യൂത്ത് കോണ്ഗ്രസ് തെരഞ്ഞെടുപ്പ് അഖിലേന്ത്യാനേതൃത്വം സ്വകാര്യ ഏജന്സിക്ക് നല്കിയത് വഴി മെമ്പര്ഷിപ്പിനും നോമിനേഷനുമായി കോടിക്കണക്കിന് രൂപ പിരിച്ചെടുക്കുന്നതായി പ്രവര്ത്തകരുടെ ആക്ഷേപം
യൂത്ത് കോണ്ഗ്രസ് തെരഞ്ഞെടുപ്പ് അഖിലേന്ത്യാനേതൃത്വം സ്വകാര്യ ഏജന്സിക്ക് നല്കിയത് വഴി മെമ്പര്ഷിപ്പിനും നോമിനേഷനുമായി കോടിക്കണക്കിന് രൂപ പിരിച്ചെടുക്കുന്നതായി പ്രവര്ത്തകരുടെ ആക്ഷേപം. ഇത്തരത്തില് പ്രവര്ത്തകരില് നിന്ന് പണം പിരിച്ചെടുത്ത് ധൂര്ത്ത് നടത്തുന്നതിനെതിരെ കോണ്ഗ്രസിലെയും യൂത്ത് കോണ്ഗ്രസിലെയും പ്രവര്ത്തകര് ഹൈക്കമാന്ഡിന് പരാതി നല്കാനൊരുങ്ങുകയാണ്. കേരളത്തിലെ പല നേതാക്കള്ക്കും ഈ തെരഞ്ഞെടുപ്പ് രീതിയോട് കടുത്ത അതൃപ്തിയാണുള്ളത്. ഇത്തരത്തില് തെരഞ്ഞെടുപ്പ് നടപടികളുമായി മുന്നോട്ട് പോയാല് യൂത്ത് കോണ്ഗ്രസിലും യൂത്ത്കോണ്ഗ്രസിലും വലിയ പൊട്ടിത്തെറിയുണ്ടാകുമെന്നാണ് അറിയുന്നത്.
മെമ്പര്ഷിപ്പിന് 75 രൂപയാണ് തെരഞ്ഞെടുപ്പ് നടത്തുന്നസ്വകാര്യ ഏജന്സി ഫീസ് ഈടാക്കുന്നത്. നിശ്ചിത സമയം കഴിഞ്ഞ് അംഗത്വം എടുക്കാന് ചെന്നാല് 150 രൂപ നല്കണം. അങ്ങനെ ആറ് കോടിയോളം രൂപ കേരളത്തിലെ പ്രവര്ത്തകരില് നിന്ന് യൂത്ത് കോണ്ഗ്രസ് അഖിലേന്ത്യാ നേതൃത്വം സ്വകാര്യ ഏജന്സിവഴി പിരിച്ചെടുത്തെന്നാണ് ആക്ഷേപം. 14 ജില്ലകളിലെയും സംസ്ഥാന നേതൃത്വത്തിലെയും തെരഞ്ഞെടുപ്പ് നടത്തുന്നതിനും മറ്റുമായി നാല് കോടിയോളം രൂപ വേണ്ടിവരുമെന്നാണ് കണക്കുകൂട്ടലെന്നും പ്രവര്ത്തകര് പറയുന്നു.
പണം തട്ടാന് സ്വകാര്യ ഏജന്സി തന്ത്രപരമായ നീക്കമാണ് നടത്തിയതെന്നാണ് കേരളത്തിലെ പ്രവര്ത്തകര് ആരോപിക്കുന്നത്. യൂത്ത് കോണ്ഗ്രസിന്റെ ഭരണഘടനയ്ക്ക് വിരുദ്ധമായി ഇത്തരത്തില് തെരഞ്ഞെടുപ്പ് നടത്തുന്നതിനെതിരെ ഒരു പ്രവര്ത്തകന് ആലുവ മുന്സിഫ് കോടതിയില് നിന്ന് സ്റ്റേ വാങ്ങി. അത് അഖിലേന്ത്യാനേതൃത്വത്തിന് വലിയ തിരിച്ചടിയായിരിക്കുകയാണ്. മൂന്ന് വോട്ട് കിട്ടുന്നവര്ക്ക് ജില്ലാ സെക്രട്ടറിയാകാം എന്നാണ് സ്വകാര്യ തെരഞ്ഞെടുപ്പ് ഏജന്സിയുടെ നിര്ദ്ദേശം. അതോടെ ഒരു ജില്ലയില് നിന്ന് 100ലധികം നോമിനേഷനുകളാണ് ലഭിച്ചിട്ടുള്ളത്. ഒരു നാമനിര്ദ്ദേശ പത്രികയുടെ വില 7500 രൂപയാണ്. ഇത്തരത്തില് 14 ജില്ലകളില് നിന്നായി കോടികളാണ് കൊയ്യുന്നതെന്ന് വ്യാപകമായ ആക്ഷേപമുണ്ട്. ഇതേ തുടര്ന്നാണ് ഈ തെരഞ്ഞെടുപ്പ് രീതി മാറ്റണമെന്ന് ആവശ്യപ്പെട്ട് കോടതിയില് നിന്ന് സ്റ്റേ വാങ്ങിയത്.
സ്റ്റേ നീക്കം ചെയ്യാന് യൂത്ത് കോണ്ഗ്രസ് അഖിലേന്ത്യാ ജനറല് സെക്രട്ടറി രവീന്ദ്ര ദാസും തെരഞ്ഞെടുപ്പ് നടത്തുന്ന സ്വകാര്യ ഏജന്സിയും ഏര്പ്പെടുത്തിയ വക്കീലാകട്ടെ യൂത്ത് കോണ്ഗ്രസില് നിന്നും സംഘടനാവിരുദ്ധ പ്രവര്ത്തനത്തിന് പുറത്താക്കിയ അല്ജോ കെ ജോസഫാണ്. ഇതിനെതിരെയും യൂത്ത് കോണ്ഗ്രസില് കലാപം പൊട്ടിപ്പുറപ്പെട്ടിട്ടുണ്ട്. വിവാദമായ അഗസ്ത്യാ വെസ്റ്റ്ലാന്ഡ് ഹെലികോപ്ടര് ഇടപാടില് ഇറ്റലിക്കാരന് ക്രിസ്ത്യന് മിഷേലിന് ജാമ്യം എടുക്കാന് കോടതിയില് ഹാജരായതിനാണ് ഇടുക്കി സ്വദേശിയായ അല്ജോ കെ. ജോസഫിനെ യൂത്ത് കോണ്ഗ്രസില് നിന്നും പുറത്താക്കിയത്. തെരഞ്ഞെടുപ്പ് നടത്തുന്ന സ്വകാര്യ ഏജന്സിയും രവീന്ദ്രദാസും അല്ജോ കെ. ജോസഫസും തമ്മില് നല്ല ബന്ധമാണെന്ന ആക്ഷേപവും ഉയരുന്നുണ്ട്.
ജില്ലാ തലത്തില് വോട്ടിംഗ് നടത്തിയ ശേഷം സംസ്ഥാന അധ്യക്ഷനെ ഉള്പ്പെടെ നിര്ദ്ദേശിക്കാനുള്ള നീക്കമാണ് നടക്കുന്നതെന്നും ആക്ഷേപമുണ്ട്. എം.എല്.എമാരായ ഷാഫി പറമ്പിലിനെയും കെ.എസ് ശബരീനാഥനെയും അധ്യക്ഷസ്ഥാനത്തേക്ക് പരിഗണിക്കുന്നതിനെതിരെ ഒരുവിഭാഗം പ്രവര്ത്തകര് സമൂഹമാധ്യമങ്ങളിലൂടെ രംഗത്തെത്തിയിട്ടുണ്ട്. പ്രവര്ത്തകര് വിളിച്ചാല് ഫോണ് എടുക്കാന് പോലും കഴിയാത്തത്ര തെരക്കുള്ള എം.എല്.എമാരെ അധ്യക്ഷപദവിയിലേക്ക് കൊണ്ടുവരുന്നത് യൂത്ത്കോണ്ഗ്രസിനെ ഇല്ലാതാക്കാനുള്ള നീക്കമാണെന്നാണ് ഇവരുടെ ആരോപണം.
https://www.facebook.com/Malayalivartha