വിഎസിന്റെ കത്ത് ചോര്ത്തിയത് പിബി അംഗമെന്ന് റിപ്പോര്ട്ട്
വി.എസ്.അച്യുതാനന്ദന് കേന്ദ്ര നേതൃത്വത്തിന് നല്കിയ കത്ത് ചോര്ത്തി മാധ്യമങ്ങളിലൂടെ പുറത്ത് വിട്ടത് പിബി അംഗമെന്ന് സൂചന. കത്ത് മാധ്യമങ്ങള്ക്ക് ചോര്ത്തി നല്കിയത് വിഎസ് ആണെന്ന് കഴിഞ്ഞ ദിവസം സമ്മേളനത്തില് റിപ്പോര്ട്ട് അവതരിപ്പിച്ച് കൊണ്ട് പിണറായി പറഞ്ഞിരുന്നു. എന്നാല് വിഎസ് തന്റെ നിലപാടില് ഉറച്ച് നില്ക്കുകയാണെന്നാണ് അറിയുന്നത്.
കേരളത്തില് നിന്നല്ല കത്ത് ചോര്ന്നതെന്നും ഡല്ഹിയിലാണ് ഇത് സംഭവിച്ചിരിക്കുന്നുമാണ് വിവരം. സംസ്ഥാന നേതൃത്വത്തിന് നല്കിയ കത്ത് അല്പം മാറ്റങ്ങള് വരുത്തിയാണ് വി.എസ് പി.ബി. അംഗങ്ങള്ക്ക് നല്കിയത്. അതാണ് ചോര്ന്നിരിക്കുന്നത്. കേരള നേതാക്കളുമായി നിരന്തരം ബന്ധം പുലര്ത്തുന്ന ഒരു പി.ബി അംഗമാണ് പത്രത്തിന് വി.എസിന്റെ കത്ത് ചോര്ത്തി നല്കിയെന്നാണ് സംശയം. ചില നേതാക്കളെങ്കിലും അങ്ങനെ വിശ്വസിക്കുകയും ചെയ്യുന്നു.
വി.എസോ വി.എസിന്റെ ഓഫീസോ കത്ത് ചോര്ത്തി നല്കിയിട്ടില്ലെന്നാണ് അദ്ദേഹത്തോടടുത്ത വൃത്തങ്ങള് ഉറപ്പിച്ചുപറയുന്നത്. പാര്ട്ടിക്കെതിരെ നില്ക്കുന്ന ഒരു പത്രത്തിന് ഒരിക്കലും കത്ത് ചോര്ത്തി നല്കാന് വി.എസോ അദ്ദേഹത്തിന്റെ ഓഫീസോ തയാറാകില്ലെന്നും അവര് വ്യക്തമാക്കുന്നു. ഡല്ഹിയിലുള്ള ഒരു പി.ബി അംഗമാണ് ഈ കടുംകൈ ചെയ്തതെന്നാണ് ചില നേതാക്കളെങ്കിലും വിശ്വസിക്കുന്നത്. എന്നാല്, അതൊന്നും പുറത്തുപറയാന് അവര് തയാറാല്ല. അതേസമയം വി.എസ്.അച്യുതാനന്ദന് തന്റെ നിലപാടില് ഉറച്ചുനില്ക്കുന്നതായാണ് സൂചന. താന് ഉന്നയിച്ച വിഷയങ്ങള് അദ്ദേഹം കേന്ദ്ര നേതാക്കളോടും വ്യക്തമാക്കി. താന് മുന്നോട്ടുവച്ചത് പാര്ട്ടിയുടെ നിലനില്പിനായുള്ള നിര്ദ്ദേശങ്ങളാണെന്ന് അദ്ദേഹം വ്യക്തമാക്കിയതായും സൂചനയുണ്ട്. ഇത് വി.എസ് പിണറായി തര്ക്കമല്ല. ഇക്കാര്യങ്ങളില് കേന്ദ്ര നേതൃത്വം അടിയന്തരമായി ഇടപെടണമെന്നും വി.എസ് ആവശ്യപ്പെട്ടു.
ഈ സംസ്ഥാന സമ്മേളനത്തോടെ വി.എസിനെ പാര്ട്ടിയില് ഒന്നുമല്ലാതാക്കാന് ശ്രമിക്കുന്നതിന്റെ ഭാഗമായാണ് കത്ത് പുറത്തുവിട്ട നീക്കവും നടന്നിരിക്കുന്നതെന്നാണ് അറിയുന്നത്. വി.എസ് കത്ത് നല്കുകയും അത് ചോര്ത്തി നല്കിയെന്നും ആരോപിച്ചാണ് സംസ്ഥാന സമ്മേളന തലേന്ന് ചേര്ന്ന സംസ്ഥാന സെക്രട്ടേറിയറ്റ് വി.എസിനെതിരെ പ്രമേയം പാസാക്കി പരസ്യപ്പെടുത്തിയത്. ഇതിനെ അടിസ്ഥാനമാക്കി സംസ്ഥാന സമ്മേളനത്തിലും വി.എസിനെ പ്രതിനിധികള് വിചാരണ ചെയ്യുമെന്ന് ഉറപ്പായിരിക്കെയാണ് കത്ത് ചോര്ത്തിയതുമായി ബന്ധപ്പെട്ട് പുതിയ സൂചനകള് പുറത്തുവരുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha