ഫ്രാങ്കോയുടെ പുഞ്ചിരി കൊലച്ചിരിയാകുമ്പോള്‍... പരിഹാസത്തില്‍ തളരാതെ ജനങ്ങളെ പുച്ഛിച്ച് തള്ളി ബിഷപ്പ് ഫ്രാങ്കോ മുളയ്ക്കല്‍, ഇടയ്ക്ക് ബി.പി കൂടിയെങ്കിലും കളിയാക്കലില്‍ മനോനില തെറ്റാതെ ഫ്രാങ്കോ . ജനം കൂക്കിവിളിച്ചും പരിഹസിച്ചിട്ടും ബിഷപ് ഫ്രാങ്കോ മുളയ്ക്കല്‍ അക്ഷോഭ്യനായി ചെറുപുഞ്ചിരിയോടെയാണ് നിന്നത്. ഇന്നലെ ബിഷപ്പിനെ കാത്തിരുന്നത് പരിഹാസ വര്‍ഷമായിരുന്നു. വെള്ളിയാഴ്ച രാത്രി പത്തരയോടെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച ബിഷപ്പിനെ കാര്യമായ ആരോഗ്യപ്രശ്‌നങ്ങളില്ലെന്നു കണ്ടതിനെത്തുടര്‍ന്നു രാവിലെ ഒമ്പതോടെ പോലീസ് ക്ലബിലേക്കു മാറ്റി. വെള്ളിയാഴ്ച എത്തിയതിന്റെ ഇരട്ടിയിലധികമാളുകളാണ് ഇന്നലെ രാവിലെ മെഡിക്കല്‍ കോളജ് ആശുപത്രി കാര്‍ഡിയോളജി വിഭാഗത്തിനു മുന്നില്‍ തടിച്ചുകൂടിയത്. പിന്നീട് പോലീസ് ക്ലബിലെത്തിച്ച ബിഷപ് ഫ്രാങ്കോയെ കാണാന്‍ വന്‍ ജനാവലി തടിച്ചുകൂടിയിരുന്നു.

ഇവിടെയും അക്ഷോഭ്യനായി ഇറങ്ങിയ ബിഷപ്പിനെ പിന്നീട് വൈദ്യ പരിശോധനയ്ക്കായി ജനറല്‍ ആശുപത്രിയിലേക്കു കൊണ്ടുപോകുമെന്ന ശ്രുതി പരന്നു. ഇതോടെ, മാധ്യമപ്രവര്‍ത്തകരും ഒപ്പം കാഴ്ചക്കാരും ആശുപത്രി പരിസരത്തു തടിച്ചുകൂടി. എന്നാല്‍, ഇവരെയെല്ലാം കബളിപ്പിച്ചു പോലീസ് സംഘം പോലീസ് ക്ലബില്‍നിന്നു നേരെ തിരുവഞ്ചൂര്‍ അയര്‍ക്കുന്നം വഴി പാലായിലേക്കു പാഞ്ഞു. ഉച്ചയ്ക്ക് 1.15നു സംഘം ബിഷപ്പുമായി ചെത്തിമറ്റത്തെ കോടതിയിലെത്തി.

വാഹനമിറങ്ങിയ ബിഷപ്പിനെ കാത്തിരുന്നതു നിലയ്ക്കാത്ത കൂക്കുവിളി. ഇവര്‍ക്കിടയിലൂടെ ബിഷപ്പിനെ കോടതിയില്‍ ഹാജരാക്കി. പോലീസിന്റെ കസ്റ്റഡി അപേക്ഷയും ബിഷപ്പിന്റെ ജാമ്യാപേക്ഷയും പരിഗണിച്ച കോടതി വിധി പറയാന്‍ കേസ് 2.30 ലേക്കു മാറ്റിയെങ്കിലും മാധ്യമപ്രവര്‍ത്തകരും ജനങ്ങളും അവിടെത്തന്നെ തമ്പടിച്ചു. കൃത്യം രണ്ടരയ്ക്കു കോടതി നടപടി ആരംഭിച്ചു നിമിഷങ്ങള്‍ക്കുള്ളില്‍ ബിഷപ്പിനെ 48 മണിക്കൂര്‍ കസ്റ്റഡിയില്‍ വിട്ടുകൊണ്ടു മജിസ്‌ട്രേറ്റ് ലക്ഷ്മി ഉത്തരവിറക്കി. പത്തു മിനിറ്റ് കഴിഞ്ഞപ്പോള്‍ പോലീസ് വലയത്തില്‍ ബിഷപ്പിനെ കോടതിയില്‍നിന്നു പുറത്തിറക്കി. അദ്ദേഹത്തെ കാണാന്‍ നിന്നവര്‍ ഉടന്‍ ഓടിയടുത്തു. ഏറെ പണിപ്പെട്ടാണ് അദ്ദേഹത്തെ പോലീസ് വാഹനത്തില്‍ കയറ്റിയത്.

തിരികെ പോലീസ് ക്ലബിലേത്തിക്കുമെന്ന സൂചനയാണു പോലീസ് നല്‍കിയതെങ്കിലും കിടങ്ങൂരെത്തിയപ്പോള്‍ പെട്ടെന്നു റൂട്ട് മാറ്റി. വൈദ്യപരിശോധനകള്‍ക്കായി കോട്ടയം മെഡിക്കല്‍ കോളജ് ആശുപത്രിയില്‍ എത്തിച്ചു. വന്‍ ജനാവലി അപ്പോഴും മെഡിക്കല്‍ കോളജിനു മുന്നില്‍ തടിച്ചുകൂടിയിരുന്നു. ഒരു മണിക്കൂറോളം നീണ്ട പരിശോധനകള്‍ക്കൊടുവില്‍ പോലീസ് ക്ലബിലേക്കു ബിഷപ്പിനൊപ്പം പോലീസ് സംഘം മടങ്ങി.