കൊട്ടാരക്കരയിൽ ക്ലാസ്സിൽ സംസാരിച്ചുവെന്നാരോപിച്ച് പ്രിന്‍സിപ്പാള്‍ അഞ്ചാം ക്ലാസുകാരന്റെ തല അടിച്ചു പൊട്ടിച്ചതായി പരാതി. കലയപുരം സെന്റ് തെരേസാസ് യുപി സ്‌കൂളിലായിരുന്നു ഇത്തരത്തിലൊരു സംഭവം അരങ്ങേറിയത്. ജനിച്ചപ്പോഴേ ബധിരരും മൂകരുമായ ദമ്പതികളായ ഏറത്തു കുളക്കട മൂര്‍ത്തി വിള വീട്ടില്‍ രതീഷിന്റേയും ലേഖയുടെയും മൂത്ത മകനായ അഖിലേഷ് (11) നാണു ഇത്തരത്തിലൊരു ദുരനുഭവം ഉണ്ടായത്.

വിദ്യാർത്ഥികൾ ബഹളം വയ്ക്കുന്നത് ശ്രദ്ധയിൽപ്പെട്ട് ക്ലാസ്സിലേക്കെത്തിയ പ്രിന്‍സിപ്പാള്‍ സിസ്റ്റര്‍ ജോബിന്‍ തന്റെ കൈയ്യിലിരുന്ന മൊബൈല്‍ ഫോണ്‍ കൊണ്ട് കുട്ടിയുടെ തലയില്‍ ശക്തിയായി അടിയ്ക്കുകയായിരുന്നു. അടിയുടെ ആഘാതത്തില്‍ കുട്ടിയുടെ തലപൊട്ടി ചോരയൊഴുകി. എന്നാൽ കാര്യങ്ങൾ സ്കൂളിൽ വച്ച് തന്നെ ഒത്തുതീർപ്പാക്കി കുട്ടിയെ വീട്ടിലേയ്ക്ക് അയച്ചുവെങ്കിലും കുട്ടി മാതാപിതാക്കളോട് കാര്യങ്ങൾ തുറന്നു പറയുകയായിരുന്നു.

ജനരോഷം എതിരാവും എന്നു കണ്ടു ഭയന്ന പ്രിന്‍സിപ്പല്‍ സിസ്റ്റര്‍ സ്‌കൂള്‍ പിടിഎ യുമായി വന്നു കുട്ടിയുടെ വീട്ടില്‍ വന്നു മാപ്പു പറഞ്ഞു. കുട്ടി ഇപ്പോള്‍ കൊട്ടാരക്കര ഗവ. ആശുപത്രിയില്‍ ചികില്‍സയിലാണ്. അതേസമയം പ്രിന്‍സിപ്പല്‍ സിസ്റ്ററുടെ നടപടിയില്‍ പ്രതിഷേധിച്ച്‌ നിയമ നടപടിയുമായി മുന്നോട്ട് പോകാനാണ് മാതാപിതാക്കളുടെ തീരുമാനം.