തിരുവിതാംകൂര്‍ ദേവസ്വം ബോര്‍ഡിനു കീഴിലുള്ള സ്കൂളുകളില്‍ അറബിക് അധ്യാപകരെ തേടിയുള്ള അറിയിപ്പിനെ പരിഹസിച്ച്‌ രംഗത്ത് എത്തിയിരിക്കുകയാണ് മുന്‍ ഡി.ജി.പി ടി.പി സെന്‍കുമാര്‍. 'അറബി പഠിച്ചാലേ ഇനി അമ്ബലത്തില്‍ ജോലി കിട്ടൂ' - എന്ന കുറിപ്പോടെ അധ്യാപകരെ തേടിയുള്ള ദേവസ്വത്തിന്റെ അറിയിപ്പും സെന്‍കുമാര്‍ ഫേസ്ബുക്കില്‍ പങ്കുവച്ചിട്ടുണ്ട്. എന്നാല്‍ ഈ കുറിപ്പിനെ വിമര്‍ശിച്ച്‌ നിരവധി പേരാണ് ഇപ്പോള്‍ സമൂഹമാധ്യമങ്ങളിൽ രംഗത്തെത്തിയിരിക്കുന്നത്.

മലയാളം, കണക്ക്, സയന്‍സ്, മ്യൂസിക്, ഡ്രോയിംഗ്, സോഷ്യല്‍ സയന്‍സ് തുടങ്ങി പല തസ്തികകളിലേക്കും അപേക്ഷ ക്ഷണിച്ചിട്ടുണ്ട്. ഇതില്‍ അറബി അധ്യാപകന്റെ ഒഴിവുമുണ്ട്. എന്നാല്‍ അറബി അധ്യാപകന്റെ ഒഴിവിനെ മാത്രം ചുവന്ന മഷി കൊണ്ട് മാര്‍ക്ക് ചെയ്താണ് സെന്‍കുമാര്‍ ഫേസ്ബുക്കില്‍ പോസ്റ്റ് ചെയ്തിരിക്കുന്നത്.

സമൂഹത്തില്‍ വിഷം വമിപ്പിക്കാനാണ് സെന്‍കുമാറിന്റെ ശ്രമമെന്നും അറബി ഒരു ഭാഷയാണെന്നും അത് സ്‌കൂളുകളില്‍ പഠിപ്പിക്കേണ്ടതാണെന്നും സോഷ്യല്‍ മീഡിയയില്‍ ആളുകള്‍ പറയുന്നു.സെന്‍കുമാറിന്‍റെ ഫേസ് ബുക്ക് പോസ്റ്റിന് താഴെ രൂക്ഷവിമര്‍ശനങ്ങളാണ് നിറയുന്നത്. 'അമ്ബലത്തിലെ ജോലിക്കുള്ള അപേക്ഷയല്ല, സ്‌കൂളിലെ അധ്യാപകനുള്ള അപേക്ഷയാണ്. അത് കൃത്യമായി ആ വിജ്ഞാപനത്തിലുണ്ട്. സ്‌കൂളുകളില്‍ എല്ലാ ഭാഷയും പഠിപ്പിക്കും. അറബി പഠിപ്പിക്കാന്‍ അറബി യോഗ്യതയുള്ള അധ്യാപകര്‍ വേണം. സംസ്കൃതം പഠിക്കാന്‍ പാടില്ലെന്ന് അതില്‍ എവിടെയും ഇല്ല', 'അറബി ഒരു ഭാഷയാണ്, അത് പഠിപ്പിക്കാന്‍ അധ്യാപകരെ ക്ഷണിച്ചുകൊണ്ടുള്ള വിജ്ഞാപനത്തെ സെന്‍കുമാര്‍ ബോധപൂര്‍വ്വം വര്‍ഗീയവല്‍ക്കരിക്കുകയാണ്' എന്നിങ്ങനെ രൂക്ഷവിമര്‍ശനമാണ് സെന്‍കുമാറിനെതിരെ ഉയരുന്നത്.

ഫേസ്ബുക്കിലും ട്വിറ്ററിലുമാണ് സെന്‍കുമാര്‍ വിവാദ പോസ്റ്റ് ഇട്ടിട്ടുള്ളത്. തിരുവിതാംകൂര്‍ ദേവസ്വം ബോര്‍ഡിന് കീഴിലുള്ള എയ്ഡഡ് ഹൈസ്കളുകളിലേക്കും യുപി സ്കൂളുകളിലേക്കും അധ്യാപകരെ ക്ഷണിച്ചുകൊണ്ടുള്ള വിജ്ഞാപനമാണ് തെറ്റിദ്ധരിപ്പിക്കുന്ന തലക്കെട്ടോടെ സെന്‍കുമാര്‍ പോസ്റ്റ് ചെയ്തത്. ഫേസ്ബുക്കിന് പുറമേ ട്വിറ്ററിലെ സെന്‍കുമാറിന്റെ പോസ്റ്റിന് തക്കതായ മറുപടി നല്‍കിക്കൊണ്ട് നിരവധി പേരാണ് സോഷ്യല്‍ മീഡിയയില്‍ രംഗത്തെത്തിയിട്ടുള്ളത്. മുന്‍ ഡിജിപിയായ സെന്‍കുമാര്‍ സോഷ്യല്‍ മീഡിയയിലൂടെ കള്ളം പ്രചരിപ്പിക്കുന്നുവെന്ന വിമര്‍ശനവും ഇതിനകം തന്നെ ഉയര്‍ന്നു കഴിഞ്ഞിട്ടുണ്ട്.