പ്രേക്ഷകരുടെ കാത്തിരിപ്പിനൊടുവിൽ ദളപതി വിജയുടെ ബിഗിൽ തിയേറ്ററുകളിൽ എത്തിയിരിക്കുകയാണ്. നയന്‍താര നായികയായി എത്തുന്ന ചിത്രത്തിൽ വിജയ് ഇരട്ടവേഷത്തിലാണ് അഭിനയിക്കുന്നത്. സിനിമ ഒരുക്കിയിരിക്കുന്നതാകട്ടെ 180 കോടി രൂപ ബഡ്ജറ്റിലാണ്. സ്‌പോര്‍ട്‌സ് പശ്ചാത്തലത്തിലുള്ള സിനിമയിൽ വമ്പൻ താര നിരയാണുള്ളത്. ചിത്രത്തില്‍ മലയാളത്തില്‍ നിന്ന് ഫുട്ബോള്‍ താരവും നടനുമായ ഐ.എം വിജയനും എത്തുന്നുണ്ട്. വിജയ്ക്ക് ഒപ്പം അഭിനയിക്കാൻ കഴിഞ്ഞതിൽ ഏറെ സന്തോഷമുണ്ട്. എന്നാൽ അതോടൊപ്പം തന്നെ ഒരു നിരാശയും പങ്കുവെയ്ക്കുകയാണ് ഐ.എം വിജയൻ. സ്‌പോര്‍ട്‌സ് പശ്ചാത്തലത്തിലുള്ള സിനിമയാണിത്. എന്നാൽ സിനിമയിൽ തനിയ്ക്ക് ഫുട്‌ബോള്‍ കളിക്കാൻ കഴിഞ്ഞില്ല . ഇതാണ് താരം ഏക നിരാശയായി കാണുന്നത്. വിജയ് സാറിനെപ്പോലെയൊരു സൂപ്പര്‍താരത്തിന്റെ ചിത്രത്തില്‍ ഒരു സീന്‍ കിട്ടിയത് മഹാഭാഗ്യമായി കണക്കാക്കുന്നു. ഐഎസ്എല്ലിന്റെ സമയമാണ് ഇപ്പോൾ. ഈ സമയത്ത് ഞാൻ അഭിനയിക്കുന്ന ഫുട്ബാൾ പശ്ചാത്തലത്തിലുള്ള സിനിമ ഇറങ്ങുന്നതിൽ സന്തോഷമുണ്ടെന്നും വിജയന്‍ പറഞ്ഞു.

കേരളത്തിൽ മാത്രം 200 സ്‌ക്രീനുകളാണ് ചിത്രത്തിന് വേണ്ടി ഒരുക്കിയിരിക്കുന്നത് . 16 പെണ്‍കുട്ടികള്‍ ഉള്‍പ്പെടുന്ന ഫുട്‌ബോള്‍ ടീമിന്റെ കോച്ച് ആയാണ് വിജയ് എത്തുന്നത് .തെരി, മെര്‍സല്‍ എന്നീ സൂപ്പര്‍ഹിറ്റുകള്‍ക്ക് ശേഷം വിജയും അറ്റ്ലിയും ഒന്നിക്കുന്ന ചിത്രമാണിത് എന്ന പ്രത്യേകത കൂടി ഉണ്ട് . വിജയിന്റെ 63-ാമത് ചിത്രമാണ് ഇത്. ചിത്രത്തിന്റെ ഈണം ഒരുക്കുന്നത് എ.ആര്‍ റഹ്മാന്‍ ആണ് . മെര്‍സല്‍ സര്‍ക്കാര്‍ എന്നീ ചിത്രങ്ങള്‍ക്കായിരുന്നു ഇതിന് മുൻപ് എ.ആര്‍ റഹ്മാന്‍ ഈണമൊരുക്കിയത് . പരിയേറും പെരുമാള്‍ താരം കതിര്‍, ജാക്കി ഷ്‌റോഫ്, വിവേക്, യോഗി ബാബു, ഡാനിയേല്‍ ബാലാജി, ദേവദര്‍ശിനി, റീബ മോണിക്ക ജോണ്‍, ഇന്ദുജ, വര്‍ഷ ബൊലമ്മ, അമൃത അയ്യര്‍ തുടങ്ങിയവർ മറ്റു പ്രധാന വേഷങ്ങളില്‍ എത്തുന്നു.