ഗൂഗിള്‍ പേ ആപ്പ് വഴി പണമയച്ച പുതുക്കാട് സ്വദേശിയ്ക്ക് അക്കൗണ്ടിലെ മുഴുവന്‍ പണവു നഷ്ടപ്പെട്ടതായി പരാതി. പുതുക്കാട് സ്വദേശി മഞ്ഞളി ഡിക്ലസാണ് തന്റെ അക്കൗണ്ടിലെ 29,000 രൂപ നഷ്ടപ്പെട്ടെന്ന് കാണിച്ചു സൈബര്‍ സെല്ലില്‍ പരാതി നല്‍കിയത്. ഗൂഗിള്‍ പേ ആപ്പ് വഴി തന്റെ എച്ച്ഡിഎഫ്‌സി ബാങ്കിലെ അക്കൗണ്ടില്‍ നിന്ന് ഫെഡറല്‍ ബാങ്കിലെ സ്വന്തം അക്കൗണ്ടിലേക്ക് 8,000 രൂപ കഴിഞ്ഞ മാസം 23നാണ് ഡിക്ലസ് അയച്ചത്. ദിവസങ്ങള്‍ കഴിഞ്ഞിട്ടും തുക അക്കൗണ്ടില്‍ എത്താതിരുന്നതോടെ ഡിക്ലസ് ബാങ്കിനെ സമീപിക്കുകയായിരുന്നു.

ഗൂഗിള്‍ പേയുടെ കസ്റ്റമര്‍ കെയറിലേയ്ക്ക് വിളിച്ചിട്ട് കോള്‍ ലഭ്യമായില്ലെങ്കിലും അല്‍പ്പസമയത്തിനുള്ളില്‍ തിരികെ കോള്‍ എത്തി. അവിടെ നിന്ന് അയച്ചു കിട്ടിയ ലിങ്കില്‍ വിവരങ്ങള്‍ എന്‍ട്രി ചെയ്ത് അവര്‍ പറഞ്ഞ മൊബൈല്‍ നമ്പറിലേയ്ക്ക് അയച്ചു കൊടുക്കാനായിരുന്നു നിര്‍ദേശം. വിവരങ്ങള്‍ അയച്ചതിനു പിന്നാലെ ബാങ്കിന്റെ യുപിഐ നമ്പര്‍ കൂടി അയക്കാന്‍ നിര്‍ദേശമെത്തി. യുപിഐ നമ്പര്‍ കൂടി ചേര്‍ത്തയുടനെ ഡിക്ലസിന്റെ രണ്ട് അക്കൗണ്ടിലെയും മുഴുവന്‍ തുകയും നഷ്ടപ്പെട്ടതായി പരാതിയില്‍ പറയുന്നു. 8000, 21, 000 രൂപ വീതമാണ് ഓരോ അക്കൗണ്ടിലും ഉണ്ടായിരുന്നത്. ഉടന്‍ തൃശൂര്‍ സൈബര്‍ സെല്ലില്‍ പരാതി നല്‍കി. പണം നഷ്ടപ്പെട്ട ഉടനെ അറിയിച്ചിരുന്നെങ്കില്‍ ബ്ലോക്ക് ചെയ്യാമായിരുന്നു എന്നാണ് സൈബര്‍ സെല്‍ അധികൃതര്‍ പറഞ്ഞത്.

സംഭവത്തിനു പിന്നിൽ വ്യാജ ഗൂഗിൾ പേ കസ്റ്റമർ കെയർ സംഘമാണെന്നാണ് കണ്ടെത്തൽ. ഗൂഗിളിൽ തിരഞ്ഞപ്പോൾ ലഭിച്ച നമ്പറുകളിൽ വിളിച്ചതാണ് പണിയായത്. ആ നമ്പറിൽ നിന്ന് തന്നെ തിരിച്ചുവിളിച്ച് അയച്ചു തന്ന ലിങ്കിൽ ക്ലിക്ക് ചെയ്തപ്പോഴാണ് പണം നഷ്ടമായത്. ലിങ്കിൽ ക്ലിക്ക് ചെയ്ത് വിവരങ്ങൾ നൽകിയതോടെ ആപ്പുമായി ബന്ധിപ്പിച്ചിരുന്ന 2 ബാങ്ക് അക്കൗണ്ടുകളും കാലിയാകുകയായിരുന്നു.

വ്യാജന്മാരെ നിങ്ങൾ തിരിച്ചറിയുക...

യുപിഐ ആപ്ലിക്കേഷനുകളുടെ സാങ്കേതികത്വം അറിയാത്തവർ തട്ടിപ്പിൽ കുടുങ്ങാനുള്ള സാധ്യതയേറെയാണ്. ഗൂഗിൾ പേ ഉൾപ്പെടെയുള്ള പേയ്മെന്റ് സർവീസുകളുടെ വ്യാജ കസ്റ്റമർ കെയർ നമ്പറുകൾ വഴിയുള്ള ന്യൂജെൻ തട്ടിപ്പ് വ്യാപകമാണ്. പരാതികൾ പരിഹരിക്കാനെന്ന മട്ടിൽ വ്യാജ സൈറ്റുകളിൽ നൽകിയിരിക്കുന്ന നമ്പറുകൾ വഴിയാണു തട്ടിപ്പ്. 100 കണക്കിനു നമ്പറുകളാണ് ഗൂഗിളിൽ വിവിധ പേയ്മെന്റ് സർവീസുകളുടെയും ഇ–കൊമേഴ്സ് സൈറ്റുകളുടെയും പേരിലുള്ള കസ്റ്റമർ കെയർ നമ്പറുകൾ എന്ന പേരിൽ  ട്വിറ്ററിലും മറ്റുമായി പോസ്റ്റ് ചെയ്തിരിക്കുന്നത്. ഔദ്യോഗിക സൈറ്റുകളിൽ കയറി മാത്രം കസ്റ്റമർ കെയർ നമ്പറുകൾ, ഇമെയിൽ വിലാസങ്ങൾ എന്നിവ ശേഖരിക്കുക. ഗൂഗിൾ പേ പോലെയുള്ള സേവനങ്ങൾക്ക് പ്രത്യേക നമ്പർ ഇല്ലെന്നതും ഓർമിക്കുക. ആപ് വഴിയും ഔദ്യോഗിക ട്വിറ്റർ ഹാൻഡിൽ വഴിയും മാത്രമേ അവർ പരാതികൾ സ്വീകരിക്കൂ

തട്ടിപ്പിനിരയായാൽ ഉടൻതന്നെ ജില്ലയിലെ സൈബർ പൊലീസ് സ്റ്റേഷനിലോ ക്രൈം സ്റ്റോപ്പർ നമ്പറായ 1090 ഡയൽ ചെയ്യാം. പൊലീസിൽ നിന്നു ലഭിക്കുന്ന ഇമെയിൽ വിലാസത്തിൽ കാർഡ് നമ്പർ, ട്രാൻസാക്‌ഷൻ നമ്പർ, മോഷ്ടിക്കപ്പെട്ട തുക എന്നിവ മെയിൽ ആയി അയയ്ക്കാം. ബാങ്കിൽ നിന്നു ലഭിക്കുന്ന മെസേജിൽ ഈ വിവരങ്ങളുണ്ടാകും. ഇതിന്റെ സ്ക്രീൻഷോട്ട് അയയ്ക്കാവുന്നതാണ്.