സോഫ്റ്റ് വെയറിന്റെ തലയില്‍ കുറ്റം കെട്ടി വച്ച് കേരളാ സര്‍വ്വകലാശാലയിലെ ഗുരുതരമായ മാര്‍ക്ക് തട്ടിപ്പ് കേസ് അട്ടിമറിക്കുന്നതില്‍ പ്രതിപക്ഷ നേതാവ് രമേശ് ചെന്നിത്തല ശക്തിയായി പ്രതിഷേധിച്ചു. പിണറായി സര്‍ക്കാര്‍ കുറ്റവാളികള്‍ക്കൊപ്പമാണെന്ന് ഒരിക്കല്‍ കൂടി തെളിഞ്ഞു. എല്ലാ ഗൗരവമേറിയ കുറ്റകൃത്യങ്ങളിലും കുറ്റവാളികളെ രക്ഷപ്പെടുത്തി കേസ് അട്ടിമറിക്കുകയാണ് സര്‍ക്കാര്‍ ചെയ്യുന്നത്. രാഷ്ട്രീയ കൊലപാതകങ്ങളിലും പി.എസ്.സി പരീക്ഷാ തട്ടിപ്പിലും എം.ജി.സര്‍വ്വകലാശാലാ മാര്‍ക്ക് തട്ടിപ്പിലുമെല്ലാം നേരത്തെ ഇത് കണ്ടതാണ്. കേരളാ സര്‍വ്വകലാശാലയിലെ പരീക്ഷാ തട്ടിപ്പില്‍ സ്ഥലം മാറിപ്പോയ ഡെപ്യൂട്ടി രജിസ്റ്റാറുടെ പാസ്‌വേര്‍ഡും യൂസര്‍ ഐ.ഡിയും മോഷ്ടിച്ച് മോഡറേഷന്‍ കൂട്ടിയിട്ടതായി പ്രാഥമിക അന്വേഷണത്തില്‍ വ്യക്തമായതാണെന്നും അദ്ദേഹം ചൂണ്ടിക്കാട്ടി.

ഏതൊക്കെ പരീക്ഷകളില്‍ ഏതൊക്കെ ദിവസങ്ങളില്‍ ഇത് ചെയ്തു എന്നു പോലും കണ്ടെത്തിയതാണ്. എന്നാല്‍ ഒരു ഉപസമിതിയെ വച്ച് അന്വേഷണ പ്രഹസനം നടത്തി ആരും കൃത്രിമം കാട്ടിയിട്ടില്ലെന്നും സോഫ്ട് വെയറിന്റെ കുഴപ്പമാണ് എല്ലാമെന്നും റിപ്പോര്‍ട്ട് ഉണ്ടാക്കി കേസ് തേച്ച് മായ്ച്ചു കളയാനാണ് നീക്കം നടക്കുന്നത്. കംപ്യൂട്ടര്‍ സെന്റര്‍ ഡയറക്ടര്‍ മാത്രമായി ഇപ്പോള്‍ ഉത്തരവാദി. വളരെ ഗുരുതരമായ ഈ കുറ്റകൃത്യത്തില്‍ നടപടിയെടുക്കാതെ കേസ് ഒതുക്കി തീര്‍ക്കുന്നത് ഉന്നത വിദ്യാഭ്യാസ രംഗത്ത് ഗുരുതരമായ ഭവിഷ്യത്തുകള്‍ ഉണ്ടാക്കും. സര്‍ക്കാരിന്റെ സംരക്ഷണം കിട്ടുമെന്നതിനാല്‍ സര്‍വ്വകലാശാലകളില്‍ ആര്‍ക്കും പരീക്ഷാ തിരിമറി നടത്താമെന്ന അവസ്ഥയാണ് വന്നു ചേര്‍ന്നിരിക്കുന്നത്.

മാര്‍ക്ക് തിരിമറി നടത്തിയതിന് ശിക്ഷാ നടപടി എടുത്ത് വീഴ്ചകള്‍ പരിഹരിച്ചില്ലെങ്കില്‍ കേരളത്തിലെ സര്‍വ്വകലാശാലകള്‍ നല്‍കുന്ന ബിരുദത്തിന് എന്തു വിലയാണുണ്ടാവുക? അതിനാല്‍ കേസ് തേച്ചുമായ്ച്ചു കളയാനുള്ള ശ്രമം ഉപേക്ഷിച്ച് സമഗ്രവും നീതിപൂര്‍വ്വവുമായ അന്വേഷണം നടത്തി സര്‍വ്വകലാശാലകളുടെ അന്തസ് വീണ്ടെടുക്കണമെന്ന് രമേശ് ചെന്നിത്തല ആവശ്യപ്പെട്ടു.