തെരഞ്ഞെടുപ്പില്‍ ഏറ്റവുമധികം ശ്രദ്ധനേടിയ താരങ്ങളിലൊരാളാണ് കെ. സുരേന്ദ്രന്‍. ശബരിമല പ്രക്ഷോഭത്തോടെ വന്‍ ഇമേജുണ്ടാക്കിയ സുരേന്ദ്രനെതന്നെ പത്തനംതിട്ടയില്‍ സ്ഥാനാര്‍ത്ഥിയാക്കുകയും ചെയ്തു. കറുത്ത വേഷമണിഞ്ഞ് സ്വാമിയെപ്പോലെയാണ് വോട്ട് തെടിയത്. അതെല്ലാം ശബരിമലക്കാലം ഓര്‍മ്മിപ്പിക്കുകയും ചെയ്തു. എന്നാല്‍ തെരഞ്ഞെടുപ്പ് കഴിഞ്ഞതോടെ സുരേന്ദ്രന്‍ കറുപ്പ് വേഷം മാറ്റി. ആഷ് കളര്‍ ഷര്‍ട്ടിട്ടാണ് സുരേന്ദ്രന്‍ കഴിഞ്ഞ ദിവസം മാധ്യമങ്ങളെ കണ്ടത്. അതേസമയം സിപിഎമ്മിനെതിരേയും മുഖ്യമന്ത്രി പിണറായി വിജയനെതിരെ ആഞ്ഞടിക്കുകയാണ് ചെയ്തത്. 

സിപിഎം സമ്പൂര്‍ണ നാശത്തിലേക്ക് പോകുന്നതായി സുരേന്ദ്രന്‍ പറഞ്ഞു. ഇതിന് കാരണക്കാരന്‍ മുഖ്യമന്ത്രി പിണറായി വിജയനാണ്. ബിജെപി വോട്ടുകള്‍ എവിടെ പോയി എന്ന് സിപിഎമ്മിന് ആശങ്ക വേണ്ട. ഫലം വരുമ്പോള്‍ സ്വന്തം വോട്ട് എവിടെ പോയെന്ന് സിപിഎം പറയേണ്ടി വരും. 

ബിജെപിയെ സംബന്ധിച്ചിടത്തോളം പഴയ വോട്ടുകള്‍ നില്‍ക്കുക മാത്രമല്ല, മുമ്പത്തേക്കാളും വലിയ മുന്നേറ്റം നടത്തും. പക്ഷെ വോട്ടെണ്ണി കഴിയുമ്പോള്‍ സിപിഎമ്മിന്റെ കഴിഞ്ഞ തവണ കിട്ടിയ വോട്ടുകളൊക്കെ എവിടെ പോയെന്ന് പിണറായി വിജയനും കോടിയേരി ബാലകൃഷ്ണനും വ്യക്തമാക്കുകയാണ് വേണ്ടതെന്ന് സുരേന്ദ്രന്‍ പറഞ്ഞു. 

ന്യൂനപക്ഷങ്ങളുടെ വോട്ടും ഇത്തവണ ബിജെപിക്ക് ലഭിക്കും. വോട്ടിംഗ് ശതമാനം ഒമ്പത് ശതമാനത്തിലധികം ഉയര്‍ന്നു. ഒരു മണ്ഡലത്തിലും അത്ര ഉയര്‍ന്നിട്ടില്ലല്ലോ. വിശ്വാസികള്‍ അത്യാവേശത്തോടെ വന്ന് വോട്ടു ചെയ്തു. അതിനാലാണ് വോട്ടിംഗ് ശതമാനം ഉയര്‍ന്നത്. ന്യൂനപക്ഷങ്ങളുടെ വോട്ട് ഞങ്ങല്‍ക്ക് കിട്ടില്ലെന്ന് നിങ്ങളെങ്ങനെയാ പറയുക എന്ന് സുരേന്ദ്രന്‍ ചോദിച്ചു. ന്യൂനപക്ഷങ്ങളുടെ വോട്ടും ഇത്തവണ ബിജെപിക്ക് കിട്ടുമെന്ന് സുരേന്ദ്രന്‍ ആവര്‍ത്തിച്ചു.


അതേസമയം പത്തനംതിട്ട മണ്ഡലത്തില്‍ വോട്ടിംഗ് ശതമാനത്തിലുണ്ടായ വന്‍ വര്‍ദ്ധന ഏതു മുന്നണിക്ക് ഗുണം ചെയ്യുമെന്ന ചര്‍ച്ചകള്‍ സീജവമായി. 2014നേക്കാള്‍ 8.17 ശതമാനത്തിന്റെ വര്‍ദ്ധനയാണ് ഇത്തവണയുണ്ടായത്. 

ബൂത്ത് തലങ്ങളിലെ വോട്ടിംഗിന്റെ കണക്കുവച്ച് എല്‍.ഡി.എഫും യു.ഡി.എഫും എന്‍.ഡി.യും വിലയിരുത്തല്‍ തുടങ്ങി. വോട്ടിംഗ് ശതമാനം വര്‍ദ്ധിച്ചത് പ്രതീക്ഷയായാണ് മൂന്നു മുന്നണികളും കരുതുന്നത്. ന്യൂനപക്ഷ സ്വാധീനമുളള മണ്ഡലങ്ങളിലും ഹിന്ദു ഭൂരിപക്ഷ മണ്ഡലങ്ങളിലും വോട്ടിംഗ് ശതമാനം വന്‍ തോതില്‍ ഉയര്‍ന്നിട്ടുണ്ട്. പൂഞ്ഞാറില്‍ കഴിഞ്ഞ തവണത്തേക്കാള്‍ 12.04 ശതമാനത്തിന്റെ വോട്ടു വര്‍ദ്ധനയാണ് രേഖപ്പെടുത്തിയത്. കാഞ്ഞിരപ്പളളി മണ്ഡലത്തിലാണ് ഉയര്‍ന്ന പോളിംഗ് . 77.96 ശതമാനം.എല്ലാ നിയമസഭാ മണ്ഡലങ്ങളിലും പോളിംഗ് എഴുപത് ശതമാനത്തിനു മുകളിലെത്തി. ഇത്തവണ തുടക്കം മുതല്‍ തന്നെ കനത്ത പോളിംഗുണ്ടായത് ശ്രദ്ധേയമാണ്. 

ശബരിമല വിഷയവും പ്രളയവും പ്രധാന തിരഞ്ഞെടുപ്പ് വിഷയങ്ങളായി മാറിയ മണ്ഡലത്തില്‍ അടിയൊഴുക്കുകള്‍ അടിത്തട്ടില്‍ വരെ നടന്നുവെന്ന് വ്യക്തമാണ്. ഗ്രാമ പ്രദേശങ്ങളില്‍ രാവിലെ ഏഴിന് പോളിംഗ് തുടങ്ങിയപ്പോള്‍ മുതല്‍ തന്നെ സ്ത്രീകളുടെയടക്കം നിര രൂപപ്പെട്ടിരുന്നു. പരമാവധിയാളുകളെ വോട്ടു ചെയ്യിക്കാന്‍ മൂന്നു മുന്നണികളും അവസാന നിമിഷം വരെ സീജവമായി പ്രവര്‍ത്തിച്ചതും വോട്ടിംഗ് നില ഉയരാന്‍ കാരണമായി.കേന്ദ്ര, സംസ്ഥാന സര്‍ക്കാരുകള്‍ക്കെതിരായ വികാരം തിരഞ്ഞെടുപ്പില്‍ പ്രതിഫലിച്ചതിന്റെ ലക്ഷണമാണ് പോളിംഗ് ശതമാനം ഉയര്‍ന്നതെന്ന് യു.ഡി.എഫ് വിലയിരുത്തുന്നു. എന്നാല്‍, എല്‍.ഡി.എഫ് സര്‍ക്കാരിന്റെ ജനക്ഷേമ പ്രവര്‍ത്തനങ്ങള്‍ ജനങ്ങള്‍ അംഗീകരിച്ചതിന്റെ പ്രതിഫലനമാണ് വോട്ടിംഗ് ശതമാനത്തില്‍ കണ്ടതെന്നും ചരിത്ര വിജയം നേടുമെന്നും എല്‍.ഡി.എഫ് അവകാശപ്പെടുന്നു. 

വിശ്വാസികളെ വേദനിപ്പിച്ച പിണറായി സര്‍ക്കാരിനോടുള്ള അമര്‍ഷവും മോദിസര്‍ക്കാരിന്റെ വികസന പ്രവര്‍ത്തനങ്ങള്‍ക്കുളള അംഗീകാരവും വോട്ടായി മാറുമെന്നും തങ്ങള്‍ വലിയ ഭൂരിപക്ഷത്തില്‍ വിജയിക്കുമെന്ന് എന്‍.ഡി.എയും അവകാശപ്പെട്ടു. കെ.സുരേന്ദ്രന്‍ 27,000 വോട്ടിന്റെ ഭൂരിപക്ഷത്തിന് വിജയിക്കുമെന്നാണ് എന്‍.ഡി.എ കണക്ക് കൂട്ടുന്നത്. കാഞ്ഞിരപ്പള്ളി, ആറന്മുള്ള നിയമസഭാ മണ്ഡലങ്ങളിലാണ് കൂടുതല്‍ മുന്നേറ്റമുണ്ടാക്കാനാവുക. സുരേന്ദ്രന്റെ വിജയം ശബരിമല വിഷയത്തില്‍ സംസ്ഥാന സര്‍ക്കാരിനെതിരായ വിധിയെഴുത്താകുമെന്നും വിലയിരുത്തുന്നു.