സി പി എമ്മും ബിജെപിയും തമ്മിലുള്ള അവിശുദ്ധ ബന്ധത്തിന്റെ കഥ ആവർത്തിക്കുന്ന കോൺഗ്രസിന് മുന്തിരിവള്ളികൾ സമ്മാനിച്ചുകൊണ്ട് സി ബി ഐയിലോ ദേശീയ അന്വേഷണ ഏജൻസിയിലോ ലോകനാഥ് ബഹ്റക്ക് നിയമനം ഉറപ്പായി. ബഹ്റയെ മുഖ്യമന്ത്രി പിണറായി വിജയൻ സംസ്ഥാന പോലീസ് മേധാവിയാക്കിയത് നരേന്ദ്ര മോദി പറഞ്ഞിട്ടാണെന്ന ആരോപണം നിലനിൽക്കുമ്പോഴാണ് മോദി ഇടപെട്ട് ബഹ്റക്ക് അത്യാകർഷകമായ തസ്തിക നൽകുന്നത്.

ബഹ്റക്ക് ഡിസംബറിൽ തന്നെ കേന്ദ്ര നിയമനം ലഭിക്കുമെന്നാണ് കണക്കുകൂട്ടുന്നത്. സി ബി ഐയിലോ എൻ ഐ എയിലോ നിയമനം ലഭിക്കുകയാണെങ്കിൽ വിരമിച്ച ശേഷം ഏതെങ്കിലും സുപ്രധാന പദവിയിൽ തുടരാൻ കഴിയുമെന്നാണ് ലോക്നാഥ് ബഹ്റ കരുതുന്നത്. കേന്ദ്ര സർക്കാരും നരേന്ദ്രമോദിയുമായി അടുത്ത ബന്ധമാണ് ബഹറക്കുള്ളത്. ഇക്കാര്യം കെ പി സി സി അധ്യക്ഷൻ മുല്ലപ്പള്ളി രാമചന്ദ്രൻ തുറന്നു പറഞ്ഞിരുന്നു. ഇതിന് പിന്നിൽ എസ് എൻ സി ലാവ്ലിൻ കേസാണെന്നും അന്ന് മുല്ലപ്പള്ളി പറഞ്ഞു. സി ബി ഐയിൽ ബഹ്റ എത്തിയാൽ ലാവ്ലിൻ കേസിൽ പിണറായിയെ രക്ഷിക്കുമെന്നും ആരോപണമുണ്ട്.

മാവോയിസ്റ്റുകളെ കൊന്ന കേസിലും രണ്ട് സിപിഎം പ്രവർത്തകരെ മാവോയിസ്റ്റ് ബന്ധം ആരോപിച്ച് അറസ്റ്റ് ചെയ്ത കേസിലും ബഹ്റ കർശന നിലപാടാണ് സ്വീകരിച്ചത്. മാവോയിസ്റ്റുകൾക്കെതിരെ കർശന നിലപാട് സ്വീകരിക്കുന്നത് കേന്ദ്ര സർക്കാരിന്റെ നയമാണ്. മാവോയിസ്റ്റുകളോട് ഒരു വിട്ടുവീഴ്ചയും വേണ്ടെന്ന നിലപാടാണ് കേന്ദ്രത്തിനുള്ളത്. അത് ബഹ്റ നടപ്പിലാക്കി. റ്റി.പി. സെൻകുമാറിനെ പോലൊരു ബി ജെ പി നേതാവിനെ ഒഴിവാക്കിയാണ് ബഹ്റ സംസ്ഥാനത്ത് പോലീസ് മേധാവിയായത്. ബഹ്റക്ക് പിണറായിയും സി പി എമ്മുമായി യാതൊരു അടുപ്പവും ഉണ്ടായിരുന്നില്ല. എന്നിട്ടും അദ്ദേഹം സർക്കാരിന് പ്രിയപ്പെട്ടവനായി.

മുമ്പ് സി ബി ഐയിൽ ബഹ്റ ജോലി ചെയ്തിരുന്നു. ഗ്രഹാം സ്റ്റയിൻസ്, പുരുളിയ സംഭവം, മുംബൈ ബോംബ് ആക്രമണം തുടങ്ങിയ കേസുകൾ ബഹ്റ അന്വേഷിച്ചതാണ്. 2009 ൽ അദ്ദേഹം ദേശീയ കുറ്റാന്വേഷണ ഏജൻസിയിൽ ചേർന്നു. എൻ ഐ എയുടെ സ്ഥാപകരിൽ ഒരാളാണ് ബഹ്റ.2009 ൽ രാഷ്ട്രപതിയുടെ മെഡലിനും ബഹ്റ അർഹനായിട്ടുണ്ട്. ഇസ്റഹ് ജഹാൻ കേസിൽ കുറ്റാരോപിതരായ പ്രധാനമന്ത്രിയെയും അമിത് ഷായെയും രക്ഷിച്ചതിനുള്ള പ്രത്യൂപകാരമാണ് ബഹ്റക്ക് കേരളത്തിൽ ലഭിച്ച ഡിജിപി പദവിയെന്ന് മുല്ലപ്പള്ളി ആരോപിച്ചിരുന്നു. ഇതിന്റെ തെളിവുകൾ അടങ്ങുന്ന ഫയൽ താൻ നേരിട്ട് കണ്ടിട്ടുണ്ടെന്നാണ് മുല്ലപ്പള്ളി പറഞ്ഞത്. പ്രധാനമന്ത്രിയെയും അമിത് ഷായെയും രക്ഷിക്കാൻ ബഹ്റ തയ്യാറാക്കിയ റിപ്പോർട്ട് താൻ കണ്ടിട്ടുണ്ടെന്ന് മുല്ലപ്പള്ളി പറഞ്ഞു. ഇതിനെ കുറിച്ച് പ്രതികരിക്കാൻ ബഹ്റ തയ്യാറായില്ല.

പ്രധാനമന്ത്രി വിചാരിക്കാതെ ബഹറക്ക് ദേശീയ തസ്തികയിൽ എത്താൻ കഴിയില്ല. അത്തരമാരു തസ്തികയിൽ ബഹ്റ എത്തുകയാണെങ്കിൽ പിണറായിക്ക് ഉറക്കം നഷ്ടപ്പെടും. നരേന്ദ്ര മോദിയുടെ നിർദ്ദേശാനുസരണം പിണറായി ബഹ്റയെ നിയമിച്ചു എന്നാണ് കോൺഗ്രസിന്റെ ആരോപണം. മുല്ലപള്ളിക്ക് പിണറായിയും മറുപടി പറഞ്ഞില്ല. അടുത്ത ഡി ജി പി ക്ക് വേണ്ടിയുള്ള ഇടി തുടങ്ങി കഴിഞ്ഞു. എന്നാൽ ബഹ്റക്ക് പകരം വയ്ക്കാൻ കേരള പോലീസിൽ മറ്റൊരാളില്ല. സർക്കാരിന് അത്രയും പ്രിയപ്പെട്ടവനാണ് ബഹ്റ.