കനത്ത മഴയിൽ നെയ്യാർ ജല സംഭരണിയിൽ ഒറ്റ രാത്രി കൊണ്ട് ഉയർന്നത് ഒരുമീറ്റർ ജലനിരപ്പ് .ഇന്നലെ രാവിലെ 9 മണിക്ക് 80.2ആയിരുന്നു. വൈകിട്ട് 5 മണിയോടെ 80.52 മീറ്ററായി ഉയർന്നു. കഴിഞ്ഞ വർഷം ഇതേ സമയം ഡാമിൽ 84.25 മീറ്ററായിരുന്നു ജല നിരപ്പ്. എന്നാൽ ഡാമിന്റെ സംഭരണ ശേഷി 84.750 മീറ്ററാണ്. 83 മീറ്റർ ജലനിരപ്പ് ഉയരുകയാണെങ്കിൽ നീരൊഴുക്കിന്റെ അടിസ്ഥാനത്തിൽ ഷട്ടറുകൾ തുറക്കുന്നത് സംബന്ധിച്ച് തീരുമാനമെടുക്കുമെന്ന് അസി.എൻജിനീയർ ജോസ് പറഞ്ഞു .

83.25 മീറ്ററിലാണ് സാധാരണ ആദ്യ മുന്നറിയിപ്പ് നൽകുക. 83.75ൽ രണ്ടാമത്തെയും 84.400 മീറ്ററാകുമ്പോൾ മൂന്നാമത്തെയും മുന്നറിയിപ്പ് നൽകിയ ശേഷമാണ് ഷട്ടറുകൾ തുറക്കുക. എന്നാൽ ജലസംഭരണി പ്രദേശത്തെ മഴയുടെ തീവ്രതയും നീരൊഴുക്കിന്റെ അളവും പ്രവചനാതീതമായതിനാൽ ഈ പ്രാവശ്യം 84 വരെ കാത്തിരിക്കാൻ സാധ്യതയില്ല. മഴ ശക്തമായാൽ കൂടുതൽ അളവിൽ ഷട്ടറുകൾ ഉയർത്തി നെയ്യാറിന്റെ തീരത്ത് പ്രളയ ഭീതി സൃഷ്ടിക്കാതിരിക്കാനുള്ള ശ്രമത്തിലാണ്. ഇത്തവണ 83 മീറ്ററിന് ശേഷം മുന്നറിയിപ്പ് നൽകി എപ്പോൾ വേണമെങ്കിലും ഷട്ടറുകൾ തുറക്കും. മഴ ശക്തമായ സാഹചര്യത്തിൽ നെയ്യാറിന്റെ ഇരുകരകളിലുമുള്ളവർ ജാഗ്രത പാലിക്കണമെന്ന് ജലസേചനവകുപ്പ് ഉദ്യോഗസ്ഥർ അറിയിച്ചു.