കണ്ണൂര്‍ അഞ്ചരക്കണ്ടിയിലെ സി. പി. എം ഏരിയാ കമ്മിറ്റി ഓഫീസിലും ഇരിവേരി ലോക്കല്‍ കമ്മിറ്റി ഓഫീസിലും ഇന്ന് പുലര്‍ച്ചെ ബോംബാക്രമണം നടന്നു. ഓഫീസില്‍ ഉറങ്ങുകയായിരുന്ന ചക്കരക്കല്‍ കിണയന്നൂരിലെ ഒറോറക്കണ്ടി ഹൗസില്‍ ഒ.കെ. രാജേഷ് (30), ചക്കരക്കല്‍ മുതുകുറ്റിയിലെ മൂട്ടില്‍ ഹൗസില്‍ ലിപിന്‍ (19) എന്നിവരെ എ.കെ.ജി സഹകരണ ആശുപത്രിയില്‍ പ്രവേശിപ്പിച്ചു. ഇന്ന് പുലര്‍ച്ചെ 5.45 ഓടെ ഏതാനും ബൈക്കുകളിലായി എത്തിയ ബി.ജെ.പി ആര്‍.എസ്.എസ് പ്രവര്‍ത്തകരാണ് അക്രമത്തിനു പിന്നിലെന്ന് സി.പി.എം ആരോപിച്ചു.
എന്നാല്‍ ബി.ജെ.പി പഞ്ചായത്ത് കമ്മിറ്റി പ്രസിഡന്റിനെ വെട്ടിപ്പരിക്കേല്‍പ്പിച്ചു. ചെമ്പിലോട് പഞ്ചായത്ത് കമ്മിറ്റി പ്രസിഡന്റ് സി.പി രഞ്ജിത്തി (30)നാണ് വെട്ടേറ്റത്. ഇയാളെ തലശ്ശേരി ഇന്ദിരാഗാന്ധി ആശുപത്രിയില്‍ പ്രവേശിപ്പിച്ചു. നിര്‍മ്മാണ തൊഴിലാളിയും ഓട്ടോെ്രെഡവറുമായ രഞ്ജിത്ത് ജോലിക്ക് പോകാനായി മുതുകുറ്റിയിലെത്തിയപ്പോഴാണ് ഇന്ന് രാവിലെ 8.30ഓടെ അക്രമമുണ്ടായത്. സി.പി.എം പ്രവര്‍ത്തകരാണ് അക്രമത്തിന് പിന്നിലെന്ന് ബി.ജെ.പി ആരോപിച്ചു.
പുലര്‍ച്ചെ അഞ്ച് ബൈക്കുകളിലായി എത്തിയ സംഘമാണ് ഓഫീസ് ആക്രമിച്ചതെന്ന് പ്രവര്‍ത്തകര്‍ പറഞ്ഞു. വാതില്‍ തകര്‍ത്ത് അകത്തുകടന്ന പത്തോളംപേര്‍ അഞ്ച് ബോംബുകള്‍ എറിഞ്ഞെന്നാണ് പരിക്കേറ്റ് ആശുപത്രിയില്‍ കഴിയുന്നവര്‍ പൊലീസിനു നല്‍കിയ മൊഴി. ചെമ്പിലോട്ടെ ആര്‍.എസ്.എസ്. പ്രവര്‍ത്തകനായ സൂരജിന്റെ നേതൃത്വത്തില്‍ രഞ്ജിത്ത്, ഷിനോജ്, നവീന്‍, രതീഷ് പത്തിലേറെ വരുന്ന സംഘമാണ് അക്രമത്തിനു പിന്നിലെന്നാണ് ആരോപണം. സ്‌ഫോടനത്തില്‍ ഓഫീസിനോട് ചേര്‍ന്നുള്ള വില്ലേജ് ഓഫീസിന്റെ ജനലും തകര്‍ന്നു.സി.പി.എം പോളിറ്റ്ബ്യൂറോ അംഗം പിണറായി വിജയന്‍ ഏരിയാ കമ്മിറ്റി ഓഫീസ് സന്ദര്‍ശിച്ചു.ആര്‍.എസ്.എസ് അക്രമം അവസാനിപ്പിക്കണമെന്ന് പിണറായി ആവശ്യപ്പെട്ടു. ഇല്ലെങ്കില്‍ അത് കൂടുതല്‍ സംഘര്‍ഷാവസ്ഥയിലേക്ക് കാര്യങ്ങള്‍ കൊണ്ടെത്തിക്കുമെന്നും അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha