കണ്ണൂര് ജില്ലാ ജയിലില് ഉദ്യോഗസ്ഥര്ക്ക് ചായയില് മയക്കുമരുന്ന് കലര്ത്തി ഉറക്കിയശേഷം ജയില് ചാടാന് ശ്രമിച്ച മൂന്നു പേര് പിടിയില്
കണ്ണൂര് ജില്ലാ ജയിലില് ഉദ്യോഗസ്ഥര്ക്ക് ചായയില് മയക്കുമരുന്ന് കലര്ത്തി ഉറക്കിയശേഷം ജയില് ചാടാന് ശ്രമിച്ച മൂന്നു പേര് പിടിയില്. കൊലക്കേസ് പ്രതിയടക്കമുള്ളവരാണ് പിടിയിലായത്. വിചാരണത്തടവുകാരായ കാഞ്ഞങ്ങാട് സ്വദേശി റഫീഖ്, കാസര്കോട് തലപ്പാടിയില്നിന്നുള്ള അഷറഫ് ഷംസീര്, ചീമേനി സ്വദേശി അരുണ്കുമാര് എന്നിവരാണ് പിടിയിലായത്. രക്ഷപ്പെടാനായി ഗേറ്റിന്റെ അടുത്തെത്തിയ ഇവരെ മറ്റൊരു ഉദ്യോഗസ്ഥന് യാദൃച്ഛികമായി കണ്ടതോടെയാണ് പദ്ധതി പൊളിഞ്ഞത്. ബുധനാഴ്ച പുലര്ച്ചെയാണ് സംഭവം.
ഡെപ്യൂട്ടി പ്രിസണ് ഓഫീസര് സുകുമാരന്, അസി. പ്രിസണ് ഓഫീസര് യാക്കൂബ്, താത്കാലിക ജീവനക്കാരന് പവിത്രന് എന്നിവര്ക്കാണ് ചായയില് മയക്കുമരുന്ന് കലര്ത്തി നല്കിയത്. ജയിലിലെ അടുക്കളജോലിയുള്ളവരായിരുന്നു രക്ഷപ്പെടാന് ശ്രമിച്ച മൂന്നുപേരും. രാത്രി ഡ്യൂട്ടിയിലുള്ള ഉദ്യോഗസ്ഥര്ക്ക് രാവിലെ ജയില് അടുക്കളയില്നിന്ന് ചായയുണ്ടാക്കി കൊടുക്കുന്ന പതിവുണ്ട്. മാനസികാസ്വാസ്ഥ്യമുള്ള തടവുകാര്ക്ക് ജയില് ആശുപത്രിയില്നിന്ന് നല്കിയ നെട്രാ വൈറ്റ്, ക്യുടിപൈന് ഗുളികകളാണ് മയക്കുമരുന്നായി ഇവര് ഉപയോഗിച്ചത്.ചായ കുടിച്ച മൂവരും ഛര്ദിക്കുകയും മയങ്ങിപ്പോവുകയുമായിരുന്നു. തുടര്ന്ന് ഗേറ്റ് തുറന്ന് രക്ഷപ്പെടാനായിരുന്നു ശ്രമം.
ഈ സമയത്ത് ഗേറ്റിനടുത്തുള്ള ടോയ്ലറ്റിലേക്കു പോയ അസി. പ്രിസണ് ഓഫീസര് ബാബുവിന്റെ മുമ്പില്പ്പെട്ടു. എന്നാല്, രക്ഷപ്പെടാനുള്ള ശ്രമമാണോയെന്ന് മനസ്സിലായില്ല. ഇതോടെ മൂവരും വെള്ളം തീര്ന്നതിനാല് പൈപ്പ് ഓണാക്കാനെത്തിയതാണെന്ന് പറഞ്ഞ് അടുക്കള ഭാഗത്തേക്കുതന്നെ പോയി. ഇതിനിടെ, ചായകുടിച്ച മൂന്ന് ഉദ്യോഗസ്ഥരെയും അസ്വസ്ഥത പ്രകടിപ്പിച്ചതിനെത്തുടര്ന്ന് ആശുപത്രിയിലെത്തിച്ചു. ഭക്ഷ്യവിഷബാധയെന്ന സംശയത്തില് ചികിത്സയും നല്കി.
എന്നാല്, ഭക്ഷ്യവിഷബാധയ്ക്ക് സാധ്യതയില്ലെന്ന് മനസ്സിലായ ജയില് സൂപ്രണ്ട് അടുക്കളഭാഗത്തെ സി.സി.ടി.വി. ദൃശ്യങ്ങള് പരിശോധിച്ചു. റഫീഖ് മടിക്കുത്തില്നിന്ന് കടലാസ് പൊതിയെടുത്ത് അതിലുണ്ടായിരുന്ന പൊടി ഉദ്യോഗസ്ഥര്ക്ക് നല്കേണ്ട ചായയില് കലര്ത്തുന്നത് ദൃശ്യങ്ങളില്നിന്ന് വ്യക്തമായി. തുടര്ന്ന് നടത്തിയ ചോദ്യംചെയ്യലിലാണ് പ്രതികള് സംഭവം വിവരിച്ചത്. ജയില് ഉദ്യോഗസ്ഥരെ കൊലപ്പെടുത്താന് ശ്രമിച്ചതിനും തടവുചാടാന് ശ്രമിച്ചതിനും മൂന്നുപേര്ക്കുമെതിരേ കണ്ണൂര് ടൗണ് പോലീസ് കേസെടുത്തു. മൂവരെയും ജില്ലാ ജയിലില് പ്രത്യേക സെല്ലുകളില് അടച്ചു.
ചീമേനിയില് അധ്യാപികയെ കൊന്ന് വീട് കൊള്ളയടിച്ച കേസിലെ പ്രതിയാണ് അരുണ്കുമാര്. റഫീഖും അഷറഫും കവര്ച്ചക്കേസുകളില് റിമാന്ഡില് കഴിയുന്നവരാണ്. കേസില് ആരും സഹായിക്കുകയോ ജാമ്യത്തിലെടുക്കാന് വരികയോ ചെയ്യാത്തതിനാല് ഒരിക്കലും രക്ഷയില്ലെന്ന തോന്നലിലാണ് രക്ഷപ്പെടാന് പദ്ധതി തയ്യാറാക്കിയത്. മതില്ചാടി രക്ഷപ്പെടാനാവില്ലെന്ന് മനസ്സിലായതിനാലാണ് പാറാവുകാര്ക്ക് ഉറക്കുഗുളിക കൊടുക്കാന് തീരുമാനിച്ചത്. വിഷുദിവസം അതിന് ശ്രമിച്ചെങ്കിലും ചായ കുടിക്കാത്തവരായിരുന്നു അന്നത്തെ ഡ്യൂട്ടിക്കാര് അതിനാല് അന്ന് രക്ഷപ്പെടാനായില്ല.
"
https://www.facebook.com/Malayalivartha
