നിറകണ്ണുകളോടെ പിതാവ്... ഗോകുലം ഗ്രൂപ്പ് നല്കിയ ഒരു ചെക്കും ബൗണ്സ് ആയിട്ടില്ലെന്ന് ഗോകുലം ഗോപാലന്; മകനെ കുടുക്കിയത് ശരിക്കും വിശ്വാസ വഞ്ചന കേസാണ്; ഇത് തെറ്റെന്ന് തെളിയിച്ചാല് പകരം ഒരു കോടി നല്കാനും തയ്യാര്
ഒരേ സമയം രണ്ട് കോടീശ്വര പുത്രന്മാരാണ് ഗള്ഫില് ചെക്കുകേസില് പെടുന്നത്. ഒന്ന് വെള്ളാപ്പള്ളി നടേശന്റെ മകന് തുഷാര് വെള്ളാപ്പള്ളിയും മറ്റേത് ഗോകുലം ഗോപാലന്റെ മകന് ബൈജു ഗോപാലനും. വന് തുകയുടെ ചെക്ക് നല്കി കബളിപ്പിച്ച കേസ് നിലനില്ക്കെ അനധികൃതമായി രേഖകള് സംഘടിപ്പിച്ചു ഒമാന് വഴി നാട്ടിലേക്ക് കടക്കാന് ശ്രമിച്ച ബൈജുവിനെ വിമാനത്താവളത്തില് വച്ച് കഴിഞ്ഞയാഴ്ചയാണ് പിടികൂടിയത്. ഇതോടെയാണ് തുഷാര് വെള്ളാപ്പള്ളിയ്ക്ക് പുറമേ ബൈജുവും കുടുങ്ങിയെന്ന വാര്ത്ത പുറം ലോകത്തെത്തിയത്.
അതേസമയം തന്നെ ഇതിനെതിരെ ശക്തമായി രംഗത്തെത്തിയിരിക്കുകയാണ് പിതാവായ ഗോകുലം ഗോപാലന്. ഗോകുലം ഗ്രൂപ്പ് കമ്പനിക്കെതിരെ തമിഴ്നാട് സ്വദേശി നല്കിയ പരാതിയെ നിയമപരമായി നേരിടുമെന്നാണ് ഗോകുലം ഗോപാലന് വ്യക്തമാക്കിയത്. ഇത് കള്ളക്കേസാണ്. ഗോകുലം ഗ്രൂപ്പ് നല്കിയ ഒരു ചെക്കും ബൗണ്സ് ചെയ്തിട്ടില്ല. ഈ കേസ് തെളിയിച്ചാല് ഒരു കോടി രൂപ നഷ്ടപരിഹാരം നല്കാനും തയാറാണെന്ന് ഗോകുലം ഗോപാലന് വ്യക്തമാക്കി. ഒരു പൊതു പരിപാടിയില് പങ്കെടുക്കേയാണ് ഗോകുലം ഗോപാലന് ഇക്കാര്യം തുറന്ന് പറഞ്ഞത്.
തന്റെ മകനം ശരിക്കും കുടുക്കിയതാണെന്നാണ് ഗോകുലം ഗോപാലന് പറയുന്നത്. ഗോകുലം ഗ്രൂപ്പ് കമ്പനി ഡയറക്ടര് കൂടിയായ ബൈജു ഗോപാലന്റെ പേരില് 20 കോടി രൂപയുടെ കരാര് ഉണ്ടാക്കിയതിനു ശേഷം സ്ഥാപനം എഴുതി നല്കാമെന്ന് വ്യക്തമാക്കിയതിനെ തുടര്ന്നാണ് ബൈജു ഗള്ഫില് എത്തുന്നത്. വ്യവസായിയായ രമണി എന്നയാള്ക്കെതിരെ ഗോകുലം ഗ്രൂപ്പ് കമ്പനി മദ്രാസില് 25 കോടി രൂപ നഷ്ടപരിഹാരം ആവശ്യപ്പെട്ടുള്ള കേസ് നല്കിയതിനു പിന്നാലെയാണ് 20 കോടി രൂപയുടെ കരാര് ഉണ്ടാക്കിയത്.
ആ വ്യവസായിയുമായി കരാര് ഉണ്ടാക്കിയെങ്കിലും ഗോകുലം ഗ്രൂപ്പ് പരാതിക്കാരന് ചെക്ക് നല്കിയിരുന്നില്ല. എന്നാല് പ്രമാണം ചെയ്യുമ്പോള് പരാതിക്കാരന് കരാര് തരാന് തയാറായില്ല. തൊട്ടടുത്ത ദിവസം ഇവരുടെ നോട്ടീസ് ആണ് ഗോകുലം ഗ്രൂപ്പിന് കിട്ടുന്നത്. മദ്രാസില് ഇവര്ക്കെതിരെ നല്കിയ 25 കോടി രൂപയുടെ കേസ് പിന്വലിക്കുകയാണെങ്കില് ഈ കേസും പിന്വലിക്കാമെന്ന ആവശ്യമാണ് പരാതിക്കാരന് മുന്നോട്ടു വെയ്ക്കുന്നത്. ഈ സംഭവം നടക്കുന്നത് ജൂലായ് മാസം ആദ്യമാണ്. സ്വകാര്യ ആവശ്യത്തിനായി ബൈജു നാട്ടിലേക്ക് മടങ്ങാന് ഇരിക്കുകയായിരുന്നു. ഇതിനിടേയാണ് പ്രശ്നം ഒത്തുതീര്പ്പാക്കാതെ നാട്ടിലേക്ക് മടങ്ങരുതെന്ന് വ്യവസായി രമണി പരാതി നല്കിയത്. കരാര് ലംഘിച്ചുവെന്ന് ചൂണ്ടിക്കാട്ടിയാണ് പരാതി നല്കിയിരിക്കുന്നതെന്നും അദ്ദേഹം വ്യക്തമാക്കി.
പരാതിക്കാരന് തെറ്റായ കരാര് ഉണ്ടാക്കിയാണ് പോലീസില് സമീപിച്ചിരിക്കുന്നത്. അതിനാലാണ് രമണി എന്നയാള്ക്ക് ചെക്ക് നല്കി അത് ബൗണ്സ് ആയിട്ടുണ്ടെന്ന് തെളിയിച്ചാല് ഒരു കോടി രൂപ നല്കാന് തയ്യാറാണെന്ന് ഗോകുലം ഗോപാലന് വെളിപ്പെടുത്തിയത്.
അതേസമയം ബൈജു ഗോപാലാനെതിരെ രമണി നല്കിയ പരാതിയെ തുടര്ന്ന് ബൈജുവിന് യുഎഇക്കു പുറത്തുപോകുന്നതിന് വിലക്കുണ്ട്. അതിനാലാണ് ഒമാന് വഴി കേരളത്തിലേക്ക് മടങ്ങാന് ശ്രമിച്ചത്. ഇതിനിടയിലാണ് ബൈജു ഗേപാലാനെ ഒമാന് പോലീസ് പിടികൂടിയത്. കേസ് സെപ്റ്റംബര് മൂന്നിന് വീണ്ടും കോടതി പരിഗണിക്കാനിരിക്കേയാണ് ഗോകുലം ഗോപാലന്റെ വെളിപ്പെടുത്തല്.
https://www.facebook.com/Malayalivartha
