പ്രളയബാധിത മേഖലയിലെ ഭിന്നശേഷിക്കാര്‍ക്കുള്ള 2.35 കോടി രൂപയുടെ സഹായ ഉപകരണങ്ങളുടെ വിതരണോദ്ഘാടനം ആലപ്പുഴ മെഡിക്കല്‍ കോളേജില്‍ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചറിനോടൊപ്പം നിര്‍വഹിച്ചത് കഴിഞ്ഞ പ്രളയത്തില്‍ കൃത്രിമ കൈകള്‍ നഷ്ടപ്പെട്ട എറണാകുളം കിഴക്കേ കടിഞ്ഞല്ലൂരിലെ ഹരിഹരന്‍ നായരാണ്. സമാനതകളില്ലാത്ത പ്രളയത്തില്‍ മലയാളികള്‍ ഏറെ വേദനിച്ചതാണ് ഹരിഹരന്‍ നായരുടെ അവസ്ഥ. 70 വയസുള്ള സംഗീതജ്ഞനായ ഹരിഹരന്‍ നായരുടെ ഇരു കൃത്രിമ കൈകളും പ്രളയത്തില്‍ നഷ്ടപ്പെട്ടിരുന്നു. ഒപ്പം ഒരാഴുഷ്‌ക്കാലം കൊണ്ട് കൃത്രിമ കൈ കൊണ്ട് എഴുതിയ 3 വാള്യവും 15,000ത്തോളം പേജുകളുമുള്ള സംഗീത സാഗരമെന്ന രചനയും പ്രളയത്തില്‍ നശിച്ചുപോയി. ഒരായുഷ്‌ക്കാലം കൊണ്ട് എഴുതിയ രചനകളും എഴുതാന്‍ സഹായിച്ച കൃത്രിമ കൈകളും സംഗീത ഉപകരണങ്ങളും നഷ്ടപ്പെട്ട ഹരിഹരന്‍നായരുടെ വേദന സമൂഹത്തിന്റെ വേദനയായി മാറി.

സ്വകാര്യ ടയര്‍ കമ്പനിയില്‍ ജോലി നോക്കിക്കൊണ്ടിരിക്കെ 21-ാം വയസിലാണ് ഹരിഹരന്‍നായര്‍ക്ക് അപകടം സംഭവിച്ച് ഇരു കൈകളും നഷ്ടപ്പെട്ടത്. പിന്നീട് കൃത്രിമ കൈ ഉപയോഗിച്ചാണ് രചനകള്‍ നടത്തിയിരുന്നത്. കഴിഞ്ഞ 35 വര്‍ഷമായി സരിഗ എന്ന സംഗീത വിദ്യാലയം നടത്തിയാണ് അദ്ദേഹം ഉപജീവനം നടത്തുന്നത്. വാര്‍ത്തകളിലൂടെ ഹരിഹരന്‍നായുടെ ജീവിതം അറിഞ്ഞ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ നേരിട്ട് കാണുകയും സാമൂഹ്യ സുരക്ഷാ മിഷന്‍ വഴി കൃത്രിമ കൈകള്‍ നല്‍കുമെന്ന് അറിയിക്കുകയും ചെയ്തു. ഏറ്റവും നൂതനകൈകളാണ് ഹരിഹരന്‍നായര്‍ക്ക് നല്‍കിയത്. ആ കൃത്രിമ കൈകള്‍ ഉപയോഗിച്ച് വിളക്ക് കൊളുത്തുകയും മന്ത്രിയെ അനുഗ്രഹിക്കുകയും ചെയ്തു.

പ്രളയത്തില്‍ സഹായ ഉപകരണങ്ങള്‍ നഷ്ടപ്പെട്ട 27 പേര്‍ക്കാണ് ആദ്യഘട്ടമായി ഏറ്റവും ആധുനികമായ സഹായ ഉപകരണങ്ങള്‍ വിതരണം ചെയ്തത്. ആലപ്പുഴ മെഡിക്കല്‍ കോളേജ് കമ്മ്യൂണിറ്റി മെഡിസിന്‍ വിഭാഗം നേതൃത്വം നല്‍കുന്ന വിദ്യാര്‍ത്ഥികളുടെ കൂട്ടായ്മയായ കാരുണ്യം പാലിയേറ്റീവ് കെയറിന്റെ കൂടി സഹകരണത്തോടെയാണ് സഹായ ഉപകരണങ്ങള്‍ വിതരണം ചെയ്യുന്നത്.

ആലപ്പുഴ ജില്ലാ പഞ്ചായത്ത് പ്രസിഡന്റ് ജി. വേണുഗോപാല്‍, മെഡിക്കല്‍ കോളേജ് പ്രിന്‍സിപ്പല്‍ ഡോ. എം. പുഷ്പലത, കമ്മ്യൂണിറ്റി മെഡിസിന്‍ വിഭാഗം മേധാവി ഡോ. സൈറു ഫിലിപ്പ്, സാമൂഹ്യ സുരക്ഷ മിഷന്‍ എക്‌സിക്യുട്ടീവ് ഡയറക്ടര്‍ ഡോ. മുഹമ്മദ് അഷീല്‍, കോളേജ് യൂണിയന്‍ ചെയര്‍മാന്‍ ജോസ് കുര്യന്‍ എന്നിവര്‍ പങ്കെടുത്തു.