ക്രിസ്ത്യന്‍ ഇടവക പള്ളികളിലെ ഭരണ തര്‍ക്കങ്ങള്‍ തീര്‍പ്പാക്കാന്‍ സര്‍ക്കാര്‍ പ്രത്യേക ട്രിബ്യൂണല്‍ രൂപീകരിക്കുന്നതിനെ കുറിച്ച് ആലോചിക്കുന്നു. പരാതികളില്‍ വേഗം തീര്‍പ്പുണ്ടാക്കുന്നതിനുള്ള സംവിധാനമാണു സര്‍ക്കാര്‍ ഉദ്ദേശിക്കുന്നത്. പള്ളികളിലെ ഭരണ തര്‍ക്കങ്ങള്‍ സംഘര്‍ഷത്തിലേക്കു നീങ്ങുന്ന പശ്ചാത്തലത്തിലാണ് ഇത്തരമൊരു നീക്കം.

ട്രിബ്യൂണലിന്റെ ഘടനയും ചുമതലയും അധികാരവും ഉള്‍പ്പെടുന്ന കരട് ബില്‍ തയാറാക്കുന്നതിനു ഭരണ പരിഷ്‌കരണ കമ്മിഷനോട് സര്‍ക്കാര്‍ നിര്‍ദേശിച്ചു. വൈകാതെ ഓര്‍ഡിനന്‍സ് കൊണ്ടുവരാനാണു നീക്കം. നിലവില്‍  ക്രൈസ്തവ സഭകളെ നിയന്ത്രിക്കാന്‍ കഴിയുന്ന സ്വതന്ത്ര ജുഡീഷ്യല്‍ ബോഡിയില്ല.

കേരളത്തിലെ ക്രൈസ്തവ ദേവാലയങ്ങളെല്ലാം പൊതു ട്രസ്റ്റിന്റെ പരിധിയില്‍ വരുന്നതിനാല്‍ സര്‍ക്കാരിന് ഇടപെടാന്‍ കഴിയുമെന്നാണ് നിയമോപദേശം ലഭിച്ചിരിക്കുന്നത്. നിലവില്‍ പള്ളി തര്‍ക്കങ്ങള്‍ പരിഗണിക്കുന്നത് സിവില്‍ കോടതികളാണ്. പള്ളി തര്‍ക്കങ്ങളില്‍ പലപ്പോഴും വിശ്വാസ വിഷയങ്ങള്‍കൂടി കലര്‍ന്നിരിക്കുന്നതിനാല്‍ സിവില്‍ കോടതിയുടെ തീര്‍പ്പുകള്‍ പ്രശ്‌നം പരിഹരിക്കാന്‍ ഫലപ്രദമാകുന്നില്ല. തന്മൂലം തര്‍ക്കം പരിഹാരമാകാതെ തുടരുകയാണ്.

ട്രിബ്യൂണലിന് ഭരണകാര്യങ്ങളിലെ തര്‍ക്കത്തോടൊപ്പം വിശ്വാസ വിഷയങ്ങളിലും കടന്നുചെല്ലാന്‍ കഴിയുംവിധമുള്ള ഘടന ഉണ്ടായിരിക്കും. റിട്ട. ഹൈക്കോടതി ജഡ്ജി അധ്യക്ഷനും ഈ രംഗത്തു വിദഗ്ധരായിട്ടുള്ളവര്‍ അംഗങ്ങളുമായിട്ടുള്ള ബോഡിയായിരിക്കും ട്രിബ്യൂണല്‍. നിലവില്‍ സംസ്ഥാനത്ത് നിരവധി പള്ളികേസുകളാണ് കോടതികളില്‍ കെട്ടികിടക്കുന്നത്.

മലങ്കര സഭാ തര്‍ക്കം പരിഗണിക്കുന്നതിനു ഒരു അഡീ. ജില്ലാകോടതി കൊച്ചിയിലുണ്ടെങ്കിലും(പള്ളി കോടതി) മറ്റു സഭകളുടെ കേസുകള്‍ ഇവിടെ പരിഗണിക്കുന്നില്ല. എന്നാല്‍ ഇവിടെയും കേസുകളുടെ ബാഹുല്യം മൂലം തീര്‍പ്പ് അനന്തമായി നീളുകയാണ്. എന്നാല്‍ കേരളത്തിലെ എല്ലാ സഭകളിലെയും ഭരണതര്‍ക്കങ്ങളും ട്രിബ്യൂണല്‍ കൈകാര്യം ചെയ്യും. സന്യാസ മഠങ്ങളുടെ ഭരണതര്‍ക്കങ്ങള്‍ ട്രിബ്യൂണലിനു കീഴില്‍ കൊണ്ടുവരുന്നതും പരിഗണനയിലുണ്ട്.

ദേവസ്വം ക്ഷേത്രങ്ങളുടെ കേസുകള്‍ കേള്‍ക്കുന്നതിന് ദേവസ്വം ഓംബുഡ്‌സ്മാനും വഖഫ് ബോര്‍ഡ് തര്‍ക്കങ്ങള്‍ കേള്‍ക്കുന്നതിന് പ്രത്യേക ട്രിബ്യൂണലും നിലവിലുണ്ട്. ക്രൈസ്തവ സഭകളുടെ മേല്‍ നിയന്ത്രണം കൊണ്ടുവരുന്നതിലൂടെ ശബരിമല വിഷയത്തില്‍ സര്‍ക്കാര്‍ സ്വീകരിച്ച നിലപാടിനെ എതിര്‍ക്കുന്നവരുടെ അതൃപ്തി മറികടക്കാന്‍ കഴിയുമെന്നാണ് സര്‍ക്കാരിന്റെ വിശ്വാസം.