നല്ലകാലമത്രയും രാജ്യത്തെ സേവിക്കുന്ന വിമുക്ത ഭടന്മാരുടെ ഇന്നത്തെ അവസ്ഥ എന്താണെന്ന് അറിയണമെങ്കില്‍ നിഷാം ചവിട്ടിക്കൊന്ന ചന്ദ്രബോസിന്റെ അവസ്ഥ മനസിലാക്കണം. കര-നാവിക- വ്യോമ സേനകളില്‍ നിന്നും മറ്റ് പല സേനാ വിഭാഗങ്ങളില്‍ നിന്നും വിരമിച്ചെത്തുന്ന വിമുക്ത ഭടന്മാരുടെ ജീവിതാശ്രയം സെക്യൂരിറ്റി പണിയാണ്.
നേരത്തെ പൊതു മേഖലാ ബാങ്കുകളും കേന്ദ്ര പൊതുമേഖലാ സ്ഥാപനങ്ങലും വിമുക്ത ഭടന്മാരെ തങ്ങളുടെ സെക്യൂരിറ്റി ജീവനക്കാരായി നിയമിച്ചിരുന്നു. എന്നാല്‍ പതിയെ പതിയെ ആ പതിവ് നില്‍ക്കുകയായിരുന്നു. ഇത്തരം സ്ഥാപനങ്ങളില്‍ ഇന്ന് വിമുക്ത ഭടന്മാര്‍ക്ക് വേണ്ടത്ര ജോലി സാധ്യതയില്ല.
അങ്ങനെയാണ് വിമുക്ത ഭടന്മാര്‍ തന്നെ നേതൃത്വം നല്‍കുന്ന സെക്യൂരിറ്റി ഏജന്‍സികള്‍ സംസ്ഥാനത്ത് സജീവമായത്.. ഇവര്‍ വിമുക്ത ഭടന്മാരെയും മറ്റുള്ളവരെയും സെക്യൂരിറ്റി ഗാര്‍ഡുമാരായി ജോലിയില്‍ പ്രവേശിപ്പിക്കും. 5000 മുതല്‍ 7000 വരെയാണ് മാസശമ്പളം. 14 മണിക്കൂറെങ്കിലും ജോലി ചെയ്യണം. സ്വകാര്യ സ്ഥാപനങ്ങള്‍, അപ്പാര്‍ട്ടുമെന്റുകള്‍, ഫ്‌ളാറ്റുകള്‍, സ്‌കൂള്‍, കോളേജ് എന്നിവിടങ്ങളിലാണ് സാധാരണ ഇവരെ നിയമിക്കാറുള്ളത്. അതേ സമയം തൊഴില്‍ ദാതാവില്‍ നിന്നും സെക്യൂരിറ്റി ഏജന്‍സികള്‍ ആളൊന്നിന് 10,000 രൂപ വരെ വാങ്ങുന്നുണ്ട്. എന്നാല്‍ ഗാര്‍ഡുമാര്‍ക്ക് നല്‍കുന്നത് 5000-7000 രൂപ വരെ മാത്രം.
ഇ.പി.എഫ് , ഇ.എസ്. ഐ തുടങ്ങി ഒരു ആനുകൂല്യവും ഗാര്‍ഡുമാര്‍ക്ക് നല്‍കാറില്ല. സമയമത്രയും ജോലി ചെയ്തില്ലെങ്കില്‍ ശിക്ഷാ നടപടികള്‍ വേറെയുമുണ്ട്. സ്വകാര്യ വ്യക്തികളും ഏജന്‍സികളില്‍ നിന്നും ഗാര്‍ഡുമാരെ നിയമിക്കാറുണ്ട്. ഇവര്‍ വീടു പണി വരെ ചെയ്യേണ്ടി വരും. ആട്ടും തുപ്പും വേറെ. ജോലി സ്ഥലങ്ങളില്‍ ഇവര്‍ക്ക് വിശ്രമിക്കാന്‍ സ്ഥലം നല്‍കാറില്ല. ക്ഷീണം കൊണ്ട് രാത്രി ഉറങ്ങിപോയാല്‍ ജോലി പോകും.
യാതൊരു വിധത്തിലുള്ള ഇന്‍ഷ്വറന്‍സ് പരിരക്ഷയും ഇവര്‍ക്ക് നല്‍കാറില്ല. ഫ്‌ളാറ്റുകളില്‍ അര്‍ദ്ധ രാത്രി എത്തുന്നവര്‍ക്ക് ഗേറ്റ് തുറന്നു കൊടുത്തില്ലെങ്കില്‍ തെറി കേള്‍ക്കും. ജോലിക്ക് യാതൊരു അച്ചടക്കവുമില്ല. ആരുടെയും സംരക്ഷണവുമില്ല. ഏജന്‍സിയെ വിവരം അറിയിച്ചാല്‍ അവര്‍ കൈമലര്‍ത്തും. രാത്രി ജോലി സ്ഥലത്ത് മോഷണം നടന്നാല്‍ അതിനും ഉത്തരം പറയേണ്ടി വരും.
നിഷാം ചവിട്ടിക്കൊന്ന ചന്ദ്രബോസ് സെക്യൂരിറ്റി ഏജന്‍സി വഴി നിയമിതനായ ഗാര്‍ഡാണ്. ചന്ദ്രബോസ് മരിച്ചു. കുടുംബത്തിന്റെ ആശ്രയമറ്റു. വാര്‍ത്തകളില്‍ നിന്നും പുറത്താകുന്നതോടെ ചന്ദ്രബോസിന്റെ കുടുംബവും വഴിയാധാരമാകും.
സ്വകാര്യ സ്‌കൂള്‍ അധ്യാപകരെയും സ്വകാര്യാശുപത്രി ജീവനക്കാരെയും കുറിച്ച് കണ്ണീരൊഴുക്കുന്ന സര്‍ക്കാര്‍ ഏന്തേ ഇവരെ കാണാതെ പോകുന്നു?

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha