ശബരിമലയില്‍ യുവതികളായ സ്ത്രീകള്‍ക്ക് നിയന്ത്രണം ഏര്‍പ്പെടുത്തിയ സുപ്രീംകോടതി വിധി പുശ്ചിച്ചു തള്ളുമെന്ന് പന്തളം കൊട്ടാരം നിര്‍വാഹക സമിതി അംഗം ശശി വര്‍മ. വിധിയോട് ഒരു ശതമാനം പോലും യോജിക്കാനാവില്ല. സ്ത്രീകള്‍ക്ക് പ്രവേശനമില്ലെന്നും ലിംഗവിവേചനം ഉണ്ടെന്നുമുള്ള ചര്‍ച്ചകള്‍ അപ്രസക്തമാണെന്നും അദ്ദേഹം വാര്‍ത്താസമ്മേളനത്തില്‍ അറിയിച്ചു.

സ്ത്രീകള്‍ക്ക് ശബരിമലയില്‍ പ്രവേശിക്കുന്നതിന് തടസമില്ല. യുവതികള്‍ക്ക് പ്രവേശനമില്ലെന്നതിനെ സ്ത്രീകള്‍ എന്നാക്കി. ഇത് ദുഷ്ടചിന്തയുടെ ഭാഗമാണ്. ലിംഗനീതി വാദത്തില്‍ അര്‍ത്ഥമില്ല. സുപ്രീംകോടതി ജഡ്ജിക്ക് ഇതേക്കുറിച്ച് അറിയില്ല. പറയുന്നത് ന്യായമല്ല. എതിര്‍ഭാഗം പറയാന്‍ ചുമതലപ്പെടുത്തിയ വക്കീലന്‍മാര്‍ കാര്യങ്ങള്‍ വ്യക്തമായി പറയാന്‍ ശ്രമിച്ചിട്ടും കേള്‍ക്കാന്‍ കോടതി തയ്യാറായില്ല. 411 പേജുള്ള വിധി പരിശോധിച്ചാല്‍ വാദികള്‍ മുന്നോട്ട് വെച്ച കാര്യങ്ങളൊന്നും ഇല്ലെന്നും അദ്ദേഹം പറഞ്ഞു.

മുന്‍കൂട്ടി എടുത്ത തീരുമാനം നടപ്പാക്കിയ ശ്രമം പോലെയാണെന്ന് തോന്നിപ്പിക്കുന്ന രീതിയിലുള്ള വിധിയാണിത്. വനിതാ ജഡ്ജിയായ ഇന്ദു മല്‍ഹോത്ര കാര്യങ്ങള്‍ മനസിലാക്കിയാണ് വിധിപ്രസ്താവിച്ചതെന്നും ശശി വര്‍മ വ്യക്തമാക്കി. സ്ത്രീപ്രവേശനം ശബരിമല വിഷയമല്ല. ഇന്ത്യയിലെ ഹൈന്ദവ ജനങ്ങള്‍ക്ക് വര്‍ഷങ്ങളായി ആചാരക്രമമുണ്ട്. അത് നടപ്പിലാക്കാന്‍ ഭക്തര്‍ ബാധ്യസ്ഥരാണ്. അല്ലാതെ സുപ്രീംകോടതി അല്ല നടപ്പാക്കേണ്ടത്. ക്ഷേത്രങ്ങളില്‍ ചെരിപ്പിച്ച് കേറണോ എന്ന് തീരുമാനിക്കേണ്ടത് സുപ്രീംകോടതിയാണോ? ഇത് കടയ്ക്കല്‍ കത്തിവെയ്ക്കുന്ന തീരുമാനമാണ്. ആചാരങ്ങള്‍ സാമൂഹ്യവിരുദ്ധമാണെങ്കില്‍ മാറ്റാം. മാളികപ്പുറമായിട്ടുള്ളവരുടെ വോട്ടെടുത്ത് നോക്കൂ അവരില്‍ ഭൂരിപക്ഷവും ഈ തീരുമാനത്തെ അനുകൂലിക്കില്ല. മാറ്റം നടപ്പാക്കുമ്പോള്‍ ഹൈന്ദവ നേതൃത്വത്തിന്റെ വികാരം കൂടി നോക്കണമെന്നും ശശിവര്‍മ അഭിപ്രായപ്പെട്ടു.