കൊല്ലത്തിന്റെ ചിരകാല സ്വപ്‌നമായ ബൈപ്പാസ് ഉദ്ഘാടനത്തിനൊരുങ്ങുമ്പോള്‍ അതിനു പിന്നില്‍ നടക്കുന്ന രാഷ്ട്രീയ കളികളാണ് ഏറെ ചര്‍ച്ചയാകുന്നത്. സംസ്ഥാന സര്‍ക്കാരും കേന്ദ്രവും കൊല്ലം ബൈപ്പാസിന്റെ അവകാശത്തെ ചൊല്ലി പിടിവലി തുടങ്ങിയിട്ട് നാളുകളായി. ഇത്രയും നാള്‍ ബൈപ്പാസിനെക്കുറിച്ച് മിണ്ടാതിരുന്നവര്‍ പോലും ബൈപ്പാസ് യാഥാര്‍ത്ഥ്യമായതിന്റെ അവകാശം തങ്ങള്‍ക്കാണെന്ന് പറഞ്ഞ് രംഗത്തെത്തിയിട്ടുണ്ട്. എന്നാല്‍ അവകാശവാദവുമായി മുന്നില്‍ നില്‍ക്കുന്നത് കേരളത്തിന്റെ എല്‍ഡിഎഫ് ഗവണ്‍മെന്റും കേന്ദ്രം ഭരിക്കുന്ന ബിജെപിയുമാണ്. കൊല്ലം എംഎല്‍എ പ്രേമചന്ദ്രന്‍ പോലും ഈ പിടിവലിക്കിടെ അപ്രത്യക്ഷനാകുന്ന കാഴ്ച. കൊല്ലം ബൈപ്പാസ് ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിക്കാനിരിക്കുകയായിരുന്നു. എന്നാല്‍ പിന്നീട് കാര്യങ്ങള്‍ മാറിമറിഞ്ഞു, കേരളത്തില്‍ കിടക്കുന്ന ബൈപ്പാസ്് ഉദ്ഘാടനം ചെയ്യാന്‍ സാക്ഷാല്‍ പ്രഖാനമന്ത്രി നരേന്ദ്ര മോദി തന്നെ എത്തും. മോദിക്കും ബൈപ്പാസില്‍ കണ്ണുണ്ടെന്നതിന് മറ്റു തെളിവുകള്‍ വേണ്ട. കണ്ണൂര്‍ വിമാനത്താവളം പോലും മുഖ്യമന്ത്രി ഉദ്ഘാടനം ചെയ്തപ്പോള്‍ ബൈപ്പാസ് മോദി കൊണ്ടുപോയി. പക്ഷേ ഇവിടെയും വിട്ടുകൊടുക്കാന്‍ കേരളത്തിന്റെ മുഖ്യമന്ത്രി തയ്യാറായിട്ടില്ല. ഇതു സംബന്ധിച്ച് പിണറായിയുടെ ഫെയ്‌സ്ബുക്ക് പോസ്റ്റാണ് ഇപ്പോള്‍ വൈറലാകുന്നത്. 

പിണറായിയുടെ കുറിപ്പ്:


'കൊല്ലം ജനതയുടെ ചിരകാല അഭിലാഷം പൂവണിയുന്നു. കൊല്ലം ബൈപാസ് ചൊവ്വാഴ്ച നാടിന് സമര്‍പ്പിക്കുന്നു. കൊല്ലം ബൈപാസ് പൂര്‍ത്തിയാക്കുമെന്ന വാഗ്ദാനമാണ് സര്‍ക്കാര്‍ ആയിരം ദിനം പൂര്‍ത്തിയാകുന്ന ഘട്ടത്തില്‍ പാലിക്കുന്നത്.

ഇഴഞ്ഞു നീങ്ങിയിരുന്ന ഒരു പദ്ധതിക്ക് ജീവന്‍ നല്‍കി വേഗതയില്‍ പൂര്‍ത്തിയാക്കാനായി എന്ന അഭിമാനത്തോടെയാണ് സര്‍ക്കാരും പൊതുമരാമത്ത് വകുപ്പും കൊല്ലം ബൈപ്പാസ് ഉദ്ഘാടനത്തിലേക്ക് കടക്കുന്നത് . 2016 മെയ് 31 വരെ 23.52 ശതമാനം ജോലിയാണ് പൂര്‍ത്തിയാക്കിയിരുന്നത്. രണ്ടര വര്‍ഷത്തിനകം 76 ശതമാനം ജോലികളും പൂര്‍ത്തിയാക്കാനായി. ഫൗണ്ടേഷനുകളിലായിരുന്ന 3 പാലങ്ങളും ആയിരം ദിവസത്തിനുള്ളില്‍ പൂര്‍ണ്ണ സജ്ജമാക്കി. 46 പിയറുകളില്‍ 37 എണ്ണവും പണിതത് ഈ സര്‍ക്കാരിന്റെ കാലത്താണ്. വന്‍ പ്രളയത്തിനിടയിലാണ് ഈ പ്രവൃത്തികള്‍ മാന്ദ്യമേതുമില്ലാതെ പൂര്‍ത്തീകരിച്ചത്.

352 കോടി രൂപ ചെലവ് പ്രതീക്ഷിച്ച ബൈപാസിന് 176 കോടി രൂപ വീതം കേന്ദ്രവും സംസ്ഥാനവും നല്‍കണം. ഫണ്ട് അനുവദിക്കുന്നതിലും കാലതാമസമില്ലാതെ സര്‍ക്കാര്‍ തീരുമാനമെടുത്തു. 2016 മെയ് 31 വരെ 34 കോടി രൂപയാണ് പദ്ധതിക്കു വേണ്ടി സംസ്ഥാനം ചെലവഴിച്ചിരുന്നത്. അതിനു ശേഷം സര്‍ക്കാര്‍ ഇതുവരെ 80 കോടിയോളം രൂപ അനുവദിച്ചിട്ടുണ്ട്. ബാക്കിയുള്ള തുക അന്തിമ ബില്ലിനൊപ്പം നല്‍കും.

കൊല്ലം നഗരത്തിലെ ഗതാഗതക്കുരുക്ക് പരിഹരിക്കാനും ദീര്‍ഘദൂര യാത്രക്കാര്‍ക്ക് തടസങ്ങളില്ലാതെ യാത്ര സാധ്യമാക്കാനും ലക്ഷ്യമിട്ടുള്ളതാണ് കൊല്ലം ബൈപാസ് . 13 കിലോമീറ്റര്‍ ദൈര്‍ഘ്യമുള്ള ബൈപാസ് സംസ്ഥാനത്തെ പൊതുഗതാഗത സംവിധാനത്തെ കൂടി ശക്തിപ്പെടുത്തും'