കേരളം മറ്റൊരു നിര്‍ണായക ഉപ തെരഞ്ഞെടുപ്പിനെ നേരിടുന്ന സമയം ശബരിമല വിഷയം വീണ്ടും ഉയര്‍ന്ന് വരികയാണ്. കഴിഞ്ഞ തെരഞ്ഞെടുപ്പോടെ ശബരിമല വിഷയം സിപിഎം തണുപ്പിക്കാന്‍ നോക്കിയതാണ്. പാര്‍ട്ടിക്കാരായ ഭക്തര്‍ മാറിപ്പോയതാണ് പരാജയ കാരണമായി സിപിഎം വിലയിരുത്തിയത്. അതിനാല്‍ തന്നെ വീടുകള്‍ തോറും കയറിയിറങ്ങി വലിയ പ്രചാരണമാണ് നടത്തിയത്. എന്നാല്‍ അതിന് ശേഷം മുഖ്യമന്ത്രി പിണറായി വിജയന്‍ നടത്തിയ പ്രസ്താവനയാണ് ശബരിമല വിഷയം വീണ്ടും ആളിക്കത്തിച്ചത്. സുപ്രീം കോടതി വിധി നടപ്പിലാക്കുയല്ലാതെ പോംവഴിയില്ലെന്നാണ് മുഖ്യമന്ത്രി പറഞ്ഞത്. അതോടെ ഇതുവരെ പാര്‍ട്ടി തീര്‍ത്ത പ്രതിരോധവും പോയി. ശക്തമായ വിമര്‍ശനമാണ് കോണ്‍ഗ്രസും ബിജെപിയും ഉന്നയിക്കുന്നത്.

പിണറായി വിജയനെതിരെ രൂക്ഷ വിമര്‍ശനവുമായി പന്തളം രാജകുടുംബം രംഗത്തെത്തിയിരിക്കുകയാണ്. ശബരിമലയിലെ സുപ്രീം കോടതിവിധി നടപ്പാക്കാന്‍ മുഖ്യമന്ത്രി തിടുക്കം കാട്ടിയെന്നാണ് ശശികുമാരവര്‍മ ആരോപിച്ചത്. ശത്രുക്കളെ കാണുന്നതുപോലെയാണ് കേരളത്തിലെ ഹിന്ദുക്കളെ കാണുന്ന നിലപാട് സര്‍ക്കാര്‍ സ്വീകരിച്ചത്. ശത്രുക്കളെ കാണുന്നതുപോലെ കേരളത്തിലെയും ഇന്ത്യയിലെയും ഹൈന്ദവരെ കാണുന്ന നിലപാട് സ്വീകരിച്ചത് കേരളത്തിലെ സര്‍ക്കാരാണെന്നായിരുന്നു ശശി കുമാര വര്‍മ്മ പറഞ്ഞത്. വിധി നടപ്പിലാക്കാന്‍ പോയാല്‍ ഇന്ത്യാ ചരിത്രത്തിലെ അവസാനത്തെ കമ്യൂണിസ്റ്റ് മുഖ്യമന്ത്രിയായി പിണറായി വിജയന്‍ മാറുമെന്നാണ് ശശി കുമാര വര്‍മ്മ പറഞ്ഞത്. 

അതേ സമയം കഴിഞ്ഞ മണ്ഡലമാസത്തെ ഓര്‍മ്മിപ്പിച്ച് സര്‍ക്കാര്‍ ഒരുക്കങ്ങളും തുടങ്ങി. ശബരിമല മണ്ഡലകാലത്തോടനുബന്ധിച്ച് സുരക്ഷ കര്‍ശനമാക്കാനൊരുങ്ങുകയാണ് പോലീസ്. യുവതീ പ്രവേശന വിഷയവുമായി ബന്ധപ്പെട്ടുണ്ടായ നിലവിലെ സാഹചര്യം കണക്കിലെടുത്ത് മൂന്ന് മേഖലകളായി തിരിച്ചാണ് സുരക്ഷ കര്‍ശനമാക്കുന്നത്. നിലയ്ക്കല്‍, പമ്പ, സന്നിധാനം എന്നിങ്ങനെയുള്ള മൂന്ന് മേഖലകളായാണ് തിരിക്കുന്നത്. നിലയ്ക്കല്‍ ശബരിമലയുടെ പ്രധാന ഇടത്താവളമായതിനാല്‍ കൂടുതല്‍ ക്യാമറകള്‍ സ്ഥാപിച്ച് സുരക്ഷ ശക്തമാക്കാനാണ് പോലീസ് തീരുമാനിച്ചിരിക്കുന്നത്.

കഴിഞ്ഞ തവണത്തെ ഓര്‍മ്മിപ്പിക്കുന്ന പോലീസ് വിന്യാസമാണ് കണക്കുകൂട്ടുന്നത്. മൂന്ന് എസ്പിമാര്‍ക്ക് സുരക്ഷാ ചുമതല നല്‍കും. നിലയ്ക്കല്‍ മുതല്‍ പമ്പവരെ സ്വകാര്യവാഹനങ്ങല്‍ കടത്തിവിടില്ല. ശബരിമലയിലേയ്ക്കുള്ള പ്രധാന പാതകളായ എരുമേലി പമ്പ വടശ്ശേരിക്കര പമ്പ എന്നിവിടങ്ങളില്‍ പട്രോളിങ്ങ് ശക്തമാക്കാനും തീരുമാനിച്ചിട്ടുണ്ട്. 

ശബരിമല വിഷയത്തില്‍ സര്‍ക്കാരിന്റെ നിലപാടില്‍ മാറ്റമില്ലെന്ന് മുഖ്യമന്ത്രി പിണറായി വിജയന്‍ വ്യക്തമാക്കിയ സാഹചര്യത്തിലാണ് വീണ്ടും വിവാദം പുകയുന്നത്. സുപ്രീം കോടതി പറഞ്ഞു സര്‍ക്കാര്‍ അത് നടപ്പാക്കാന്‍ തയ്യാറായിയെന്നാണ് പിണറായി പറഞ്ഞത്. സുപ്രീംകോടതി ഇനി മാറ്റി പറഞ്ഞാല്‍ സര്‍ക്കാര്‍ അതനുസരിക്കും. നേരത്തെ തന്നെ ഇതേ നിലപാടാണ് ഞങ്ങള്‍ സ്വീകരിച്ചതാണെന്നും മുഖ്യമന്ത്രി വ്യക്തമാക്കി.

സിപിഎമ്മിന്റെ നിലപാടിനെ മുഖ്യമന്ത്രി ന്യായീകരിക്കുകയും ചെയ്തു. വിശ്വാസികള്‍ക്കൊപ്പം നില്‍ക്കുമെന്ന് സിപിഎം പറഞ്ഞത് പുതിയ കാര്യമല്ല. നേരത്തെയും അങ്ങനെയാണ്. വിശ്വാസികള്‍ കൂടി അണി നിരക്കുന്ന പാര്‍ട്ടിയും മുന്നണിയുമാണ് ഞങ്ങളുടേത്. എന്നാല്‍ വിശ്വാസികളുടെ അട്ടിപ്പേര്‍ അവകാശപ്പെടുന്ന ചിലയാളുകള്‍ ഞങ്ങള്‍ വിശ്വാസികള്‍ക്കെതിരാണെന്ന് സ്ഥാപിക്കാന്‍ ശ്രമിച്ചിട്ടുണ്ട്. അത്തരം പ്രചാരണം ലോക്‌സഭാ തിരഞ്ഞെടുപ്പിന്റെ ഘട്ടത്തിലും ഉയര്‍ന്നു വന്നു. അക്കാര്യത്തില്‍ ഞങ്ങള്‍ക്ക് കുറച്ച് ജാഗ്രത കുറവുണ്ടായിട്ടുണ്ട്. തിരഞ്ഞെടുപ്പ് ഘട്ടത്തില്‍ കാര്യങ്ങള്‍ വിശദീകരിക്കുന്നതില്‍ ജാഗ്രതകുറവുണ്ടായതാണ് ഞങ്ങള്‍ സ്വയം വിമര്‍ശനമായി കണ്ടത്. അല്ലാതെ നിലപാടില്‍ മാറ്റം വരുത്തിയിട്ടില്ലെന്നുമാണ് മുഖ്യമന്ത്രി പറഞ്ഞത്. ഇതോടെയാണ് വരുന്ന മണ്ഡലകാലം പഴയതുപോലെയാകുമോന്ന് തോന്നിപ്പിക്കുന്നത്.