അടിമുടി മാറും... ബിജെപി സംസ്ഥാന നേതൃത്വത്തെ അടിമുടി മാറ്റാന് അമിത് ഷായുടെ നിര്ദേശം; പ്രായം നോക്കി മാത്രം ബിജെപിയില് സ്ഥാനം നല്കും; പാര്ട്ടിയെ സര്ക്കാരിനെക്കാളും ചെറുപ്പവും ഊര്ജസ്വലവുമായി നിര്ത്താനുള്ള കര്മ്മ പദ്ധതിയ്ക്ക് തുടക്കം കുറിക്കുക കേരളത്തില്; അപ്പോഴും യോഗം തെളിയുന്നത് കെ. സുരേന്ദ്രന് തന്നെ
ശ്രിധരന് പിള്ളയെ മിസോറാം ഗവര്ണറാക്കിയതിന് ശേഷം സംസ്ഥാന ബിജെപി അധ്യക്ഷനെ കണ്ടെത്താനാകാതെ കുഴയുകയാണ് ബിജെപി സംസ്ഥാന നേതൃത്വം. ഗ്രൂപ്പുകളിയും ആര്എസ്എസിന്റെ എതിര്പ്പും കാരണം ഒരാളേയും അധ്യക്ഷനാക്കാന് കഴിയാത്ത അവസ്ഥയാണുള്ളത്. കെ. സുരേന്ദ്രനോടൊപ്പമാണ് കേന്ദ്രത്തിന്റെ മനസെങ്കിലും സംസ്ഥാന നേതാക്കള് വഴങ്ങാത്തതാണ് നിയമനം വൈകുന്നത്.
അതേസമയം ബി.ജെ.പി.യില് സംഘടനാതലത്തില് അടിമുടി അഴിച്ചുപണി അമിത്ഷായുടെ നിര്ദേശം. പാര്ട്ടിയെ യൗവനയുക്തമാക്കാനുള്ള കര്ശന നിര്ദേശമാണ് കേന്ദ്ര നേതൃത്വം നല്കിയിട്ടുള്ളത്. പ്രായം ബി.ജെ.പി.യില് സ്ഥാനങ്ങള് ലഭിക്കുന്നതിനുള്ള പ്രധാന ഘടകമായി മാറും. അതിനുള്ള നടപടികള് ഈ തിരഞ്ഞെടുപ്പോടെ തന്നെ തുടങ്ങും.
പാര്ട്ടിയെ സര്ക്കാരിനെക്കാളും ചെറുപ്പവും ഊര്ജസ്വലവുമായി നിലനിര്ത്തുക എന്നതാണ് നയം. യുവാക്കളെ സജ്ജമാക്കുന്നതിന്റെ ഭാഗമായി യുവമോര്ച്ചയുടെ നേതൃത്വത്തില് മുപ്പത് വയസ്സുവരെയുള്ളവരെ മാത്രം പരിഗണിച്ചാല് മതിയെന്ന് നിര്ദേശിച്ചിരിക്കുകയാണ്. മണ്ഡലം പ്രസിഡന്റ് 45 വയസ്സില് താഴെയുള്ള ആളായിരിക്കണം. ജില്ലാ പ്രസിഡന്റിന് 55 വയസ്സില് കൂടാന് പാടില്ലെന്നും കേന്ദ്രം കര്ശന നിര്ദേശം നല്കി.
അതേസമയം, സംസ്ഥാന അധ്യക്ഷന് 55 വയസ്സില് കൂടുതല് ആവാമോ എന്ന കാര്യത്തില് വ്യക്തമായ ഉത്തരം കേന്ദ്രം നല്കിയിട്ടില്ല. ഇക്കുറി 55 വയസ്സിനു മുകളിലുള്ളവര് വന്നാലും കുഴപ്പമില്ല, അടുത്ത തവണ സംസ്ഥാന അധ്യക്ഷന് 55 വയസ്സ് നിര്ബന്ധമാക്കും. അതേസമയം, സംസ്ഥാന സമിതിയില് 55ന് മുകളില് ഉള്ളവരെയും പരിഗണിക്കും.
ജില്ലാ പ്രസിഡന്റ് സ്ഥാനത്തുനിന്ന് പ്രായാധിക്യം പരിഗണിച്ച് മാറേണ്ടി വരുന്നവര്ക്ക് സംസ്ഥാന സമിതിയില് ഇടം കണ്ടെത്താന് കഴിഞ്ഞേക്കും.
ഇപ്പോള് സംസ്ഥാന അധ്യക്ഷസ്ഥാനത്തേക്ക് പരിഗണിക്കപ്പെടുന്നതില് കെ. സുരേന്ദ്രന്, ശോഭ സുരേന്ദ്രന്, എം.ടി. രമേശ് എന്നിവര്ക്ക് വയസ്സ് കര്ശനമാക്കിയാലും ഇപ്പോള് പ്രശ്നമാവില്ല. അതേസമയം, സമവായം എന്ന നിലയില് മുതിര്ന്ന നേതാക്കളെ അധ്യക്ഷസ്ഥാനത്തേക്ക് പരിഗണിക്കുന്നത് ഭാവിയില് നടക്കാതെയാവും.
പാര്ട്ടിയിലെ ആക്ടീവ് അംഗങ്ങളുടെ കാര്യത്തിലും വലിയ വ്യത്യാസം വരുത്താന് കേന്ദ്രം നിര്ദേശിച്ചിട്ടുണ്ട്. കേരളത്തില് ബി.ജെ.പി. അംഗങ്ങള് കൂടിയെന്ന് പറയുമ്പോള്ത്തന്നെ ആക്ടീവ് അംഗങ്ങളുടെ എണ്ണം കേരളത്തില് കുറഞ്ഞതായാണ് കാണുന്നത്. 25 അംഗങ്ങളെ ചേര്ക്കുന്നവര്ക്കു മാത്രമേ ആക്ടീവ് അംഗത്വം ലഭിക്കുകയുള്ളു. ആ നിബന്ധന എടുത്തുകളയാന് ദേശീയ നേതൃത്വം ആവശ്യപ്പെട്ടിരിക്കുകയാണ്. പാര്ട്ടിയില് ഊര്ജസ്വലമായി പ്രവര്ത്തിക്കുമെന്ന് ഉറപ്പുള്ളവര്ക്കെല്ലാം ഇനി ആക്ടീവ് മെമ്പര്ഷിപ്പ് നല്കാനും കേന്ദ്രം നിര്ദേശിച്ചിട്ടുണ്ട്.
ശബരിമല പ്രക്ഷോഭത്തില് വലിയ മുന്നേറ്റം നടത്തിയ സുരേന്ദ്രനെ അധ്യക്ഷനാക്കിയാല് മതിയെന്നാണ് കേന്ദ്രത്തിന്റേയും മനസിലിരുപ്പ്. എന്നാല് കേരളത്തിലെ ചില മുതിര്ന്ന നേതാക്കളുടെ എതിര്പ്പാണ് സുരേന്ദ്രന് വിനയാകുന്നത്. വി. മുരളീധരന്റെ മനസാണ് കെ. സുരേന്ദ്രനെന്നാണ് എതിര്പ്പിന് പ്രധാന കാരണം. അതേ സമയം കേന്ദ്ര നേതൃത്വത്തിന്റെ പുതിയ നീക്കം വന്നതോടെ ഏറ്റവുമധികം അനുകൂലമാകുന്നത് സുരേന്ദ്രനാണ്. എന്തെങ്കിലും കാരണത്താല് സുരേന്ദ്രന് അധ്യക്ഷ സ്ഥാനം നല്കാന് പറ്റിയില്ലെങ്കില് ദേശീയ തലത്തിലെ വലിയൊരു സ്ഥാനം നല്കാനും അമിത് ഷാ ലക്ഷ്യമിടുന്നു. എന്തായാലും സുരേന്ദ്രന് രാജയോഗമെന്നത് ഉറപ്പാണ്.
https://www.facebook.com/Malayalivartha