മതിയായ സുരക്ഷ നല്‍കാമെന്ന് ഉറപ്പ് നല്‍കിയ ശേഷം ശബരിമല ദര്‍ശനത്തിനെത്തിയവരെ പൊലീസ് തന്നെ മടക്കിയയച്ചു. പമ്പയില്‍ പൊലീസ് വീണ്ടും തോറ്റോടുന്ന കാഴ്ചയാണ് ഇന്ന് പമ്പയില്‍ കണ്ടത്. പൊലീസിന്റെ നിര്‍ബന്ധപ്രകാരമാണ് തങ്ങള്‍ പിന്‍മാറുന്നതെന്ന് മനിതി സംഘത്തിന്റെ നേതാവ് സെല്‍വി മാധ്യമങ്ങളോട് പറഞ്ഞു. ഇക്കാര്യം സുരക്ഷ നല്‍കാനാവില്ലെന്ന് പൊലീസില്‍ നിന്ന് അവര്‍ എഴുതി വാങ്ങിയെന്നും അറിയുന്നു. എന്നാല്‍ തങ്ങള്‍ സുരക്ഷ നല്‍കാമെന്ന് ഉറപ്പ് നല്‍കിയിരുന്നെന്നും അവര്‍ പിന്‍മാറിയെന്നുമാണ് പത്തനംതിട്ട എസ്.പി അറിയിച്ചത്. മനിതി പ്രവര്‍ത്തകരെ അവരുടെ വാനില്‍ പൊലീസ് പമ്പയില്‍ നിന്ന് മടക്കി അയച്ചു. മടങ്ങും മുമ്പാണ് മാധ്യമങ്ങളോട് സെല്‍വി പ്രതികരിച്ചത്. 

രാവിലെ മൂന്ന് മണി മുതല്‍ തുടങ്ങിയ പ്രതിഷേധം 12.30തോടെ അവസാനിച്ചു. എന്നാല്‍ തങ്ങള്‍ സുരക്ഷ നല്‍കാമെന്ന് എസ്.പി കാര്‍ത്തികേയന്‍ ആവര്‍ത്തിച്ചു. അവര്‍ മടങ്ങിവന്നാലും സുരക്ഷ ഒരുക്കുമെന്നും അദ്ദേഹം ആവര്‍ത്തിച്ചു. അവര്‍ പോകണമെന്ന് ആവശ്യപ്പെട്ടതിനാലാണ് പൊലീസ് വാഹനത്തില്‍ തന്നെ അവരെ മടക്കിയത്. അതിന് പിന്നാലെ ഞങ്ങള്‍ ഇനിയും തിരിച്ച് വരുമെന്നും തങ്ങള്‍ക്ക് നീതി നിഷേധിച്ചെന്നും സെല്‍വി പറഞ്ഞു. പത്ത് മണിക്കൂര്‍ നീണ്ട സംഘര്‍ഷം അയഞ്ഞതോടെ പമ്പയും പരിസരവും ശാന്തമായി. ആദ്യം കോട്ടയത്ത് ട്രെയിനിറങ്ങി എരുമേലി വഴി വരുമെന്നാണ് ആദ്യം പറഞ്ഞിരുന്നത്. എന്നാല്‍ മധുരവഴി ഇവര്‍ ടെമ്പോട്രാവലറില്‍ പൊലീസ് അകമ്പടിയില്‍ കേരളത്തിലെത്തുകയായിരുന്നു.

അവിടെ നിന്ന് ബി.ജെ.പിക്കാരുടെയും കര്‍മസമിതി പ്രവര്‍ത്തകരുടെയും പ്രതിഷേധം പലയിടങ്ങളിലും ഉണ്ടായിരുന്നെങ്കിലും അതിനെയെല്ലാം മറികടന്നാണ് പൊലീസ് ഇവരെ പമ്പയിലെത്തിച്ചത്. പമ്പയില്‍ നിന്ന് 100 മീറ്ററോളം സന്നിധാനത്തേക്ക് പോയെങ്കിലും ഭക്തരുടെ പ്രതിഷേധത്തെ തുടര്‍ന്ന് അവരെ തിരിച്ചിറക്കുകയായിരുന്നു. മതിനി കോഓഡിനേറ്റര്‍ സുശീലയും നേതാവ് സെല്‍വിയും അടങ്ങുന്ന 11 പേരാണ് തമിഴ്‌നാട്ടില്‍ നിന്ന് ദര്‍ശനത്തിനെത്തിയത്.