കരിമണല്‍ ഖനന വിഷയത്തില്‍ സര്‍ക്കാരിനും ഖനനം നടത്തുന്ന ഐ.ആര്‍.ഇക്കും (ഇന്ത്യന്‍ റെയര്‍ എര്‍ത്‌സ് ലിമിറ്റഡ്) ഹൈക്കോടതി നോട്ടീസയച്ചു. ഖനനവും പാരിസ്ഥിതിക ിഷയങ്ങളും സംബന്ധിച്ച് അന്വേഷണ റിപ്പോര്‍ട്ട് നല്‍കിയ നിയമസഭാസമിതി ചെയര്‍മാന്‍ മുല്ലക്കര രത്‌നാകരനും നോട്ടീസ് അയച്ചിട്ടുണ്ട്. കരിമണല്‍ ഖനനത്തെത്തുടര്‍ന്ന് ആലപ്പാട് പഞ്ചായത്ത് കടലെടുത്തു പോകുന്ന സ്ഥിതിയാണെന്നും സുരക്ഷ നടപടി സ്വീകരിക്കണമെന്നും ആവശ്യപ്പെട്ട് ആലപ്പാട് സ്വദേശി കെ.എം. ഹുസൈനാണ് ഹരജി നല്‍കിയത്.
ഖനനം തടയണമെന്ന് ആവശ്യപ്പെടുന്ന ഹരജി കോടതി ഫയലില്‍ സ്വീകരിച്ചു. കേസ് ഒരാഴ്ചക്ക് ശേഷം കോടതി പരിഗണിക്കും. 89.5 ചതുരശ്ര കിലോമീറ്റര്‍ വിസ്തീര്‍ണമുണ്ടായിരുന്ന ആലപ്പാട് പഞ്ചായത്തിന്റെ വിസ്തൃതി ഭയാനകമാംവിധം കുറഞ്ഞതായി ഹരജിയില്‍ പറയുന്നു. 10,000 കുടുംബങ്ങള്‍ താമസിച്ചിരുന്ന പഞ്ചായത്തില്‍ ഇപ്പോള്‍ 5000 കുടുംബങ്ങള്‍ മാത്രമാണുള്ളത്. ഐ.ആര്‍.ഇയുടെ ഖനനം നിമിത്തം ദിവസം കഴിയുന്തോറും പഞ്ചായത്ത് കടലെടുത്തു പോവുകയാണ്. മത്സ്യബന്ധനം നടത്തി ജീവിക്കുന്ന ആലപ്പാടുകാര്‍ക്ക് ഖനനം നിമിത്തം ഇതിനും കഴിയാത്ത സ്ഥിതിയാണ്. പല സമരങ്ങള്‍ക്കും പ്രതിഷേധങ്ങള്‍ക്കുമൊടുവില്‍ അന്വേഷണം നടത്തി റിപ്പോര്‍ട്ട് നല്‍കാന്‍ മുല്ലക്കര രത്‌നാകരന്‍ ചെയര്‍മാനായ കമ്മിറ്റിയെ നിയോഗിച്ചിരുന്നു.
കഴിഞ്ഞ ഫെബ്രുവരി രണ്ടിന് കമ്മിറ്റി റിപ്പോര്‍ട്ട് നിയമസഭയില്‍ വെച്ചു. ആലപ്പാടിനെ കടലെടുത്തു പോകാതെ സംരക്ഷിക്കാന്‍ പല നിര്‍ദേശങ്ങളും റിപ്പോര്‍ട്ടിലുണ്ടെങ്കിലും ഒന്നും നടപ്പാക്കിയിട്ടില്ല. അനുവദനീയമായ പരിധി കഴിയുന്നതോടെ ഖനനം നിര്‍ത്താനും ഒരു കിലോമീറ്റര്‍ നീളത്തില്‍ പുലിമുട്ട് നിര്‍മിക്കാനും റിപ്പോര്‍ട്ടില്‍ ശിപാര്‍ശയുണ്ട്. റിപ്പോര്‍ട്ടില്‍ സ്വീകരിച്ച നടപടികള്‍ വ്യക്തമാക്കാനും നിര്‍ദേശങ്ങള്‍ സമയബന്ധിതമായി നടപ്പാക്കാനും സര്‍ക്കാറിനോട് ഉത്തരവിടുക, ഖനനം നിര്‍ത്തിവെക്കാന്‍ ഐ.ആര്‍.ഇയോട് നിര്‍ദേശിക്കുക തുടങ്ങിയ ആവശ്യങ്ങളും ഹര്‍ജിയിലുണ്ട്.