുന്നു. ചുരുക്കം ചിലര് ചെയ്യുന്ന തെറ്റുകള്ക്കെതിരേ അപ്പോള്ത്തന്നെ നടപടി വേണമെന്നാണ് ഇവരുടെ ആവശ്യം. സഭാ ഭരണാധികാരികളില് ചിലര് നടത്തുന്ന പീഡനങ്ങളില് എന്ത് നടപടികള് വേണമെന്ന് ആലോചിക്കാന് ഫ്രാന്സിസ് മാര്പാപ്പ നടത്താന് പോകുന്ന യോഗം വലിയ മാറ്റങ്ങള്ക്ക് ഇടയാക്കുമെന്നാണ് ഇവരുടെ പ്രതീക്ഷ.
https://www.facebook.com/Malayalivartha
