മനിതി സംഘത്തിന് പിന്നാലെ അടുത്ത പുലിവാലുമായി എത്തിയ ദളിത് നേതാവ് അമ്മിണിയും സംഘവും തോറ്റ് മടങ്ങാന്‍ തീരുമാനിച്ചു. പമ്പയിലും പരിസരത്തും ഭക്തജനങ്ങള്‍ സൃഷ്ടിച്ച പ്രതിഷേധത്തെ തുടര്‍ന്നാണ് തീരുമാനം മാറ്റിയതെന്ന് അമ്മിണി അറിയിച്ചു. പൊലീസ് സംരക്ഷണം നല്‍കണമെന്ന് പറഞ്ഞ അമ്മിണിയെ എരുമേലി പൊലീസ് സ്റ്റേഷനില്‍ എത്തിച്ചു. ശേഷം പമ്പയിലെ സംഘര്‍ഷാവസ്ഥയുടെ ചാനല്‍ ദൃശ്യങ്ങള്‍ കാണിച്ചതോടെ അമ്മിണിയുടെ ബോധം പോയെന്നാണ് പൊലീസുകാര്‍ പറയുന്നത്. തുടര്‍ന്ന് പിന്‍വാങ്ങാന്‍ സ്വയം തീരുമാനിക്കുകയായിരുന്നു.

പൊലീസ് സംഘം അമ്മിണിയുമായി നിലയ്ക്കലിലേക്ക് തിരിച്ചെങ്കിലും പ്രതിഷേധം ഭയന്ന് തിരിച്ച് കൊണ്ടുവരുകയായിരുന്നു. കോട്ടയത്ത് നിന്ന് പൊന്‍കുന്നംവഴിയാണ് അമ്മിണി രാവിലെ എരുമേലിയില്‍ എത്തിയത്. എല്ലായിടത്തും ഭക്തര്‍ തമ്പടിച്ചിട്ടുണ്ടായിരുന്നു. ഭക്തര്‍ പ്രതിഷേധിച്ച് തന്റെ യാത്ര തസപ്പെടുത്തിയാല്‍ പമ്പയില്‍ നിരാഹാരമിരിക്കുമെന്ന നിലപാടിലായിരുന്നു അമ്മിണി. പമ്പയിലെ ഭക്തരുടെ പ്രതിഷേധവും മനിതി പ്രവര്‍ത്തകരുടെ ഓട്ടവും കണ്ട് ഭയന്ന, മലയായി വന്ന അമ്മിണി എലിയായി മടങ്ങുകയായിരുന്നു.

മനിതി സംഘത്തിന്റെയോ, തൃപ്ത് ദേശായിയുടേത് പോലെയോ അല്ലായിരുന്നു അമ്മിണിയുടെ ദര്‍ശന യാത്ര. ആരേയും അറിയിക്കാതെ സാധാരണ ഭക്തയെ പോലെയാണ് അവര്‍ യാത്ര തിരിച്ചത്. തടസപ്പെടുത്താനോ ക്രമസമാധാന പ്രശ്‌നമോ ഉണ്ടായാല്‍ തടയേണ്ടത് പൊലീസാണെന്ന നിലപാടിലായിരുന്നു അവര്‍. എന്നാല്‍ജീവന് തന്നെ ഭീഷണിയാകുമെന്ന് ഭയന്ന് അമ്മിണി പൊലീസിനോട് തന്നെ എങ്ങനെയും ഇവിടെ നിന്ന് മാറ്റണമെന്ന് അഭ്യര്‍ത്ഥിച്ചു. കാരണം എരുമേലി പൊലീസ് സ്റ്റേഷന് ചുറ്റും ആര്‍.എസ്.എസ്- ബി.ജെ.പി പ്രവര്‍ത്തകരും ശബരിമല കര്‍മസമിതി പ്രവര്‍ത്തകരും തമ്പടിച്ചിരുന്നു.

ദര്‍ശനത്തിനായി മലകയറാനും വഴിപാടുകള്‍ കഴിച്ച് തിരിച്ചിറങ്ങാനുമുള്ള സംവിധാനം സര്‍ക്കാര്‍ ഉണ്ടാക്കണം. കോടതി വിധിയില്‍ അത് വ്യക്തമാക്കുന്നുണ്ട്. അയല്‍ സംസ്ഥാനങ്ങളില്‍ നിന്നുള്ളവരും ദര്‍ശനത്തിനായി വരുന്നുണ്ട് അവരെ കാത്തതിനാലാണ് ദര്‍ശനത്തിനെത്തിയാല്‍ വൈകുന്നതെന്നും അമ്മിണി പറഞ്ഞു. മുമ്പ് ദളിത് ആക്ടിവിസ്റ്റും അധ്യാപികയുമായ തങ്കം ശബരിമല ദര്‍ശനത്തിനെത്തിയപ്പോള്‍ അവരുടെ വീട് അടിച്ചുതകര്‍ത്തിരുന്നു. പഠിപ്പിച്ചിരുന്ന സ്‌കൂളിലും പ്രശ്‌നങ്ങളുണ്ടായി. തങ്കം ക്ലാസെടുക്കാന്‍ എത്തിയപ്പോള്‍ കുട്ടികള്‍ ശരണം വിളിച്ചിരുന്നു.