താലൂക്ക് സപ്ലൈ ഓഫിസുകളില്‍ കെട്ടിക്കിടക്കുന്ന 24,286 റേഷന്‍ കാര്‍ഡുകള്‍ ഭക്ഷ്യ പൊതുവിതരണവകുപ്പ് ഇന്ന് റദ്ദാക്കും. കാര്‍ഡുകള്‍ കൈപ്പറ്റണമെന്നാവശ്യപ്പെട്ട് നിരവധി അറിയിപ്പുകള്‍ നല്‍കിയിട്ടും ഉടമകളാരും എത്താത്ത സാഹചര്യത്തിലാണ് 80 താലൂക്ക് സപ്ലൈ ഓഫിസുകളില്‍ കെട്ടിക്കിടക്കുന്ന കാര്‍ഡുകള്‍ റദ്ദാക്കാന്‍ ഭക്ഷ്യവകുപ്പ് തീരുമാനിച്ചത്. 2211 അന്ത്യോദയ അന്നയോജന (മഞ്ഞ) കാര്‍ഡുകളും 8742 മുന്‍ഗണന (പിങ്ക്) കാര്‍ഡും 7429 പൊതുവിഭാഗം സബ്‌സിഡി (നീല) കാര്‍ഡും 5904 പൊതുവിഭാഗം (വെള്ള)കാര്‍ഡുകളുമാണ് ബുധനാഴ്ച റദ്ദാക്കുന്നത്. അന്ത്യോദയ, മുന്‍ഗണന കാര്‍ഡുകള്‍ റദ്ദാക്കപ്പെടുന്നതോടെ നിലവിലെ മുന്‍ഗണന പട്ടികയില്‍ ഉള്‍പ്പെട്ടിട്ടുള്ള 10,952 പേര്‍ പുറത്താകും. ഇവര്‍ക്ക് പകരമായി പതിനായിരത്തോളം പേരെ പട്ടികയില്‍ ഉള്‍പ്പെടുത്താനാണ് തീരുമാനം.

തൃശൂര്‍ ജില്ലയിലാണ് കൂടുതല്‍ റേഷന്‍ കാര്‍ഡുകള്‍ റദ്ദാക്കുന്നത് 4172. തൊട്ടുപിന്നില്‍ തിരുവനന്തപുരമാണ് 3425 കാര്‍ഡുകള്‍. ഏറ്റവും കുറവ് വയനാട് 275. തൃശൂര്‍ താലൂക്ക് സപ്ലൈ ഓഫിസിലാണ് കൂടുതല്‍ കാര്‍ഡുകള്‍ അനാഥമായി കിടക്കുന്നത് 1203. കഴിഞ്ഞമാസം കേന്ദ്ര ഭക്ഷ്യഭദ്രത നിയപ്രകാരം സൗജന്യ റേഷന് അര്‍ഹതയില്ലെന്ന് കണ്ടെത്തിയ 3.16 ലക്ഷം പേരെ പൊതുവിതരണ വകുപ്പ് അന്ത്യോദയ, മുന്‍ഗണനവിഭാഗത്തില്‍നിന്ന് ഒഴിവാക്കിയിരുന്നു. ഒഴിവാക്കിയവര്‍ക്ക് പകരം അര്‍ഹരായ 3.16 ലക്ഷംപേരെ പട്ടികയില്‍ ഉള്‍പ്പെടുത്തുന്ന നടപടികള്‍ നാഷനല്‍ ഇന്‍ഫര്‍മാറ്റിക് സന്റെറിന്റെ സഹായത്തോടെ പുരോഗമിക്കുകയാണ്. ഇത് പൂര്‍ത്തിയാകുന്ന മുറക്കായിരിക്കും റേഷന്‍കാര്‍ഡ് കൈപ്പറ്റാത്തതിനാല്‍ പുറത്തായവര്‍ക്ക് പകരമായി വരുന്നവരെ ഉള്‍പ്പെടുത്തുക.

അര്‍ഹരായ അമ്പതിനായിരത്തോളം കുടുംബങ്ങള്‍ ഇനിയും മുന്‍ഗണനപട്ടിക ഉള്‍പ്പെടാന്‍ ബാക്കിയുണ്ടെന്നാണ് ഭക്ഷ്യവകുപ്പിന്റെ അനൗദ്യോഗിക കണക്കുകള്‍. ഇവരെ ഉള്‍പ്പെടുത്താനായി തുടര്‍ച്ചയായി റേഷന്‍ വാങ്ങാത്തവരുടെ കണക്കുകള്‍ പൊതുവിതരണവകുപ്പ് ശേഖരിച്ച് വരികയാണ്.