കഴിഞ്ഞ ദിവസം സി.പി.ഐ.എം സംസ്ഥാന സമ്മേളന വേദിയില്‍ ഇറങ്ങിപ്പോയ പ്രതിപക്ഷ നേതാവ് വി.എസ്.അച്യുതാനന്ദന്‍ തിരുവനന്തപുരത്തേക്ക് മടങ്ങി. പുലര്‍ച്ചെ 3.45ഓടെ പുന്നപ്രയിലെ വസതിയില്‍ നിന്ന് യാത്ര തിരിച്ച വി.എസ് 5.30ഓടെ തന്റെ ഔദ്യോഗിക വസതിയായ കന്റോണ്‍മെന്റ് ഹൗസില്‍ എത്തി. മകന്‍ അരുണ്‍ കുമാറിനോട് പറഞ്ഞിട്ടായിരുന്നു വി.എസ് തിരുവനന്തപുരത്തേക്ക് തിരിച്ചത്. വിഎസ് പ്രതിപക്ഷ നേതൃസ്ഥാനം ഒഴിയാന്‍ ആലോചിക്കുന്നതായും റിപ്പോര്‍ട്ടുണ്ട്.
ഇന്നലെ രാത്രി വൈകിയും വിഎസിനെ അനുനയിപ്പിക്കാനുള്ള ശ്രമങ്ങള്‍ കേന്ദ്ര നേതൃത്വവും സംസ്ഥാന വേതൃത്വവും നടത്തിയിരുന്നു. എന്നാല്‍ സമ്മേളനം തന്നെ തേജോവധം ചെയ്യാന്‍വേണ്ടിയുള്ളതാണെന്ന് വിഎസ് പറഞ്ഞതായി സുചനയുണ്ട്. മാത്രമല്ല ജനങ്ങളുടെ പ്രശ്‌നങ്ങളില്‍ ഇടപെട്ടതാണ് തന്നെ പാര്‍ട്ടിയ്ക്ക് കൊള്ളരുതാത്തവനാക്കിയതെന്നും വിഎസ് വിശ്വസ്ഥരോട് പറഞ്ഞതായാണ് റിപ്പോര്‍ട്ട്.
താന്‍ ഉന്നയിച്ച വിഷയങ്ങള്‍ ചര്‍ച്ച ചെയ്യാമെന്ന് പി.ബി അംഗങ്ങള്‍ ഉറപ്പ് നല്‍കിയതിനെ തുടര്‍ന്ന് ഇന്ന് സമ്മേളനത്തില്‍ വി.എസ് പങ്കെടുക്കുമെന്നായിരുന്നു സൂചന. എന്നാല്‍ രാത്രി വൈകി വി.എസ് തീരുമാനം മാറ്റുകയായിരുന്നു. ഇനിയും ആലപ്പുഴയില്‍ നിന്നാല്‍ പാര്‍ട്ടിയുടെ ഔദാര്യത്തിന് വേണ്ടി താന്‍ കാത്തു നില്‍ക്കുകയാണെന്ന് ജനത്തിന് തോന്നുമെന്നും അടുപ്പക്കാരോട് വി.എസ് പറഞ്ഞിട്ടുണ്ട്.
തനിക്കെതിരായ പ്രമേയം പിന്‍വലിക്കണം, ടി.പി വധക്കേസിലെ പ്രതികളായ പി.കെ.കുഞ്ഞനന്തനേയും മനോജനെയും പാര്‍ട്ടിയില്‍ നിന്ന് പുറത്താക്കണം തുടങ്ങിയ ആവശ്യങ്ങള്‍ അംഗീകരിക്കാതെ വിട്ടുവീഴ്ചയ്ക്കില്ലെന്നും വി.എസ് വ്യക്തമാക്കിയിട്ടുണ്ട്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha