കൊച്ചി മെട്രോയുടെ മൂന്നാംഘട്ടത്തിന്റെ ഉദ്ഘാടനം ഇന്ന് മുഖ്യമന്ത്രി നിര്‍വഹിക്കും. കടവന്ത്ര രാജീവ് ഗാന്ധി ഇന്‍ഡോര്‍സ്‌റ്റേഡിയത്തില്‍ വച്ച് നടക്കുന്ന ചടങ്ങില്‍ കേന്ദ്ര നഗരകാര്യ സഹമന്ത്രി ഹര്‍ദീപ് സിങ്ങ് പുരി മുഖ്യാതിഥിയാകും. മഹാരാജാസ് മുതല്‍ തൈക്കൂടം വരെയുള്ള പാതയുടെ ഉദ്ഘാടനമാണ് ഇന്ന് ചെയ്യുന്നത്.
മഹാരാജാസ് ഗ്രൗണ്ട് മുതല്‍ തൈക്കൂടം വരെയുള്ള 5.5 കിലോമീറ്റര്‍ പാതയാണ് മുഖ്യമന്ത്രി യാത്രക്കാര്‍ക്കായി തുറന്നു കൊടുക്കുന്നത്. നിപാ പ്രതിരോധത്തില്‍ ഉള്‍പ്പടെ നഴ്‌സുമാര്‍ വഹിച്ച പങ്കിന് ആദരസൂചകമായി ഉച്ചയ്ക്ക് സൗജന്യ യാത്രയും ഒരുക്കിയിട്ടുണ്ട്. ആരോഗ്യമന്ത്രി കെ കെ ശൈലജയും യാത്രയില്‍ നഴ്‌സുമാര്‍ക്കൊപ്പം ചേരും. യാത്രക്കാര്‍ക്ക് നാളെ മുതല്‍ പതിനാല് ദിവസത്തേക്ക് ടിക്കറ്റില്‍ 50 ശതമാനം ഇളവ് ലഭ്യമാകും.

ഇതോടൊപ്പം കൊച്ചി മെട്രോയോട് അനുബന്ധിച്ചുള്ള വാട്ടര്‍ മെട്രോയുടെ ആദ്യ ടെര്‍മിനലിന്റെയും പേട്ട എസ് എന്‍ ജംഗ്ഷന്റെയും നിര്‍മ്മാണോല്‍ഘാടനവും നടക്കും.
ആദ്യഘട്ടത്തില്‍ ആലുവ മുതല്‍ പാലാരിവട്ടം വരെയും രണ്ടാം ഘട്ടത്തില്‍ മഹാരാജാസ് കോളേജ് വരെയുമാണ് പൂര്‍ത്തിയാക്കിയത്. ഇനി മുതല്‍ ആലുവ മുതല്‍ തൈക്കൂടം വരെ മെട്രോയില്‍ സഞ്ചരിക്കാം. കൊച്ചി മെട്രോയുടെ ഇത് വരെയുള്ള നിര്‍മ്മാണ ചെലവ് 5600 കോടി രൂപയാണ് .