കെഎസ്ആര്ടിസിയിലെ ഡ്യൂട്ടി പരിഷ്ക്കരണവും ഇന്ധനവില മൂലമുള്ള നിയന്ത്രണവും യാത്രക്കാര് പെരുവഴിയില്
കെ.എസ്.ആര്.ടി.സിയില് ഇന്ധന വിലവര്ധന മൂലമുള്ള നിയന്ത്രണവും സിംഗിള് ഡ്യൂട്ടി ക്രമീകരണ ഭാഗമായ സര്വിസ് വെട്ടിച്ചുരുക്കലും കാരണം യാത്രക്കാര് ദുരിതത്തില്. ബസിന് ദേശസാത്കൃത റൂട്ടുകളില് പോലും ഏറെ കാത്തുനില്ക്കേണ്ട അവസ്ഥയാണ്. വരുമാനമില്ലാത്ത ഷെഡ്യൂളുകള് നിയന്ത്രിക്കണമെന്ന നിര്ദേശം കൂടിയായതോടെ ഗ്രാമീണമേഖലയിലടക്കം യാത്രാക്ലേശം ഇരട്ടിയായി. ഓര്ഡിനറി സര്വിസുകള് പൂര്ണമായും സിംഗിള് ഡ്യൂട്ടിയിലേക്ക് മാറിയ ക്രമീകരണങ്ങളെത്തുടര്ന്ന് ലക്ഷം കിലോമീറ്റാണ് പ്രതിദിനം കുറച്ചത്.
തിരക്കുള്ള സമയങ്ങളില് മാത്രം സര്വിസും ആളില്ലാത്ത സമയങ്ങളില് ബസ് നിര്ത്തിയിട്ടുമാണ് പുതിയ ഷെഡ്യൂള്. നിര്ത്തിയിടുന്ന സമയം ഡ്യൂട്ടിയായി പരിഗണിക്കില്ല. ശേഷിക്കുന്ന സമയം അടിസ്ഥാനപ്പെടുത്തിയാണ് സെപ്റ്റംബര് ഒമ്പത് മുതല് എട്ടുമണിക്കൂര് സിംഗിള് ഡ്യൂട്ടി കണക്കാക്കുന്നത്. ഇതോടെ ദിനേന 17 ലക്ഷം കിലോമീറ്റര് എന്നത് 16 ലക്ഷമായി. ബസുകള് പൂര്ണമായി റദ്ദാക്കാതെയും അതേസമയം എല്ലാ ട്രിപ്പുകളും ഓടിക്കാതെയുമാണ് യാത്രക്കാരെ പെരുവഴിയില് നിര്ത്തുന്നത്.
സ്വകാര്യബസുകളുള്ള സ്ഥലങ്ങളില് ഇത് വലിയ പ്രശ്നം സൃഷ്ടിക്കില്ലെങ്കിലും ദേശസാത്കൃത റൂട്ടുകളില് ജനം വലിയ ബുദ്ധിമുട്ടാണ് അനുഭവിക്കുന്നത്. 4700 മുതല് 5000 വരെ ബസുകള് ഉപയോഗിച്ചാണ് നേരത്തെ 17 ലക്ഷം കിലോമീറ്റര് സര്വിസ് നടത്തിയിരുന്നത്. എന്നാല് ബസ് എണ്ണം കുറച്ചെങ്കിലും പ്രതിദിനം ശരാശരി 6.4 കോടി വരുമാനം ലഭിക്കുന്നുണ്ടെന്നാണ് അധികൃതരുടെ വിശദീകരണം.
https://www.facebook.com/Malayalivartha
