പൊതു വിദ്യാഭ്യാസ ഡയറക്ടറായ കെവി മോഹന്‍കുമാര്‍ കുമാറിന് വയലാര്‍ അവാര്‍ഡ്. ഉഷ്ണരാശിയെന്ന നോവലിനാണ് കെവി മോഹന്‍കുമാറിന് 42ാം വയലാര്‍ അവാര്‍ഡ് ലഭിച്ചത്. ആറു നോവലുകളും നാലു കഥാ സമാഹാരങ്ങളുമുള്‍പ്പെടെ പതിനഞ്ചോളം പുസ്തകങ്ങളും മോഹന്‍കുമാര്‍ എഴുതിയിട്ടുണ്ട്.

സ്വാതന്ത്ര്യത്തിനു മുന്‍പുളള കേരളത്തിന്റെ രാഷ്ട്രീയ, സാമൂഹിക, സാമ്ബത്തിക അവസ്ഥകളും ചൂഷണത്തിന്റെയും അതിനെതിരെയുള്ള പോരാട്ടത്തിന്റെയും കഥകളാണ് നോവലിന്റെ ഉളളടക്കത്തിലുളളത്. പുന്നപ്ര വയലാര്‍ സമരത്തിന്റെ പശ്ചാത്തലത്തില്‍ എഴുതപ്പെട്ട ഈ നോവലില്‍ ചരിത്രവും ഫിക്ഷനും ഉണ്ട്. ഒരു ലക്ഷം രൂപയും പ്രശസ്തി പത്രവും ഫലകവും അടങ്ങുന്നതാണ് അവാര്‍ഡ്. വയലാര്‍ രാമവര്‍മ്മയുടെ ചരമദിനമായ ഒക്ടോബര്‍ 27ന് തിരുവനന്തപുരം നിശാഗന്ധി ഓഡിറ്റോറിയത്തില്‍ നടക്കുന്ന ചടങ്ങില്‍ വെച്ചാണ് പുരസ്‌കാരം നല്‍കുക.

2010 ല്‍ ശിവന്‍ സംവിധാനം ചെയ്ത 'കേശു' എന്ന സിനിമയ്ക്കു തിരക്കഥയെഴുതിയത് ഇദ്ദേഹമായിരുന്നു. അതോടൊപ്പം ആദ്യ നോവലായ 'ശ്രാദ്ധശേഷം' 'മഴനീര്‍ത്തുള്ളികള്‍' എന്ന പേരില്‍ സിനിമയായിട്ടുണ്ട്. പത്രപ്രവര്‍ത്തനത്തില്‍ നിന്നാണ് സര്‍ക്കാര്‍ സര്‍വീസിലെത്തിയത്. പാലക്കാട്ടും കോഴിക്കോട്ടും കലക്ടറായിരുന്നു.