ഇരയെ അധിക്ഷേപിച്ച കേസില്‍ പി.സി. ക്കെതിരായ നീക്കം തിടുക്കത്തില്‍ വേണ്ടെന്ന് പോലീസ്. ഇന്നലെ തന്റെ വസതിയിലെത്തിയവരോട് പി.സി. പിന്നെയും മൂപ്പിച്ചു. എന്നെ പൊക്കാന്‍ ഇങ്ങോട്ടു വരട്ടെ, അതിത്തിരി പുളിക്കും. പേട്ടയിലെ പിള്ളാരെ അറിയാഞ്ഞിട്ടാ. കന്യാസ്ത്രീയെ ആക്ഷേപിച്ച കേസില്‍ ഫാദര്‍ ഏര്‍ത്തയിലിനും, മറ്റൊരു വൈദികനുമെതിരെ ക്രൈംബ്രാഞ്ച് നീക്കം ശക്തമാകുമ്പോഴും പി.സി.ക്കെതിരായ അന്വേഷണം കേസില്‍ തടസ്സങ്ങളുണ്ടാക്കുമെന്നാണ് പോലീസ് ഉന്നതരുടെ വിലയിരുത്തല്‍. പി.സി. യെ ചൊറിഞ്ഞ് വായിലിരിക്കുന്ന സരസ്വതി വിളമ്പി എല്‍.ഡി.എഫിനു നാണക്കേടുണ്ടാക്കണ്ടായെന്ന് മാക്‌സിസ്റ്റ് പാര്‍ട്ടിയും കരുതുന്നു.

കേസുമായി മുന്നോട്ടു പോയാല്‍ കന്യാസ്ത്രീ, ദില്ലിയില്‍ താമസമാക്കിയ ഒരു വ്യക്തിയുമായുണ്ടായ വിവാദങ്ങളുടെ കൂടുതല്‍ വിവരങ്ങള്‍ പുറത്തുവിടുമെന്നും, ഫ്രാങ്കോ നിരപരാധിയാണെന്ന കാര്യത്തിലുറച്ച് പോലീസ് കള്ളക്കേസിനെതിരെ പൊതുപ്രക്ഷോഭങ്ങളിലേക്ക് കടക്കുമെന്നും പി.സി. പറയുന്നു. ആകെ വല്ലാത്ത അവസ്ഥയിലാണ് സര്‍ക്കാരും പോലീസും.

ഫ്രാങ്കോ മുളയ്ക്കലിനെ ജയിലില്‍ സന്ദര്‍ശിച്ച് ഒരു മണിക്കൂറോളം ചര്‍ച്ച നടത്തി തിരിച്ചിറങ്ങിയ പിസിയുടെ വാക്കുകൾ കന്യാസ്ത്രീക്കെതിരെ തുറന്നപോരിലേക്കെന്ന സൂചനകൾ നൽകുന്ന തരത്തിലുള്ളവയായിരുന്നു. നിരപരാധിയായ വൈദികനെയാണ് ജയിലിലടച്ചിരിക്കുന്നതെന്ന് നൂറു ശതമാനം ബോധ്യമുളളതിനാലാണ് ഫ്രാങ്കോയെ സന്ദർശിച്ചതെന്ന് പിസി പറഞ്ഞിരുന്നു. ജാമ്യം കിട്ടിയില്ലെങ്കില്‍ ഇനിയും വരുമെന്നും തനിക്ക് ഇക്കാര്യത്തില്‍ ആരെയും പേടിയില്ലെന്നും, താന്‍ സത്യത്തിന്റെ ഭാഗത്ത് നില്‍ക്കുമെന്നും. നിരപരാധിയെ ജയിലിലടച്ചതിനുള്ള ദൈവശിക്ഷ ഇടുത്തീ പോലെ വന്നുവീഴുമെന്നും പിസി വ്യക്തമാക്കിയിരുന്നു. താന്‍ ബിഷപ്പിന്റെ കൈ മുത്ത് വണങ്ങിയെന്നും പി.സി. ജോര്‍ജ് പറഞ്ഞു.

മാധ്യമപ്രവര്‍ത്തകര്‍ക്ക് ആളെ പിടിച്ച് ജയിലിലടയ്ക്കണമെന്നേയുള്ളൂവെന്നും അദ്ദേഹം വിമര്‍ശിച്ചു. വൈവാഹിക ജീവിതം വേണമെന്ന് ജനറാളമ്മയ്ക്ക് കത്തുകൊടുത്ത കന്യാസ്ത്രീയാണ് ഫ്രാങ്കോ പിതാവിനെതിരേ ബലാത്സംഗത്തിന് കേസു കൊടുത്തിരിക്കുന്നതെന്ന് കന്യാസ്ത്രീക്കെതിരെ പിസി ജോർജ് ആരോപിച്ചിരിക്കുകയാണ്. തെളിവുകൾക്കായി പോലീസ് നെട്ടോട്ടമോടുന്നതിനിടയിലാണ് കന്യാസ്ത്രീക്കെതിരെ പിസി ജോർജ് നിശിതമായ ആരോപണമുന്നയിച്ച് തുറന്ന പോരിന് ഇറങ്ങിയിരിക്കുന്നത്. പി.സി.ക്കെതിരായ അന്വേഷണം കേസില്‍ തടസ്സങ്ങളുണ്ടാക്കുമെന്നാണ് പോലീസ് ഉന്നതരുടെ വിലയിരുത്തല്‍.അജ് വല്ലാത്തൊരവസ്ഥയിലാണ് പോലീസും, സർക്കാരും ഇപ്പോൾ.