കേരള ഒളിംപിക് അസോസിയേഷന്റെ നിയന്ത്രണം സിപിഎം-ന്റെ കൈകളിലെത്തി. ഏറെ വിവാദമായ തിരഞ്ഞെടുപ്പില്‍ സംസ്ഥാന സര്‍ക്കാരിന്റെ പിന്തുണയോടെ മല്‍സരിച്ച പാനല്‍ വിജയിച്ചു. ഇരുപത് വര്‍ഷങ്ങള്‍ക്കുശേഷമാണ് കേരള ഒളിംപിക് അസോസിയേഷനില്‍ വിപുലമായ തിരഞ്ഞെടുപ്പ് നടക്കുന്നത്.

കേരള ഒളിംപിക് അസോസിയേഷന്‍ തിരഞ്ഞെടുപ്പ് കായികകേരളത്തിന്റെ ശ്രദ്ധയാകര്‍ഷിച്ചത് ഭരണം പിടിക്കാന്‍ അരയും തലയും മുറുക്കി സിപിഎം രംഗത്തിറങ്ങിയതോടെയാണ്. നിലവിലെ ഭരണസമിതിയുടെ കാലാവധി 2017-ല്‍ അവസാനിച്ചിട്ടും നിശ്ചിതസമയത്ത് തിരഞ്ഞെടുപ്പ് നടത്താത്തതിനാല്‍ കേരള ഒളിംപിക് അസോസിയേഷനെ ഐഓഎ പിരിച്ചുവിട്ടിരുന്നു.

രാഷ്ട്രീയ ഇടപെടല്‍ ഒഴിവാക്കാനെന്ന പേരില്‍ തിരഞ്ഞെടുപ്പ് ഡല്‍ഹിയിലേക്ക് മാറ്റാന്‍ നീക്കം നടന്നെങ്കിലും ഹൈക്കോടതി ഇടപെട്ട് തടഞ്ഞു. അനിശ്ചിതത്വങ്ങള്‍ക്കൊടുവില്‍ സംസ്ഥാന സര്‍ക്കാരിന്റെ പിന്തുണയോടെ മല്‍സരിച്ച പാനലും ഇന്ത്യന്‍ ഒളിംപിക് അസോസിയേഷന്റെ പിന്തുണയുള്ള പാനലും കൊച്ചിയില്‍ നടന്ന തിരഞ്ഞെടുപ്പില്‍ നേര്‍ക്കുനേര്‍ ഏറ്റുമുട്ടുകയായിരുന്നു.

കേരള ഹോക്കിയുടെ വി.സുനില്‍കുമാര്‍ പ്രസിഡന്റായും, അക്വാട്ടിക് അസോസിയേഷന്റെ എസ്.രാജീവ് സെക്രട്ടറിയായും സ്‌പോര്‍ട്‌സ് കൗണ്‍സില്‍ ഭരണസമിതി അംഗം എം.ആര്‍.രഞ്ജിത് ട്രഷററായും തിരഞ്ഞെടുക്കപ്പെട്ടു.നാല്‍പതിലേറെ വോട്ടുകളുടെ ഭൂരിപക്ഷത്തിലാണ് സുനില്‍ കുമാര്‍ തിരഞ്ഞെടുക്കപ്പെട്ടത്. കേരളത്തിലെ 29 കായിക സംഘടനകളെ പ്രതിനിധീകരിച്ച് 80 പേരാണ് വോട്ടെടുപ്പില്‍ പങ്കെടുത്തത്.