സെക്യൂരിറ്റി ജീവനക്കാരന്‍ ചന്ദ്രബോസിനെ ഇടിച്ചു കൊല്ലാന്‍ മുഹമ്മദ് നിസാം ഉപയോഗിച്ച ഹമ്മര്‍ കാര്‍ നിസാമിന്റേതല്ലന്ന്. കാറ് മോഷണ വസ്തുവാണോ അതോ നിസാമിന് വില്‍ക്കാനായി കിട്ടിയതോ ?. കൊലയാളി ഹമ്മറിനെ കുറിച്ചുള്ള ദുരൂഹത തുടരുകയാണ്. പഞ്ചാബിലെ ഒരു സിംഗിന്റെ പേരിലാണ് ഈ കാര്‍. ഇത് എങ്ങനെ നിസാമിന് കിട്ടിയെന്നാണ് പോലീസ് പ്രധാനമായും അന്വേഷിക്കുന്നത്. പോലീസിനെ കുഴക്കുന്ന നിരവധി ചോദ്യങ്ങളാണ് ഈ ഹമ്മര്‍ കാര്‍ ഉയര്‍ത്തിവിടുന്നത്. അവസാനം നമ്മുടെ പോലീസ് കേസന്വേഷിച്ച് കാറും നിസാമും രക്ഷപ്പെടുമോ എന്ന ചോദ്യമാണ് ബാക്കിയുള്ളത്.
പി.ബി 03 എഫ് 9999 നമ്പര്‍ ഹമ്മര്‍ വാഹനത്തിന്റെ രജിസ്‌ട്രേഷന്‍ പഞ്ചാബിലാണ് ചെയ്തിട്ടുള്ളത്. രേഖകളനുസരിച്ച് പഞ്ചാബിലെ ഒരു സിംഗിന്റേതാണ് വാഹനം. വ്യാജ പേരും മേല്‍വിലാസവുമാണോ ഇതെന്നും പോലീസ് പരിശോധിക്കുന്നുണ്ട്.
ഒരു മാസം മുമ്പാണ് ബംഗളുരുവില്‍ നിന്നാണ് ഹമ്മര്‍ നിസാം കേരളത്തിലേക്ക് കൊണ്ടുവന്നത്. അതുവരെ നിസാമിന്റെ ബംഗളുരുവിലെ സുഹൃത്തായ റെഡ്ഡിയായിരുന്നു വാഹനം ഉപയോഗിച്ചത്. യഥാര്‍ത്ഥ ഉടമ അറിയാതെ വാഹനം കൈകാര്യം ചെയ്യുന്ന നാലാമത്തെയാളാണ് നിസാം. വില്‍പന നടത്താന്‍ വേണ്ടിയാണ് മറ്റൊരാള്‍ വഴി റെഡ്ഡിയുടെ കൈയില്‍ ഹമ്മറെത്തുന്നത്. അത് നടക്കാതെ വന്നപ്പോള്‍ നിസാമിന് റെഡ്ഡി കൈമാറുകയായിരുന്നു. ഈ സാഹചര്യമാണ് പൊലീസ് പരിശോധിക്കുന്നത്.
ഹമ്മര്‍ നിസാം കേരളത്തിലേക്ക് കൊണ്ട് വന്നെങ്കിലും ഒരു രൂപ പോലും റെഡ്ഡിക്ക് കൊടുക്കുകയോ രജിസ്‌ട്രേഷന്‍ നടത്തുകയോ ചെയ്തിട്ടില്ല. റെഡ്ഡിയും നിസാമും തമ്മിലെ ഈ ബന്ധത്തിന്റെ അടിസ്ഥാനമെന്തെന്നും പോലീസ് പരിശോധിക്കുന്നുണ്ട്. അതിനിടെ ഹമ്മറിന്റെ ഉടമയായ സിംഗിനെ പേരാമംഗലം സ്‌റ്റേഷനില്‍ ഹാജരാക്കാന്‍ സഹായം അഭ്യര്‍ത്ഥിച്ച് സി.ഐ ബിജുകുമാര്‍ പഞ്ചാബ് പൊലീസിന് ഇ മെയില്‍ സന്ദേശമയച്ചു. നേരിട്ട് ഹാജരാകണമെന്നാവശ്യപ്പെട്ട് റെഡ്ഡിക്കും നോട്ടീസ് നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha