സാഹസിക പോരാട്ടത്തിനൊടുവിൽ വട്ടിപ്പലിശക്കാരൻ മഹാരാജയെ ചുരുട്ടികൂട്ടി കേരളാ പോലീസ്; കോടികളുടെ പണമിടപാട് കേസില് പോലീസിന്റെ നോട്ടപ്പുള്ളിയായിരുന്ന തമിഴ്നാട് ഡോണിനെ കേരളാപോലീസ് പിടിച്ചുകെട്ടിയത് എട്ടുമണിക്കൂറോളം നീണ്ട സാഹസിക പോരാട്ടങ്ങൾക്കൊടുവിൽ
കേരള പോലീസിന്റെ കൈയ്യില് നിന്ന് വഴുതിപ്പോയ ഗുണ്ടാനേതാവായ മഹാരാജായ്ക്ക് ഇത്തവണ പോലീസിന്റെ കൈയ്യില് നിന്ന് രക്ഷപ്പെടാനായില്ല. കോടികളുടെ പണമിടപാട് കേസില് പോലീസ് അന്വേഷിച്ചിരുന്ന തമിഴ്നാട്ടിലെ ഗുണ്ടാനേതാവായിരുന്നു മഹാരാജ മഹാഗോവിന്ദന് . എട്ടു മണിക്കൂറോളം നീണ്ട സാഹസികനീക്കത്തിലൂടെയാണ് മഹാരാജയെ ഇക്കുറി കേരളത്തിലെത്തിക്കാന് പോലീസിനു കഴിഞ്ഞത്.
മഹാരാജ കേരളത്തിന്റെ വിവിധ ഭാഗങ്ങളില് വമ്പന്മാര്ക്കു കോടികള് കൊള്ളപ്പലിശയ്ക്കു നല്കിയിരുന്നയാളാണ്. എറണാകുളം സ്വദേശിയുടെ പരാതിപ്രകാരം പോലീസ് നടത്തിയ അന്വേഷണത്തില്, 500 കോടിയോളം രൂപയുടെ ഇടപാടുകള് ഇയാള് നടത്തിയിരുന്നതായി വിവരം ലഭിച്ചു. തുടര്ന്ന്, അന്വേഷണമാരംഭിച്ചതോടെ ഇയാള് തമിഴ്നാട്ടിലേക്കു മുങ്ങി. മാസങ്ങളായി ഇയാളെ തെരയുകയായിരുന്ന പോലീസ് മലയാളികള് ഉള്പ്പെടെയുള്ള കൂട്ടാളികളെ കസ്റ്റഡിയിലെടുത്തിരുന്നു. ചെന്നൈയില് മഹാരാജയുടെ ഒളിസങ്കേതത്തിലെത്തി പലതവണ പിടികൂടാന് ശ്രമിച്ചെങ്കിലും നടന്നില്ല.
ഒന്നരമാസം മുമ്പ് കോയമ്പത്തൂരില്നിന്നു പിടികൂടിയപ്പോഴാകട്ടെ ടോള് ഗേറ്റിനു സമീപം പോലീസ് വാഹനം തടഞ്ഞ ഗുണ്ടാസംഘം ഇയാളെ രക്ഷപ്പെടുത്തി. ഈ സംഭവം കേരളാ പോലീസിനു വന്നാണക്കേടായിരുന്നു. കോയമ്പത്തൂര് സംഭവത്തിനുശേഷമാണു കേരളത്തില് ഇയാള് ബന്ധപ്പെടുന്ന ആളുകളെ കേന്ദ്രീകരിച്ച് പോലീസ് പ്രത്യേകദൗത്യം ആരംഭിച്ചത്. തുടര്ന്ന്, കഴിഞ്ഞ 25ന് പള്ളുരുത്തി സി.ഐ: കെ.ടി. അനീഷിന്റെ നേതൃത്വത്തില് എട്ടംഗസംഘം ചെന്നൈയിലെത്തി. വിരുതംപാക്കത്തുള്ള വീട്ടില് ഇയാള് എത്താറുള്ളതായി ചെന്നൈയിലെ പോലീസ് ചാരന്മാര് അറിയിച്ചിരുന്നു. തുടര്ന്ന്, മൂന്നുദിവസമായി ഈ വീട് പോലീസ് നിരീക്ഷണത്തിലായിരുന്നു.
ഇന്നലെ ഉച്ചയ്ക്കു പന്ത്രണ്ടോടെ വീടിനു പുറത്തിറങ്ങിയ മഹാരാജ ജങ്ഷനിലേക്കു നടന്നുപോകവേ ചായക്കട ഉള്പ്പെടെയുള്ള സ്ഥലങ്ങളില് വേഷംമാറി നിലയുറപ്പിച്ചിരുന്ന പോലീസ് ഇയാളെ ബലമായി വാഹനത്തില് കയറ്റി. കുതറിയ മഹാരാജ ബഹളം വച്ചതോടെ ആളുകള് ഓടിക്കൂടി. വീട്ടില്നിന്നു ഭാര്യയും മക്കളുമെത്തി സംരക്ഷണം തീര്ത്തു. ഇതിനിടെ സ്ഥലത്തെത്തിയ മഹാരാജയുടെ സഹോദരങ്ങള് ആയുധങ്ങളുമായി ആക്രമിക്കാന് ശ്രമിച്ചപ്പോള് പോലീസ് ആകാശത്തേക്കു വെടിയുതിര്ത്തു. ആളുകള് ചിതറിയോടിയെങ്കിലും വീണ്ടും സംഘടിച്ചെത്തി. തുടര്ന്നു മഹാരാജയെ വിരുതംപാക്കം പോലീസ് സ്റ്റേഷനിലെത്തിച്ചു.
കേരളത്തില്നിന്നു ഡി.ജി.പി. ഉള്പ്പെടെ ബന്ധപ്പെട്ടതോടെ തമിഴ്നാട് പോലീസ് കൂടുതല് സുരക്ഷയൊരുക്കി. റോഡ് യാത്ര സുരക്ഷിതമല്ലാത്തതിനാല് വിമാനത്തില് കൊണ്ടുപോകാന് തീരുമാനിച്ചു. വിമാനത്താവളംവരെ പോലീസ് വാഹനത്തെ മഹാരാജയുടെ ഗുണ്ടകള് പിന്തുടര്ന്നു. രാത്രി ഒമ്പതരയോടെയാണു പോലീസിനു സുരക്ഷിതമായി വിമാനത്താവളത്തിലെത്താന് കഴിഞ്ഞത്.
ഇന്നലെ പുലര്ച്ചെ കോഴിക്കോട് വിമാനത്താവളത്തിലെത്തിച്ച മഹാരാജയെ അവിടെനിന്നു റോഡ് മാര്ഗം കൊച്ചിയിലെത്തിച്ചു. കൊച്ചിയിലെ കമ്മീഷണര് ഓഫീസിലെത്തിച്ച് മഹാരാജയെ ചോദ്യം ചെയ്യും. 500 കോടിയുടെ പലിശ ഇടപാട് ഇയാള്ക്കുണ്ടെന്നാണ് പോലീസ് നിഗമനം കോയമ്പത്തൂര് സംഭവത്തിനുശേഷമാണു കേരളത്തില് ഇയാള് ബന്ധപ്പെടുന്ന ആളുകളെ കേന്ദ്രീകരിച്ച് പോലീസ് പ്രത്യേകദൗത്യം ആരംഭിച്ചതും ഇപ്പോള് പിടിയിലായതും.
https://www.facebook.com/Malayalivartha
