മുറിയിലെത്തി നോക്കിയപ്പോള് കൃതിക അബോധാവസ്ഥയില് കട്ടിലില് കിടക്കുന്നു; ആശുപത്രിയില് കൊണ്ടുപോകാതെ ഭര്ത്താവ് മുങ്ങി; കൊല്ലം കുണ്ടറ മുളവനയില് യുവതിയുടെ മരണം കൊലപാതകമെന്ന് സംശയം
കൊല്ലം കുണ്ടറ മുളവനയില് യുവതിയെ വീടിന് ഉള്ളില് മരിച്ച നിലയില് കണ്ടെത്തി. കൃതികയുടെ മരണം കൊലപാതകമാണെന്നാണ് പോലീസിന്റെ പ്രാഥമിക നിഗമനം. മുളവന സ്വദേശി കൃതികയെ ആണ് മരിച്ച നിലയില് കണ്ടെത്തിയത്. ഭര്ത്താവ് വൈശാഖ് ഒളിവിലാണ്.
ചൊവ്വാഴ്ച രാത്രി പത്തേമുക്കാലോടെയാണ് വീട്ടുകാർ കൃതികയെ മരിച്ച നിലയില് കണ്ടെത്തിയത്. ചൊവ്വാഴ്ച വൈകിട്ട് ഏഴുമണിക്ക് കൃതികയുടെ മുളവനയിലുള്ള വീട്ടില് ഭർത്താവ് വൈശാഖ് എത്തിയിരുന്നു. രാത്രി ഒന്പതു മണി മുതല് പത്തേമുക്കാല് വരെ ഇരുവരും മുറിയിലിരുന്നു സംസാരിക്കുകയായിരുന്നു. പത്തേമുക്കാലോടെ ഇരുവരും ഭക്ഷണം കഴിക്കാന് പുറത്തേക്ക് വരാതിരുന്നതിനെ തുടര്ന്ന് കൃതികയുടെ അമ്മ മുറിയിലെത്തി നോക്കിയപ്പോള് കൃതിക അബോധാവസ്ഥയില് കട്ടിലില് കിടക്കുന്നതായാണ് കണ്ടത്. ബോധം പോയതാണെന്നും ആശുപത്രിയിലേക്ക് കൊണ്ടുപോകാമെന്നും വൈശാഖ് പറഞ്ഞു. എന്നാല് ആശുപത്രിയിലേക്ക് കൊണ്ടുപോകാനായി കാറില് കയറ്റുന്നതിന് മുന്നെ തന്നെ ഇയാള് കാറുമായി കടന്നുകളഞ്ഞു.
കഴിഞ്ഞ ഫെബ്രുവരിയിലായിരുന്നു കൃതികയുടെയും വൈശാഖിന്റെയും വിവാഹം. കൃതികയുടെ രണ്ടാം വിവാഹവും വൈശാഖിന്റെ ആദ്യ വിവാഹവും ആയിരുന്നു. ഇരുവരും തമ്മില് സാമ്പത്തിക തര്ക്കങ്ങളുണ്ടായിരുന്നതായാണ് സൂചന. ഇതേ പറ്റിയും പോലീസ് അന്വേഷണം ആരംഭിച്ചിട്ടുണ്ട്. വൈശാഖിനുവേണ്ടിയുള്ള അന്വേഷണം കുണ്ടറ പോലീസ് ശക്തമാക്കി.
https://www.facebook.com/Malayalivartha
