വിവാദ വ്യവസായി മുഹമ്മദ് നിസാമിനെ മാവോയിസ്റ്റുകള്‍ ജനകീയ വിചാരണ വിധേയമാക്കുമെന്ന് റിപ്പോര്‍ട്ട്
നിസാമിനെ തട്ടിയെടുത്തു ജനകീയ വിചാരണ നടത്തി ശിക്ഷിക്കാനാണ് മാവോയിസ്റ്റുകളുടെ നീക്കമെന്നാണ് സൂചന. രഹസ്യാന്വേഷണ വിഭാഗം ഇക്കാര്യത്തില്‍ പൊലീസിന് മുന്നറിയിപ്പു നല്‍കിയതായി കേരളകൗമുദിയാണ് റിപ്പോര്‍ട്ടു ചെയ്തത്. ഉത്തരേന്ത്യന്‍ ഗ്രാമങ്ങളിലും മറ്റും മാവോയിസ്റ്റുകള്‍ ഇത്തരത്തില്‍ കുറ്റവാളികളെ തട്ടിയെടുത്ത് ജനകീയ വിചാരണ നടത്താറുണ്ട്.
ജയിലില്‍ കഴിയുന്ന നിസാമിനെ കോടതിയിലേക്ക് കൊണ്ടുപോകുമ്പോഴോ മറ്റോ പൊലീസുകാരുടെ കാവലില്‍നിന്നും നിസാമിനെ മാവോയിസ്റ്റുകള്‍ തട്ടിയെടുക്കുമെന്നും അതീവ ജാഗ്രത പുലര്‍ത്തണമെന്നുമാണ് ഇന്റലിജന്റ്‌സ് ബ്യൂറോ മുന്നറിയിപ്പ് നല്‍കുന്നത്.
ഉന്നത രാഷ്ട്രീയക്കാരുമായും പൊലീസുകാരുമായും അടുത്ത ബന്ധമുള്ള നിസാമിന് കടുത്തശിക്ഷ കിട്ടാനിടയില്ലെന്ന നിഗമനത്തിലാണ് നേരിട്ട് ശിക്ഷ നടപ്പാക്കാന്‍ മാവോയിസ്റ്റുകള്‍ ഒരുങ്ങുന്നതെന്നാണ് രഹസ്യാന്വേഷണ കേന്ദ്രങ്ങള്‍ മുന്നറിയിപ്പ് നല്‍കുന്നത്. അതേപാത പിന്തുടര്‍ന്ന് കൊല്ലപ്പെട്ട ചന്ദ്രബോസിനോടുള്ള ജനങ്ങളുടെ സഹതാപ തരംഗവും നിസാമിനോടുള്ള കടുത്ത അമര്‍ഷവും തങ്ങള്‍ക്ക് അനുകൂലമാക്കി മാറ്റുകയാണ് മാവോയിസ്റ്റുകളുടെ ഉദ്ദേശമെന്നാണ് കേരള കൗമുദിയില്‍വന്ന റിപ്പോര്‍ട്ട് സൂചിപ്പിക്കുന്നത്.
നിസാമിനെ നേരിട്ട് കൈകാര്യം ചെയ്യാന്‍ സാധിച്ചില്ലെങ്കില്‍ കേരളത്തിലും തമിഴ്‌നാട്ടിലും ഗള്‍ഫിലുമായി പരന്നുകിടക്കുന്ന ബിസിനസ് സ്ഥാപനങ്ങളെ തകര്‍ക്കാനും മാവോയിസ്റ്റുകള്‍ ലക്ഷ്യമിടുന്നുണ്ടത്രേ. സെക്യൂരിറ്റിക്കാരനെ വാഹനമിടിച്ച് പരിക്കേല്‍പ്പിച്ച ശോഭസിറ്റിയിലെ വില്ലയ്ക്കും അന്തിക്കാട്ടെ തറവാടുവീടിനും ഭീഷണിയുണ്ട്. നിസാമുമായി ബന്ധം പുലര്‍ത്തുന്ന പൊലീസുകാരോട് കരുതിയിരിക്കാനും ഇന്റലിജന്റ്‌സ് നിര്‍ദേശമുണ്ട്.
അതേ സമയം ചന്ദ്രബോസ് വധക്കേസ് പുതിയ അന്വേഷണ സംഘത്തിനു കൈമാറാന്‍ എ.ഡി.ജി.പി. എന്‍. ശങ്കര്‍റെഡ്ഢി ആഭ്യന്തരവകുപ്പിനു ശിപാര്‍ശചെയ്തു. കേസില്‍ സ്‌പെഷല്‍ പ്രോസിക്യൂട്ടറെ നിയമിക്കുന്ന കാര്യവും സര്‍ക്കാര്‍ പരിശോധിച്ചുവരികയാണ്. ഇക്കാര്യത്തില്‍ ചന്ദ്രബോസിന്റെ ബന്ധുക്കളുടെ അഭിപ്രായം ആരായാന്‍ ആഭ്യന്തരമന്ത്രി രമേശ് ചെന്നിത്തല നിര്‍ദേശം നല്‍കി. കേസന്വേഷണത്തിനു നേതൃത്വം നല്‍കിയ മുന്‍ സിറ്റി പോലീസ് കമ്മിഷണര്‍ ജേക്കബ് ജോബിനും മുഖ്യ അന്വേഷണ ഉദ്യോഗസ്ഥനായ പേരാമംഗലം സി.ഐ. പി.സി. ബിജുകുമാറിനും അന്വേഷണത്തില്‍ പാളിച്ചകള്‍ സംഭവിച്ചതായി തൃശൂര്‍ റേഞ്ച് ഐ.ജി. ടി.ജെ. ജോസ് എ.ഡി.ജി.പിക്കു റിപ്പോര്‍ട്ട് നല്‍കിയിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
